Ideko Timo Kamano Koso?

Deko e timo ang’o? Deko kapok ipong’o kad mar DPA (mamlaka ya kudumu ya uwakilishi) kata AMD (Mwelekezo wa Mapema Kuhusu Tiba) ma ichiwo ne Joneno ma osebatisi. Nikech “ukiya gima kiny notimore,” dwarore ahinya mondo uyier chon kendo unyis yore mag thieth ma unyalo yie godo ka undiko piny, kapo ni gimoro otimore madwaro thieth mapiyo. (Jak. 4:14; Tich 15:28, 29) Oselos vidio mar Transfusion-Alternative Health Care​—Meeting Patient Needs and Rights mondo okonyi e wachno. Ne vidiono, kae to ipar e yor lamo gik ma ipuonjori kuome kitiyo gi penjo ma onyisi mwalo kae.​—⁠Par Wachni: Nikech vidiono oting’o piche moko manyiso ka iyang’o ji e thieta, jonyuol onego oti gi rieko sama gineno vidiono gi nyithindo matindo. Kuonde ma vidiono ok yudore, wuo uru kuom “Maswali Kutoka kwa Wasomaji” mayudore e Mnara wa Mlinzi, ma Jun 15, 2004 kod ma Oktoba 15, 2000, kata Huduma ya Ufalme Yetu ma Novemba 1990 “Je! Wewe Uko Tayari Kukabili Hali Ngumu ya Kitiba Yenye Kujaribu Imani?”

(1) Ang’o momiyo lakteche gi jomoko ma tiyo tij thieth chako nono kendo wach medo remo? (2) Chiw ranyisi adek mag yeng’o ma korgi tek ma osetim maok tiye gi remo. (3) Lakteche adi e piny mangima ma osenyiso ni ginyalo yie thiedho jotuwo maok giti gi remo? Ang’o momiyo giikore timo kamano? (4) Nonro ma osetim e kinde machiegni e osiptande osenyiso ang’o kuom wach tiyo gi remo? (5) Chandruok mag tuwo ma otudore gi wach medo remo gin mage? (6) Gin ang’o ma jothieth osewacho kuom ber mag thieth maok tiye gi remo? (7) Ang’o mamiyo remo bedo matin e del? Mano miyo dend dhano winjo nade? Ang’o ma inyalo tim mondo okony jatuwo ma rembe tin? (8) Ang’o ma inyalo tim mondo dend jatuwo omed loso ng’injo ma rokwere e remo? (9) Gin yore mage ma itiyo godo e geng’o remo mondo kik chwer mang’eny? (10) Be yor thieth maok tiye gi remo nyalo konyo nyithindo matindo kata jomoko ma gimoro otimorenegi ma dwaro thieth mapiyo? (11) Achiel kuom chike madongo ma itiyogo e tayo thieth maber en ang’o? (12) Ang’o momiyo dwarore ahinya ni Jokristo oyier yor thieth maok tiye gi remo ma ginyalo yie godo kapok masira moro oneno? Ere kaka wanyalo timo mano?

Yie kod yore moko mag thieth ma inyiso e vidiono en wach ma ng’ato onego oyier en owuon kaluwore gi chunye michiko gi Muma. Be iseyiero yore thieth maok tiye gi remo ma inyalo yie mondo otimni kaachiel gi nyithindi kae to ipong’o kad mar DPA kata AMD? Mondo iyud weche malero yoregi e yo matut, ne sula mar 7 mar bug “Hera mar Nyasaye” kod weche mamoko mayudore e buge mamoko monyis e sulani. Bende ine kalatas madiere mar Tijwa mar Pinyruoth ma Novemba 2006 e wiye mawacho ni “Aneno Nade Gik Mawuok Kuom Ng’injo Maloso Remo Kaachiel gi Thieth Mitiyoe gi Remba Awuon? ” Mogik, ne ni indiko yiero magi e kad mari mar DPA. Jogo ma iyiero mondo owuo e loyi kaachiel kod joodi maok gin Joneno onego onyis malong’o weche duto ma iyiero.

[Sanduk manie ite mar 3]

• Be iseyiero yore thieth maok tiye gi remo ma inyalo yie mondo otimni kaachiel gi nyithindi?

• Be iting’o kad mari mar DPA kata mar AMD ma isepong’o kapo ni masira moro amora nyalo wuok?