Be Iseikori ne Weche Thieth Manyalo Biro Apoya?

Masira moro amora motudore gi weche thieth nyalo porenwa sa asaya. (Jak. 4:14) Omiyo, ng’at mariek ikore kar nyalone. (Nge. 22:3) Be iseng’ado kendo ndiko kit thieth mibiro yiego? Mondo okonyi timo kamano, oseiknwa vidio mar Tranfusion -Alternative Health Care—Meeting Patient Needs and Rights, ma en vidio mar ariyo e DVD miluongo ni Transfusion-Alternatives- Documentary Series. Sama ineno vidiono, ne ane kinyalo dwoko penjo maluwogi. Nikech vidiono oting’o pichni moko manyiso ka iyang’o ji e thieta, jonyuol onego oti gi rieko e neno kabe nyithindo owinjore one kuonde moko. Kuonde ma vidiono ok yudre, wuouru kuom “Maswali Kutoka kwa Wasomaji” mayudore e Mnara wa Mlinzi ma Jun 15, 2004 kod ma Oktoba 15, 2000, kata weche mayudore e kalatas madiere mar Tijwa mar Pinyruoth ma 2006.

(1) Ang’o momiyo lakteche gi jothieth mamoko chako nono kendo wach medo remo? (2) Chiw ranyisi adek mag yeng’o ma korgi tek ma osetim maok tiye gi remo. (3) Ang’o momiyo lakteche gana mang’eny oikore thiedho jotuwo maok gimedogi remo? (4) Nonro ma osetim e kinde machiegni e osiptande osenyiso ang’o kuom wach tiyo gi remo? (5) Hinyruok mage manyalo bedoe ka omed ng’ato remo? (6) Gin ang’o ma lakteche osewacho kuom ber mag thieth maok tiye gi remo? (7) Ang’o mamiyo remo bedo matin e del, kendo ang’o minyalo tim mondo okony jatuwo ma rembe tin? (8) Ang’o ma inyalo tim mondo dend jatuwo omed loso ng’injo ma rokwere e remo? (9) Gin yore mage ma itiyogo e geng’o remo mondo kik chwer mang’eny sama iyang’o jatuwo? (10) Be yor thieth maok tiye gi remo nyalo konyo nyithindo matindo kata jomoko ma gimoro otimorenegi madwaro thieth mapiyo? (11) Achiel kuom chike madongo ma itiyogo e tayo thieth maber en ang’o?

Nikech in ema in gi ting’ mar yiero yor thieth monyis e vidioni kaluwore gi chunyi motieg gi Muma, kik irit nyaka sama gimoro oyudi apoya eka ichako yiero thieth midwaro kod maok idwar. Bug “Hera mar Nyasaye” e sula mar 7, buge monyis malogo, kaachiel gi kalatas madiere mar Tijwa mar Pinyruoth ma Novemba 2006 biro konyi e timo yiero mowinjore gi gik misepuonjori. Kae to kapo ni osebatisi, nyis yor thieth miyiero e kad mar DPA, kendo iting’ kad mari kinde duto.

[Weche manie ite mar 3]

Be iseng’ado kendo ndiko kit thieth mibiro yiego?