Kik Igo Yamo
1. Puonj mayudore e 1 Jo Korintho 9:26 inyalo tigo nade e tijwa mar lendo?
1 Jaote Paulo nondiko kama: “Aringo, ok ka ng’a ma riwo gi kiawa; ok agochi ka ng’at ma goyo yamo.” (1 Kor. 9:26) Paulo ne wuoyo kuom kaka ne oketo pache duto e tiyo ne Jehova e yo momedore. Kata kamano, puonj ma wayudo e wechego nyalo konyowa e tijwa mar lendo bende. Ok wadwar ‘goyo yamo’ kata ketho kinda ma watimo e tij lendo, nikech wadwaro yudo nyak mang’eny kaka nyalore. Ere kaka wanyalo timo mano?
2. Ere kaka wanyalo luwo ranyisi mar Paulo gi Jokristo mokwongo e yiero seche gi kuonde monego walendie?
2 Lend Kuonde ma Ji Yudore: Paulo gi Jokristo mamoko mokwongo ne lendo kuonde ma ne ging’eyo ni ji nyalo yudore. (Tich 5:42; 16:13; 17:17) Omiyo ka ji mang’eny e alworawa yudore e utegi godhiambo, nyalo bedo maber moloyo ka walendo ot ka ot e sechego. Be ji mang’eny yudore kuonde idho mtokni kata geche reru gokinyi seche ma ji dhi e tich kata godhiambo seche ma ji a e tich? Gin odiechienge mage ma chirni pong’ ahinya e alworau? E seche ma kamago, wanyalo yudo nyak maber ahinya ka walendo e yore.
3. Ere kaka wanyalo lendo e alworawa e yo manyiso ni ok wago yamo?
3 Lenduru gi Rieko e Alworau: Rieko bende dwarore mondo kik wago yamo sama walendo e alworawa. Kuom ranyisi, kar tero grup duto e alwora moro, mamiyo samoro biro dwarore ni uti gi seche mang’eny e chano jolendo, nyalo bedo maber moloyo ka upogoru e grube matindo tindo. Bende, seche ma wadhi lendo e gwenge maboyo maok mag taon to wan e grup maduong’, wanyalo tieko alworano piyo kendo wuoyo gi ji mang’eny ka wapogore e kidienje kidienje. Be wanyalo kwayo mondo omiwa alwora machiegni gi kama wadakie mondo kik wati gi seche mang’eny ahinya e wuotho ka wadhi lendo?
4. Ang’o mabiro konyowa mondo wabed ‘joywa ji’ kata jolupo man gi nyak?
4 Yesu noporo jolendo gi jolupo ma ‘ywayo ji.’ (Mari. 1:17) Dwaro maduong’ mar jalupo ok en mana bolo gogo e pi to en mako rech. Omiyo jolupo madwaro mako rech mang’eny bolo gogo e seche mowinjore kendo kama gigeno ni rech yudore, kae to gichako lupo maok gideko. Ee, ok gigo yamo. Mad wabeduru gi kinda machalo kamano.—Hib. 6:11.