Tim Duto Minyalo—Kik Ipar ni Ok Ilony
1. Ang’o momiyo jolendo moko oluoro chako puonjruok mar Muma gi ji?
1 Dibed ni iluor chako puonjruok Muma gi ji nikech ok in gadier ni inyalo tayogi e yo molony? Nitie kinde ma jotich Jehova machon kaka Musa kod Jeremia bende ne paro ni ne ok giwinjore chopo migepegi. (Wuok 3:10, 11; 4:10; Yer. 1:4-6) Mano nyiso ni ok wan ema wahango bedo gi paro ma kamago. Ere kaka wanyalo loyo parogo?
2. Ang’o momiyo ok onego wane ni lendo mar ot ka ot kende oromo, ka waparo ni jomamoko ema owinjore ota puonjruok mag Muma?
2 Onego waket e paro ni Jehova ok dwar ni watim gima ok wanyal. (Zab. 103:14) Omiyo, migawo momiwa mar ‘timo ji jopuonjre’ en gima wanyalo chopo. (Math. 28:19, 20) Jehova omiyowa tijni waduto, to ok mana joma nok molony kata ma nigi nyalo moko makende. (1 Kor. 1:26, 27) Kuom mano, ok onego wapar ni jolendo mamoko ema nigi nyalo mar tayo puonjruok mag Muma, ka wan to walendo mana ot ka ot kende.
3. Ere kaka Jehova osekonyowa bedo molony e tayo puonjruok mag Muma?
3 Jehova Ema Miyo Wabedo Molony: Jehova ema miyo wabedo molony e timo ji jopuonjre. (2 Kor. 3:5) Kokalo kuom riwruok mar ogandane, osepuonjowa adiera mag Muma ma kata joma osomo ahinya e pinyni ok ong’eyo. (1 Kor. 2:7, 8) Mondo mi waluw ranyisi mar Yesu ma e Japuonj Maduong’, Jehova notimo chenro mondo ondiki yore ma Yesu notiyogo e puonjo, kendo pod odhi nyime tiegowa kokalo kuom kanyakla. E wi mago, Jehova ok owewa gi ting’ mar manyo kaka wanyalo puonjo ji Muma. Osemiyowa gik ma wanyalo tiyogo, kaka bug Muma Puonjo, malero adiera e yo mochanore maber kendo mayot winjo. Tayo puonjruok mar Muma nyalo bedo mayot moloyo kaka samoro wasebedo ka waparo.
4. Ang’o momiyo wanyalo bedo gadier ni Jehova biro konyowa?
4 Jehova nokonyo Musa gi Jeremia ma gichopo migepegi. (Wuok 4:11, 12; Yer. 1:7, 8) Wan bende wanyalo kwayo Jehova mondo okonywa. Sama watayo puonjruok mar Muma, wapuonjo ng’ato adiera e wi Jehova, to mano en gima long’o e nyim Nyasaye. (1 Joh. 3:22) Omiyo, ng’ad e chunyi ni ibiro timo tij puonjo ji Muma, ma e tich maber kendo makelo nyak ahinya e lendo.