Be In gi Kar Lendo ma Mari Iwuon?

1. Kar lendo ma mari en kama nade?

¹ Kar lendo ma mari en kama opogni. Onyalo bedo kama inyalo chopoe mayot kendo mapiyo mondo ilendie ka in kendi kata ka in-gi jalendo machielo. En gima ber riwo lwedo chenro mag kanyakla mag dhi e lendo ka in kanyachiel gi grup ka mano nyalore. Kata kamano, bedo gi kari ma ilendoe e seche mamoko, nyalo konyi timo tij lendo e yo maber chuth, kendo mano konyo ahinya ka kanyakla nigi kuonde madongo mag lendo.—Tich 10:42.

2. Gin ber mage mayudore kuom bedo gi kar lendo mar ng’ato owuon?

² Ber Mayudore: Jomoko osenwang’o ni nitie ber mang’eny kuom lendo kargi ma opognegi machiegni gi kama gitiye, kendo gitimo kamano e seche mag yueyo modiechieng’ kata mapiyo bang’ tich. Jolendo moko to ohero lendo kuom sa madirom achiel machiegni gi kama gidakie ka gin kanyachiel kaka joot ka pok seche mag Puonjruok-Buk mar Kanyakla ochopo. Nikech mano, jogo ma gipuonjorego Muma kata ma gidok limo bedonegi machiegni, nimar gitiyo gi seche matin, ok giti gi pesa mang’eny, kendo ok giol ahinya. Nikech gik mang’eny inyalo tim kuom seche matin, bedo gi kar lendo mar ng’ato owuon nyalo konyo jomoko obed painia makonyo kuom kinde ka kinde, kata miyo gibed painia mapile. E wi mano, lendo kama opog ne ng’ato owuon gi ng’eyo weg udi man kanyo nyalo miyo weg udigo genwa ma ok gichich kodwa, kendo mano konyowa e yiero wuoyo e wi weche machando chunygi, to mano miyo tijwa mar lendo yudo nyak maber.

3. Ang’o ma painia moro ne oneno kane oyudo kar lendo ma mare owuon?

³ Painia moro ma ne ojiw gi jarit-alwora ni mondo obed gi kar lendo ma mare owuon ne owacho kama: “Ne ayie gi wachno ma bang’e matin ne ang’era kendo ang’iyo kod weg udi ma ne ni kara mar lendo. Ne achano limogi kaluwore gi thuolo margi. Mano nomiyo dok-limbe ma ne atimo ne omedore kowuok 35 nyaka okalo 80 e dwe achiel, kendo aseyudo ji abiriyo mapuonjrago Muma.”

4. Ere kaka inyalo yudo kar lendo ma mari iwuon mi kendo ilendie?

⁴ Yudo Kar lendo: Ka idwaro kwayo kar lendo ma mari iwuon, wuo gi jal momi migawo mar rito alwora milendoe. Bed thuolo gwelo jalendo moro mondo olend kodi, kendo ndik piny udi ma ok iyudoe ji. Tem mondo itiek kar lendo momiyino kuom dweche ang’wen. Ka mano ok nyalre, wuo kod jarit Puonjruok-Buk mar Kanyakla kata joma moko mondo okonyi. Bang’ dweche ang’wen, inyalo duoko kar lendono ma isetieko duto kata inyalo kwayo mondo inwo lendo kanyo kendo. Kata kamano, kik ibed gi kar lendo achielno kuom kinde mochwere to onego iduoke mondo jomoko okwa kanyo. Ka in kama kanyakla nigi kar lendo matin kendo tek mondo iyud kar lendo ma mari iwuon, inyalo kwayo jarit puonjruok-buk mari mondo opogni kama tin minyalo lendoe.

5. Ang’o madwarore ni watim mondo wachop otewa mar lendo?

⁵ Ote ma wan-go mar lendo “e pinje duto” en tich maduong’ ahinya ma ok yot tieko. (Math. 24:14) En tich madwaro chenro kata tudruok maber. Ka walendo kanyachiel kaka grup, kendo ka wamedo gi lendo ma watimo kuonde ma opognwa wawegi, mano nyalo miyo waland wach maber ne ji mang’eny.