Lend Kitiyo gi Yore Makelo Nyak
1. Puonj mane mwayudo kuom nono yore mopogore opogore ma Jokristo mokwongo ne lendogo?
1 Jokristo mokwongo ne lendo ne ji mawuok e ogendini kod dinde mopogore opogore. (Kol. 1:23) Kata obedo ni ne gilando wach achiel, ma en Pinyruodh Nyasaye, ne gitiyo gi yore mopogore opogore kaluwore gi chal mar jowinjogi. Kuom ranyisi, kane Petro wuoyo gi Jo-Yahudi ma nomiyo Ndiko luor, nochako gi weche ma janabi Joel nondiko. (Tich 2:14-17) Weche mayudore e Tich Joote 17:22-31 nyiso ni Paulo to notiyo gi yo mopogore ka nowuoyo gi Jo-Grik. E kindegi, nitie alwora moko ma ji omiyoe Ndiko luor, kendo wanyalo somo kata wuoyo kuom Muma ayanga sama walendo ot ka ot. Kata kamano, nyalo dwarore ni wati gi rieko sama walendo ne joma ok ohero Muma kata weche din, kata maok nie dinde maluongore ni Jokristo.
2. Ere kaka wanyalo tiyo gi buge milendogo e dwe e konyo joma omiyo Muma luor koda maok omiyo Muma luor?
2 Ti Maber gi Buge Milendogo e Dwe: E higani mar tijwa, buge milendogo e dwe biro bedo ka lokore bang’ dweche ariyo ka dweche ariyo, to gibiro bedo gasede, trakt, kod brosua. Kata ka ji mang’eny e alworawa ok ohero Muma, pod wanyalo lendonegi ka watiyo gi yore moporore opogore kaluwore gi chalgi. Samoro ok wabi yudo thuolo mar somo ne ng’ato Muma e limbe mokwongo, kata kamano ka wuon ot moro ohero wach ma wawuoye, wanyalo dok lime mondo wakonye gero yie kuom Jachwech kod Wachne mondik kokalo kuom roho maler. Kata kamano, ka walendo kuonde ma ji omiyoe Muma luor, wanyalo tiyo gi bugewa e yo mowinjore. Bende wanyalo miyogi bug Muma Puonjo kata brosua mag Winj Nyasaye kod Winj Nyasaye Mondo Idag Nyakachieng’, ka watimo mano kata e dweche maok oyang ne tiyo gi bugego e lendo. Gima duong’ en neno ni watiyo gi yo manyalo kelo nyak.
3. Ang’o momiyo wanyalo poro chuny jomodak e alworawa gi lowo?
3 Ik Lowo: Chuny ji inyalo por gi lowo. (Luka 8:15) Mana kaka lowo moko nyaka ik maber eka kodhi otwie, e kaka nitie chuny jomoko ma nyaka ik maber eka adiera mag Muma otwi mi dongie. Jokristo mokwongo noyudo nyak nikech ne gichwowo e lowo mopogore opogore, to mano nokelonegi mor mogundho. (Tich 13:48, 52, NW) Wan bende wanyalo yudo nyak kod mor ka watiyo gi yore mopogore opogore sama walendo.