Pogo Kalatese mag Gwelo Ji e Rapar Chakre April 2

1. Wabiro pogo kalatese mag gwelo ji e Rapar karang’o e higani, to ber mar kampen mitimo higa ka higani en mane?

¹ Chakre April 2 nyaka April 17, wabiro pogo kalatese mag gwelo ji e nyasi maduong’ie moloyo e higa, ma en Rapar mar tho Kristo. E kinde kampen mitimo higa ka higa, ji mang’eny osebedo ka igwelo to biro e Rapar. Kuom ranyisi, e odiechieng’ ma ne itimoe Rapar, miyo moro nogoyo ne ofis simo kowacho kama: “Eka aduogo e ot, to ayudo kalatas moro ma gwela e nyasi koket e bwo dho oda. Daher dhi e nyasino to ok ang’eyo sa mibiro time.” Owadwa ma nomako simo nonyise kama wach ma nopenjono yudore e kalatasno. Miyono notieko ka wacho kama, “Abiro dhi e nyasiuno odhiamboni!”

2. Ang’o mwanyalo wacho seche mwachiwo kalatese mag gwelo ji?

² Kaka Wabiro Chiwo Kalatesego: Nikech wan gi kinde matin mar timo kampenni e alworawa, ber wuoyo machuok. Wanyalo wacho kama: “Amosi. Wagweli in kaachiel gi joodi e nyasi maduong’ mitimo higa ka higa e piny mangima, higani nobed Jumapil, April 17. [Mi wuon ot kalatasno.] Tarigno en mar paro tho Yesu. Ibiro gol twak mawuok e Muma malero kaka wanyalo yudo ber kuom rawar mar Kristo. Kalatasni nyiso kama ibiro time kod sa.”

3. Ere kaka wanyalo gwelo ji mang’eny kaka nyalore?

³ Kapo ni kanyaklau nigi alwora maduong’ mar lendo, jodong-kanyakla nyalo neno ka owinjore weyo kalatesego ne weg udi maok oyudore ka iketogi kama joma kalo ok nyal nenogie. Ne ni igwelo joma idok timonegi limbe, wedeni, joma utiyogo, joskul weteni kod jomamoko ming’eyo. E kinde ma upogo kalatesego e giko juma, chiwgi kaachiel gi gasedewa ka mano owinjore. Be inyalo bedo painia makonyo e dwe mar April mondo ilendi e okang’ momedore e kinde mag kampenni?

4. Ang’o momiyo wagombo mondo jogo marwako wach obi e Rapar?

⁴ Mano kaka obiro bedo chenro mowinjore gi joma orwako wach! Gibiro winjo kilero kaka Jehova nonyiso hera maduong’ kuom chiwo rawar. (Joh. 3:​16) Gibiro puonjore kuom kaka Pinyruodh Nyasaye biro kelo ne dhano ber. (Isa. 65:⁠21-23) Bende ibiro jiwgi mondo giwuo gi jorwak welo mondo onyisgi chenro mar puonjruok mar Muma manyalo konyogi medo ng’eyo margi. Walemo ka wan gi geno ni ji mathoth ma gombo ng’eyo adiera biro chopo e Rapar ka ogwelgi e kampenni!