Ka Ji Onge e Utegi
1. En ang’o ma bedo matek e seche ma walendo ot ka ot?
1 Kuonde mang’eny en gima bedo matek yudo ji e utegi. E kindegi “mag chandruok,” chuno ni ji mang’eny nyaka ti matek mondo gilo dwachgi mag ringruok. (2 Timo. 3:1) Moko kuomgi nyalo bedo mabor gi kama gidakie ka gitiyo gi pesa e ng’iepo, kata ka gin e yore mag mor mag piny. Ere kaka wanyalo lando wach maber ne joma kamago?
2. Ere kaka wanyalo neno ni walendo kuonde ma ne ok oyudie ji?
2 Ndik Weche Piny: Wach mokwongo en ndiko piny kuonde ma ne ok oyudie ji. Timo mani en gima dwarore ahinya, to moloyo ka ulendo nyading’eny e alwora maru. Be indiko piny nying’ gweng’ kata chiro, namba mar alworano, nyingi, kod tarik? Inyalo weyo thuolo mar ndiko weche mamoko sama in, kata jalendo machielo odok lendo kuonde ma ne ok oyudie ji. Sama itieko lendo, ne ni imiyo ng’at ma opogne kar lendono weche mindiko, mak mana ka en owuon oyieni mondo ilend ne joma ne ok oyudi kar lendono. Ti gi kalatas moro yore e ndiko joma ne orwako wach ma ibiro medo limo.
3. Moko kuom paro ma ochiw kuom wach lendo ne joma ok yudore e utegi gin mage?
3 Tem Dok e Sa Machielo: Nyalo bedo ni jomoko ma ne ok oyudore e utegi e seche mag odiechieng’, nyalo yudore seche mag odhiambo kata giko juma. Be inyalo keto chenroni maber mondo omi idogi seche ma owinjore? (1 Kor. 10:24) Ka ok nyalre, to inyalo miyo jalendo manyalo dok kuonde mindikogo ma ne ok oyudie ng’ato e seche moko mopogore. Ka ok kamano, to inyalo ndiko ne jogo ma ne ok iyudo e utegi kata inyalo temo goyo negi simo. Jolendo ma ok nyal lendo ot ka ot ahinya nikech midekre nyalo mor e konyi timo kamano.
4. En ang’o manyiso gimomiyo dwarore ahinya mondo wadog lendo ne jogo ma ne ok oyudi e utegi?
4 Nitie gima ne otimore manyiso gimomiyo dwarore ahinya mondo watem romo gi jogo ma ok yudi e utegi. Jolendo kane osedhi nyading’eny e ot moro achiel kuom higini adek, gikone ne oyudi wuon ot. Ne onwang’ore ni kare ne osebedo ka orito mondo Janeno moro obi mondo gidhi nyime gi puonjruok Muma ma ne oyudo osechako ka podi ok obiro dak kanyo.
5. Ang’o manyiso ni kama lendo ne dhie nyime ikwano ni oserumo?
5 Tieko kar Lendo: Ang’o manyiso ni kama lendo ne dhie nyime ikwano ni oserumo? En ka osetim kinda mar yudo ng’ato e ute duto. Nyalo bedo maber weyo trakt kata gaset moro machon e yo mowinjore e ute ma ne ok oyudie ji, to moloyo e alwora ma ok lendie nyading’eny. Kar lendono onego otiek kuom dweche ang’wen. Bang’ mano, onego oduok kar lendono mondo jal ma omi migawo mar rito kar lendo ondik piny.
6. Ang’o momiyo onego watem lando wach maber ne ng’ato ka ng’ato e alwora marwa?
6 Dwaro marwa en ni mondo ji mang’eny kaka nyalore oyud thuolo mar puonjruok luongo nying’ Jehova mondo oresgi. (Rumi 10:13, 14) Mani oriwo nyaka jogo ma ok yudore e utegi e sama walendo ot ka ot. Mana kaka jaote Paulo, gombo mari onego obed “hulo Wach Maber mar ng’wono mar Nyasaye.”—Tich 20:24.