Be Ing’eyo Yiero Monego Itim?

Yeng’o ma ok tiye gi remo itimo kuonde thieth mang’eny e piny mangima. Be ing’eyo yore mag thieth mayudore ma ok tiye gi remo? Dwarore ni ibed gi ng’eyo ma kamano mondo okonyi timo yiero kuom kit thieth kata yeng’o ma inyalo dwaro. Ng’i vidio mar No Blood​—Medicine Meets the Challenge. Bang’ timo kamano, non gima isepuonjori ka iketo wach yiero midwaro timono e lamo, kendo ka itiyo gi penjo maluwogi mondo okonyi.⁠—⁠⁠Par wachni: Nikech vidiono oting’o piche moko manyiso ka iyang’o ji e thieta, jonyuol onego oti gi rieko sama gineno vidiono gi nyithindo matindo.

(1) En wach mane maduong’ mamiyo Joneno mag Jehova ok yie mondo omedgi remo? (2) Kaluwore kod wach thieth, dwaro mar Joneno mag Jehova en ang’o? (3) Jotuwo nigi ratiro mane? (4) Ang’o momiyo en wach mowinjore kendo manyiso ni ng’ato rito ngimane ka oyiero mondo omiye thieth ma ok tiye gi remo? (5) Ka remo ochwer mang’eny, gin gik ariyo mage ma laktache onego okwong godo? (6) Gin yore mage ang’wen manyalo chiko laktache sama gitiyo gi yor thieth ma ok medie ng’ato remo? (7) Ere kaka laktache (a) nyalo miyo remo kik chwer mang’eny, (b) kungo ng’injo marokwere, (c) miyo remo omed losore, kendo (d) reso remo sa yeng’o? (8) Ler ane yore mag thieth mong’ere kaka (a) hemodilution kod (b) reso remo (cell salvage). (9) En ang’o ma onego idwar mondo onyisi kuom wach yor thieth moro amora ma ok tiye gi remo? (10) Be yeng’o ma kore tek inyalo tim ma ok omed ng’ato remo? (11) En dongruok mane maber ma timore sani e yore mag thieth?

Yie kod yore moko mag thieth ma inyiso e vidiono en wach ma ng’ato onego oyier en owuon kaluwore gi chuny michiko gi Muma. Be isetimo yiero maler kuom yore thieth ma inyalo yie mondo otimni kaachiel gi nyithindi, kae to ipong’o kad mar DPA? Mondo iyud weche malero yoregi e yo matut, ne “Maswali Kutoka kwa Wasomaji” e Mnara wa Mlinzi ma Jun 15, 2004 kod ma Oktoba 15, 2000. Kae to ti kod kalatas madiere mar Tijwa mar Pinyruoth ma Novemba 2006, kama wacho ni, “Aneno Nade Gik Mawuok Kuom Ng’injo Maloso Remo Kaachiel gi Thieth Mitiyoe gi Remba Awuon?,” mondo okonyi timo yiero ma mari iwuon kuom yore thieth ma inyalo yiego kata tamore. Mogik, ne ni indiko yiero magi e kad mari mar DPA. Jogo ma iyiero mondo owuo e loyi kaachiel kod joodi ma ok gin Joneno onego onyisi malong’o weche duto ma iyiero.

[Sanduk manie ite mar 3]

• Be iseyiero yore thieth ma ok tiye gi remo ma inyalo yie mondo otimni kaachiel gi nyithindi?

• Be iting’o kad mari mar DPA ma isepong’o kapo ni masira moro amora nyalo wuok?