Kampen Makende Mibiro Pogie Trakt Oktoba 20–Novemba 16!
1 Chakre Wuok Tich, Oktoba 20, kendo kuom jumbe ang’wen, wabiro tiyo tich makende mar pogo trakt manyien ma wiye wacho ni Bende Diher Ng’eyo Adiera? Wageno ni kampenni makende mar piny mangima biro miyo ji mang’eny opar kuom gino ma ema chiwo adiera kende.—Joh. 17:17.
2 Traktno chiwo dwoko ma ratiro mag Muma kuom penjo auchiel madongo: “Bende Nyasaye dewowa kuom adier?” “Bende lweny gi chandruok chieng’ norum?” “Ang’o matimore ka ng’ato otho?” “Bende nitie geno ni joma otho?” “Ere kaka anyalo lemo mondo Nyasaye owinja?” kod “Ere kaka anyalo yudo mor e ngima?” Kanise mag Jokristo mag miriambo ok osechiwo dwoko makare kuom penjogi. Kata ji mang’eny ma ok wach ni gin Jokristo osepenjore penjogi, to nyalo bedo ni ok ging’eyo ni dwoko mawinjore maler yudore e Muma. Kuom mano, wageno ni ji mang’eny biro rwako weche ma trakno oting’o.
3 Lenduru e Alworau Duto: Temuru ahinya ulend kama duong’ kaka nyalore e alworau milendoe ot ka ot. Ka un gi kar lendo maduong’ ahinya, jodong-kanyakla nyalo jiwou mondo uwe trakno e ute joma ok oyudore e limbe mokwongo. Ipar miyo joma odak machiegni kodi, wedeni, joma utiyogo kata musomogo e skul kod jomamoko ma iwuoyogo pile trakt manyienno. Kamoro inyalo timo chenro mondo ibed painia makonyo e dweche mag Oktoba kata Novemba. Be in gi nyathi kata japuonjre mar Muma ma timo dongruok e adiera kendo manyalo bedo jalendo ma pok obatisi mondo oti kodwa tijni? Ka en kamano, nyis jodongo.
4 Gima Inyalo Wachi: Mondo omi ichop ne ji mang’eny gi oteno, ber mondo iti gi weche machuok sama ilendo. Penj weg udi achiel kuom penjo auchiel manie ng’e traktni kendo inyisgi dwoko mayudore e iye. Mani biro miyo jolendo duto oti gi weche mowinjore gi alwora. Ka ng’ato nenore ni orwako wach, par mano kendo idog ilime. E giko juma, gasede manyien inyalo chiw kaachiel gi traktno. Kampenno koserumo Novemba 16, wabiro chiwo buk mar Muma Puonjo. Trakt mabiro dong’ ibiro chiw mana kaka ichiwo trakt mamoko mantie.
5 Chak Puonjruok Muma: Gima duong’ momiyo olos traktni en ni okonywa chako puonjruok Muma gi ji. Sama idok limo ng’at ma ne orwako wach, inyalo penje adiera mayudore e Muma ma ne omiye hoch gi kuwe? Nyise ite mogik mar trakno kama olero chenro marwa mar puonjruok Muma, kendo imiye buk mar Muma Puonjo. Kanyalore, wuo machuok kuom paragraf achiel kata ariyo e sula moting’o weche mawuoyo malach kuom wach moyierono.
6 Jehova manyo jogo mabiro lame “e chuny, kendo e adiera.” (Joh. 4:23) Waduto wariwuru lwedo kampen makendeni mar konyo jomoko mondo ong’e adiera!