Kampen ma Kende, Oktoba 16 nyaka Novemba 12!
1 “Giko Din mar Miriambo Okayo Machiegni!” Mano e gima ondiki e wi trakt mar Wach Pinyruoth Na. 37, mibiro pogi e piny mangima chakre dwe mabiro. E jumbe ariyo mokwongo mag Oktoba, wabiro chiwo gasede mag Mnara wa Mlinzi kod Amkeni. Kachakore Wuok Tich Oktoba 16, nyaka Jumapil, Novemba 12, wabiro pogo Wach Pinyruoth Na. 37 gi kinda ahinya. E giko juma e kinde mag kampenno, wabiro chiwo traktno kod gasede manyien.
2 Ng’ano Manyalo Tiyo Tijni?: Jolendo duto malando wach maber, ijiwo mondo otim kampenno. Jomoko nyalo bedo painia makonyo. Be in gi nyithindo kata jopuonjore Muma ma timo dongruok e Wach Nyasaye? Konygi mondo giwuo gi jodong kanyakla mondo one kabe giromo bedo jolendo ma podi ok obatisi. Jodongo onego owuo gi jolendo ma odok chien ma oweyo tiyo tij lendo, mondo gijiwgi gin bende gitim kampenni, kendo ginyalo lendo gi jalendo ma olony e tij lendo.
3 Trakt mar Wach Pinyruoth Na. 37 sani ioro e kanyakla duto mondo jolendo kaachiel gi jopainia oyudi madirom 50 ng’ato ka ng’ato. Jogo ma ohero adiera to podi ok obedo jolendo nyalo yudo abich abich mondo gipog ne joodgi kaachiel gi osiepegi. Jolendogo duto onego ondik kwan mag trakno ma gichiwo ne ji e tok ripodegi mag giko Oktoba kod Novemba. Jagoro mar kanyakla biro riwo kwan duto mag traktno ma osechiw kendo oro ripodno ne ofis e giko Oktoba kod Novemba. Ka nitie trakt moko mabiro dong’ ka kampenno oserumo inyalo tiyogo e yore mamoko mapile mag lendo.
4 Gima Inyalo Wachi: Wuo machuok, nikech timo kamano biro miyo oteni ochop ne ji mang’eny. Inyalo wacho kama: “Watiyo tich mar lando ote maduong’ ahinya e piny mangima ni ji duto. Daher miyi mae obed mari ma onge chudo. Yie mondo isome.” Kuonde moko, nyalo bedo maber lendo ma onge ofuko mar lendo. Wiyi kik wil gi ndiko nyinge ji duto ma nyiso ni girwako wachno.
5 Kaka Unyalo Lendo e Alworau: Kar pogo traktno e lendo ma itimo e lela kende, paruru kaka unyalo timo lendo mar ot ka ot ahinya kod kuonde mag ohala. Ndik piny udi ma ne ok iyudoe ng’ato kendo item dok e seche mopogore kata e odiechieng’ moro machielo e juma. Kachakore gi Wuok Tich, Novemba 6, traktno achiel achiel inyalo we e ute ma ne ok oyudie ng’ato. Kata kamano, ka kanyakla nigi kama duong’ ahinya mar lendo ma ok nyal tieki e kinde ma oketi, jodong kanyakla nyalo neno ka ber mondo traktno owe e ute joma ok yudore e kinde duto mag kampenno.
6 Kethruok mar “Babulon Maduong’” okayo machiegni ahinya. Dwarore ni ji oa kuome ka podi ok okethe chuth. (Fwe. 14:8; 18:8) Tim chenro sani mondo ibed gi thuolo malach mar timo kampen ma itimo e piny mangima mondo omi ji duto ong’e ni giko din mar miriambo okayo machiegni!