Ideko Timo Kamano Koso?

Deko e timo ang’o? Deko e wach pong’o kad mar DPA (durable power of attorney) ma ichiwo ne Joneno ma osebatisi. Nikech “ukiya gi ma kiny notimre,” dwarore ahinya mondo uyier chon kendo unyis yore mag thieth ma unyalo yie godo ka undiko piny, kapo ni gimoro otimore madwaro thieth mapiyo. (Jak. 4:14; Tich 15:28, 29) Oselos vidio mar Transfusion-Alternative Health Care—Meeting Patient Needs and Rights mondo okonyi e wachno. Ne vidiono, kae to ipar e yor lamo gik ma ipuonjori kuome kitiyo gi penjo ma onyisi mwalo kae.—Par Wachni: Nikech vidiono oting’o piche moko manyiso ka iyang’o ji e thieta, jonyuol onego oti gi rieko sama gineno vidiono gi nyithindo matindo.

(1) Ang’o momiyo laktere gi jomoko ma tiyo tij thieth chako ng’iyo manyien wach medo remo? (2) Chiw ranyisi adek mag yeng’o ma korgi tek ma osetim ma ok tiye gi remo. (3) Laktere adi e piny mangima ma osenyiso ni ginyalo yie thiedho jotuwo ma ok giti gi remo? Ang’o momiyo giikore timo kamano? (4) Nonro ma osetim e kinde machiegni e osiptande osenyiso ang’o kuom wach tiyo gi remo? (5) Chandruok mag tuwo ma otudore gi wach medo remo gin mage? (6) Gin ang’o giri ma jothieth osewacho kuom ber mag thieth ma ok tiye gi remo? (7) Ang’o mamiyo remo bedo matin e del? Mano miyo dend dhano winjo nade? Ang’o ma inyalo tim mondo okony jatuwo ma rembe tin? (8) Ang’o ma inyalo tim mondo dend jatuwo omed loso ng’injo ma rokwere e remo? (9) Gin yore mage ma itiyo godo e miyo remo kik chwer mang’eny? (10) Be yor thieth ma ok tiye gi remo nyalo konyo nyithindo matindo kata jomoko ma gimoro otimorenegi ma dwaro thieth mapiyo? (11) Achiel kuom chike madongo ma itiyogo e tayo thieth maber en ang’o? (12) Ang’o momiyo dwarore ahinya ni Jokristo oyier yor thieth ma ok tiye gi remo ma ginyalo yie godo kapok masira moro oneno? Ere kaka wanyalo timo mano?

Yie kod yore moko mag thieth ma inyiso e vidiono en wach ma ng’ato onego oyier en owuon kaluwore gi chunye michiko gi Muma. Be iseyiero yore thieth ma ok tiye gi remo ma inyalo yie mondo otimni kaachiel gi nyithindi? Mondo iyud weche ma lero yoregi e yo matut, ne “Maswali Kutoka kwa Wasomaji” mayudore e Mnara wa Mlinzi ma Jun 15, 2004, kod ma Oktoba 15, 2000, kod kalatas madiere ma wiye wacho ni “Aneno Nade Gik Mawuok Kuom Ng’injo Maloso Remo Kaachiel gi Thieth Mitiyoe gi Remba Awuon?” e Tijwa mar Pinyruoth ma Novemba 2006. Jogo ma iyiero mondo owuo e loyi kaachiel kod joodi ma ok gin Joneno onego onyisi malong’o weche duto ma iyiero.