Kaka Wanyalo Puonjo Ji Kwatiyo gi Brosua mar Wach Maber
1. Olos nade brosua mar Wach Maber?
1 Mana kaka ne waneno e Tijwa mar Pinyruoth ma Julai higani, achiel kuom buge ma watiyogo ahinya e puonjo ji en brosua mar Wach Maber Mowuok Kuom Nyasaye! Weche mag Ndiko mag Muma ok oket achiel kachiel e brosuano, mani miyo wuon ot thuolo mar somo Ndikogo e Muma owuon. Thoth bugewa mwatiyogo e puonjo ji Muma olos e yo ma ng’ato ang’ata nyalo puonjore en owuon, to brosuani ne olos e yo ma nyaka japuonj oler ne japuonjre tiend puonj manie iye. Kuom mano, sama wachiwe onego watem wanyis wuon ot kaka watimoga puonjruok gi ji, mondo en owuon one kaka ng’eyo wach maber ma Muma wuoyoe en gima kelo mor.—Mat. 13:44.
2. Ere kaka wanyalo tiyo gi brosua mar Wach Maber e limbe mokwongo?
2 E Limbe Mokwongo: Inyalo wacho kama: “Abiro limi kawuono mondo wawuo kuom gima biro timore ne dhano e kinde ma biro. Iparo ni nitie chieng’ ma ngima dhano biro lokore ma bed maber? [Rit dwoko.] Muma nigi wach maber ma miyo wabedo gi geno. Ne ane moko kuom penjo ma Muma chiwo dwokogi.” Mi wuon ot brosuano, kendo ikwaye mondo oyier achiel kuom penjo ma yudore e toke. Kae to nyise kaka watimoga puonjruok gi ji ka itiyo gi paragraf mokwongo e somo moyierono. Yo machielo en penjo wuon ot penjo moro motudore gi achiel kuom somo miseyiero e i brosuano, kae to inyise kaka brosuano nyalo konye yudo dwoko ma Muma chiwo. Jolendo moko jotugoga achiel kuom vidiowa ma yudore e jw.org kapo ni somo ma giyierono otudore gi vidiono.
3. Ler ane kaka wanyalo tayo puonjruok mar Muma kwatiyo gi brosua mar Wach Maber.
3 Kaka Wanyalo Tayo Puonjruok Muma: (1) Chak gi somo penjo manie wi paragraf mondo ikony wuon ot ong’e wach maduong’ ma iwuoyoe. (2) Som paragraf manie bwo penjono. (3) Som ndiko mopiel, kae to iti gi penjo ma nyalo konyo wuon ot mondo one kaka Ndikogo chiwo dwoko mar penjo manie e wi paragrafno. (4) Kapo ni nitie paragraf machielo e bwo penjono, nwo okang’ mar 2 gi mar 3. Kapo ni nitie vidio moro motudore gi penjono, to pok itugega ne wuon ot, koro inyalo tuge sama upuonjoruno. (5) Mogik, penj wuon ot penjo manie wi paragrafno mondo ine kabe owinjo tiend weche ma upuonjoru.
4. Ang’o ma biro konyowa tiyo gi brosuani e yo molony?
4 Tem matek mondo ing’e kaka i brosuano chalo. Ti kode kinde duto ma thuolo oneno. Kapok idhi puonjri gi japuonjre, par kaka inyalo konye kitiyo gi Ndiko manie somo mudhi nono. (Nge. 15:28; Tich 17:2, 3) Kaka imedo bedo molony e tiyo gi brosuani, e kaka ibiro medo hero tiyo kode ahinya e puonjo ji adiera!