Weche Mwanyalo Chako Wuoyogo gi Ji

Chako Puonjruok mar Muma gi Ji Ngeso Mokwongo e Dwe mar Agost

“Chiegni ni ji duto lemoga. Kata mana joma ok oyie ni Nyasaye nitie bende seche moko lemo sama giyudo chandruok moro. Ineno nade, be Nyasaye winjo lamo duto?” Rit dwoko. Nyise tok Ohinga mar Jarito ma Agost 1, kae to unon kode weche manie bwo penjo mokwongo kaachiel gi moko kuom ndiko moket kanyo. Chiw gasede kendo itim chenro mar dok nono penjo maluwo.

Paruru: Paro mochiw maloni onego otigo bende e timo ranyisi e romo mar dhi lendo chieng’ Ngeso ma Agost 3.

Ohinga mar Jarito Agost 1

“Walimou mondo wawuo kuom tim moro monya ahinya ma en ponografi, tiende ni ng’iyo pichni manyiso joma nindore kata man duge. Ji mang’eny neno ni ponografi ok rach. Ineno wachno nade? [Rit dwoko.] Yesu nowacho ni wanyalo ng’eyo ka gimoro ber kata rach kuom neno nyak ma gino kelo. [Som Mathayo 7:17.] Gasedni lero nyak maricho ma ponografi kelo. Olero bende gima ng’at ma osenyumore e ponografi nyalo timo mondo owere gi timno chuth.”

Amkeni! Agost

“Waduto dwaher dak kuom higni mang’eny kaka nyalore. Iparo nade, be dongruok ma dhano osetimo e weche mag sayans chieng’ moro nomi wadag nyaka chieng’? [Rit dwoko.] Winjie singo majaber ma Muma chiwoni. [Som 1 Jo Korintho 15:26.] Kata kamano, Nyasaye biro tiyo gi yo mane e tieko tho? Dibed ni obiro tiyo gi sayans koso yo moro machielo? To ang’o momiyo wabedo moti kendo watho? Gasedni lero dwoko ma Muma chiwo e wi penjogo.”