Kalatese mag Gwelo Ji e Rapar Monego Opog e Piny Ngima!
1. En kampen mane makende mibiro timo e piny ngima kapok otim Rapar?
1 “Timuru ma, uparago.” (Luka 22:19) Kuom luwo weche ma Yesu nochikogi, jogo malamo Jehova kaachiel gi osiepegi biro chokore Mach 30, 2010, mondo gipar tho mar Yesu. Kalatese makende mag gwelo ji e Rapar ibiro pogo e piny ngima chakre Mach 13 nyaka Mach 30.
2. Ere kaka wanyalo chiwo kalatese mag gwelo ji?
2 Kaka Ibiro Chiw Kalatesego: Inyalo miyo wuon ot kalatasno mondo one picha mogo e ng’eye, kae to iwach kama: “E odhiambo mar Mach 30, ji tara gi tara biro chokore e piny ngima mondo opar tho mar Yesu. Abiro mondo agweli in kaachiel gi joodi e Raparno. Inyalo biro gi osiepeni bende. Raparno ibiro tim kama onyis piny kae.” Kaluwore gi kama ilendoe kaachiel gi ng’at milendone, inyalo yiero somo Luka 22:19 manyiso ni timo Rapar en chik. Kata kamano, ket e paro ni nikech wan gi kinde matin mar timo kampenni e alworawa, ber mondo iwuo machuok.
3. Wanyalo gwelo jomage?
3 Kapo ni kanyaklau nigi alwora maduong’ mar lendo, jodong-kanyakla biro nyisou kabe unyalo weyo kalatesego ne joma ok uyudo e utegi e lendou mokwongo. Kanyalore to uchiw gasede kaachiel gi kalatesego. Ne ni igwelo joma idok limo, jopuonjre Muma, joma utiyogo, joskul weteni, wedeni, joma odak machiegni kodi, kod jomoko ming’eyo.
4. Erokamano ma wan-go kuom hera ma Jehova nonyiso e chiwo rawar biro jiwowa mondo watim ang’o?
4 Ikri mar Gwelo Ji Mang’eny: Kinde mar Rapar en kinde maberie moloyo mar tiyo tijwa mar lendo e okang’ momedore. Be inyalo timo lokruok moko e chenroni mondo ibed painia makonyo? Be in gi nyithindo kata jopuonjre mag Muma matimo dongruok maber e wach Nyasaye? Ka en kamano, nyis jodongo mondo one ka joma nyien-go owinjore otim kampenni kaka jolendo mapok obatisi. Erokamano ma wan-go ne Jehova kuom hera ma nonyiso e chiwo rawar, biro miyo wan wawegi wabed e Rapar kendo gwelo ji mang’eny kaka nyalore.—Joh. 3:16.