Nonro mag Chenro mar Chokruok mar Ngimawa kod Tijwa
APRIL 1-7
MWANDU MA YUDORE E WACH NYASAYE | 1 JO-KORINTHO 7-9
“Joma Ok Donj e Kend Nigi Mich”
Ti Maber gi Thuolo ma In-go Kaok In e Kend
3 Kinde mang’eny, jal maok nie kend nigi kinde koda thuolo moloyo jal manie kend. (1 Kor. 7:32-35) Mago gin thuolo makende manyalo miyo oti ne Nyasaye e okang’ momedore, otim ne jomoko gik manyiso hera, kendo sudo machiegni gi Jehova. Omiyo, Jokristo moko mogwaro, oseneno ber mar dak ka ok gin e kend, kendo giseng’ado mar “rwako wachno,” kuom kinde moko. Nyalo bedo ni moko kuomgi ne ok ochano mar bedo kamano, kata kamano, kane chal margi olokore, ne giparo matut kendo lamo kuom wachno mi gifwenyo ni kokalo kuom kony mowuok kuom Jehova, gin bende giyiero mar chung’ matek e chunygi. Kuom mano, ne giyie gi chal margi ma ne olokoreno, kendo girwako thuolo mar dak ka ok gin e kend.—1 Kor. 7:37, 38.
Puonj Mayudore e Barupe ne Jo Korintho
7:33, 34—“Weche mag pinyni” ma dichwo kata dhako mosedonjo e kend, keto e paro ahinya, gin ang’o? Paulo wuoyo kuom gik mapile matimore e ngima, ma Jokristo manie kend luwo. Gigo gin kaka chiemo, lewni kod kar dak, to ok gin gik maricho mag pinyni, ma Jokristo onego owe luwo.—1 Joha. 2:15-17.
w96-SW 10/15 12-13 ¶14
Joma Ok ni e Kend Nigi Thuolo mar Tiyo ne Nyasaye ma Onge Gima Galo Pachgi
14 Ka Jakristo ok ni e kend to otiyo gi thuolono e manyo mana gik ma konye owuon, onge gima otimo “maber moloyo” Jokristo ma ni e kend. Ng’at ma kamano luwo mana dwache owuon, to ok weche mag Pinyruoth. (Mathayo 19:12) Jakristo ma ok ni e kend onego ‘opar weche mag Ruoth,’ opar “kaka onyalo bedo malong’o e wang’ Ruoth,” kendo ‘osik ka ochiwore ne tij Ruodhwa ma onge gima galo pache.’ Mano nyiso ni ochiwore tiyo ne Jehova gi Kristo Yesu gi pache duto. Mano e ka otimo “maber moloyo” Jokristo ma ni e kend.
Nono Puonj Manie Wach Nyasaye
lv 220-221
Apendiks
Kaka Muma Neno Wach Ketho Kend Chuth kod Pogo Dak
E kinde moko ma weche tek ahinya, Jokristo moko oseyiero pogo dak kata ketho kend chuth gi jaot kata bedni ok oterore. Ka ng’ato otimo kamano, Muma wacho ni jal mowuok e kendno “onego osik ma ok okende, kata mondo odog owinjre” gi jal ma ne gikendorego. (1 Jo Korintho 7:11) Jakristo mokawo okang’ ma kamano ok ni thuolo mar kendruok gi ng’at machielo. (Mathayo 5:32) Wane ane moko kuom weche matek ma jomoko oseneno ni chiwo thuolo mar pogo dak.
Tamruok rito joode. Joot nyalo bedo modhier ahinya, ma ok giyud gik mochuno e ngima, nikech dichwo otamore ritogi to en gi nyalo mar timo kamano. Muma wacho kama: “Ka ng’ato ok rit . . . joode, ng’atno osekwero yie, kendo orach moloyo ng’at ma ok oyie.” (1 Timotheo 5:8) Ka ng’at ma kamano otamore loko yorene, chiege biro dwarore ni oyier kabe dwarore ni orit ngimane kod mar nyithinde kuom pogo dak kaluwore gi chik sirkal. Kuom adier, jodongo ma Jokristo onego onon ahinya ka odonjne Jakristo ni otamore rito joode. Ka ng’ato otamore rito joode mano nyalo miyo ogole ei kanyakla.
Gero mokalo tong’. Achiel kuom joma nie kend nyalo bedo mager ahinya ma mi ngima jaode mogoyo obed kama rach. Ka ng’at ma gocho en Jakristo, jodong-kanyakla onego onon wachno ahinya mondo ging’e kabe en adier. Bedo gi mirima kod tim gero gin gik manyalo miyo ogol ng’ato ei kanyakla.—Jo Galatia 5:19-21.
Ka bedo gi winjruok maber gi Jehova ni kama rach. Jaot achiel kinde duto nyalo miyo obed ma ok nyalre ne jaode bedo e lamo madier kata onyalo temo chune mondo oketh chike Nyasaye e yo moro. E kinde ma kamano, jaot ma ngimane ni kama rach biro yiero kabe yo makende monyalo ‘winjogo Nyasaye moloyo winjo dhano’ en pogo dak kaluwore gi chik sirkal.—Tich Joote 5:29.
w00-SW 7/15 31 ¶2
Inyalo Siko Kiler e Piny Mopong’ gi Anjawoni
Kuom mano, rowere ok onego orikni donjo e kend sama gichako winjo ka gigombo weche mag nindruok. Kend en gima ka ng’ato osedonjoe to nyaka koro obedie abeda; omiyo, mondo ng’ato osik e kend, nyaka obed ng’at ma pache otegno maber. (Chakruok 2:24) Ber mondo ng’ato ohore nyaka okal “higni ma rowere thiewoe,” ma gin higni ma gombo mag nindruok ni malo ahinya ma nyalo miyo otim yiero mobam. (1 Jo-Korintho 7:36) Nyalo bedo marach ahinya ka Jakristo ma gombo kend odonjo e tim terruok mana nikech pok oyudo ng’ama owinjore kode!
APRIL 8-14
MWANDU MA YUDORE E WACH NYASAYE | 1 JO-KORINTHO 10-13
“Jehova En Ng’at Migeno”
Penjo Moa Kuom Josombwa
Jaote Paulo nondiko ni Jehova ‘ok obi weyo mondo otemwa mokalo ma wanyalo nanoe.’ (1 Kor. 10:13) Be mano koro nyiso ni Jehova yieroga motelo kit tembe mong’eyo ni wanyalo nanoe kae to oweyo mondo tembego oyudwa?
▪ Ne ane gimomiyo paro ma kamano ok owinjore. Owadwa moro ma wuode nodere nopenjore niya: ‘Dibed ni Jehova nosenono motelo moyudo ni kata ka wuodwa odere to an kaachiel gi jaoda wabiro mana nyagore gi wachno?’ Be en adier ni Jehova e ma chiko gik moko duto ma timore e ngimawa?
Ka wanono matut weche ma Paulo nondiko e 1 Jo-Korintho 10:13, waneno ni onge kamoro amora e Muma ma wacho ni Jehova ng’eyoga motelo tembe ma wanyalo nanoe kae to oweyo mondo tembego oyudwa. We wanon ane weche moko ang’wen manyiso gimomiyo wawacho kamano.
Mokwongo, Jehova nomiyo dhano mich ma jaber, ma en thuolo mar timo yiero. Jehova dwaro ni watim yierowa wawegi. (Rap. 30:19, 20; Jos. 24:15) Ka watimo yiero makare, to obiro tayowa e ngima. (Nge. 16:9) To ka watimo yiero ma ok kare ngimawa biro bedo marach. (Gal. 6:7) Ka dine bed ni Jehova e ma yiero ni en tem ma ne monego oyudwa, donge mano nyiso ni dine oketho ratiro momiyowa mar timo yiero?
Mar ariyo, nikech gik ma timore apoya nyalo yudo ng’ato ang’ata, Jehova ok bi geng’owa mondo gigo kik yudwa. (Ekl. 9:11) Bedo kama ok owinjore e sa ma ok owinjore nyalo miyo ng’ato oyud chandruok. Yesu nowuoyo kuom ji 18 moko ma notho nikech ot moro maduong’ nolwar kuomgi. Nowacho bende ni tho mar jogo ne ok en dwaro mar Nyasaye. (Luka 13:1-5) Omiyo, ok en gima owinjore wacho ni Nyasaye ng’adoga motelo ni en ng’a ma dhi tho, to en ng’a ma dhi kwo sama masira moro otimore.
Mar adek, ng’ato ka ng’ato kuomwa ni gi ting’ mar nyiso ni Nyasaye e ma ni gi ratiro mar bedo jaloch. Par ni Satan pod hango ni ji lamo Jehova nikech gik ma Jehova miyogi kendo ni ka giromo gi tembe to gibiro weyo makore kode. (Ayub 1:9-11; 2:4; Fwe. 12:10) Kapo ni Jehova ogeng’owa mondo kik wayud tembe moko mana nikech oneno ni ok wanyal nano e tembego, donge mano nyalo nyiso ni kare Satan nowacho adier?
Mar ang’wen, ok ochuno ni Jehova ong’e gik moko duto ma biro timorenwa e kinde ma biro. Bedo gi paro ni Nyasaye e ma yiero tembe monego oyudwa chalre achala gi wacho ni Jehova ong’eyo gimoro amora ma biro timore e ngimawa. Kata kamano, mano ok en puonj manie Ndiko. En adier ni Nyasaye ni gi nyalo mar ng’eyo gik ma biro timore e kinde ma biro. (Isa. 46:10) Kata kamano, Muma nyisowa ni Jehova ni gi ratiro mar yiero gik modwaro ng’eyo e wi kinde ma biro. (Cha. 18:20, 21; 22:12) Omiyo, Jehova oherowa kendo ohero gik makare, omiyo, ok odwar ketho mich ma jaber ma osemiyowa ma en thuolo wan-go mar timo yiero.—Rap. 32:4; 2 Kor. 3:17.
To kare ere kaka wanyalo winjo tiend weche ma Paulo nowacho ni: ‘Nyasaye ok bi weyo mondo otemwa mokalo ma wanyalo nanoe’? Paulo ne lero gima Jehova timo sama wakalo e tem moro to ok gima otimo kapok tem oyudowa. Weche ma jaoteno notiyogo miyo wabedo gadier ni kata bed ni wakalo e tem mane, Jehova oikore konyowa ka waketo genowa kuome. (Zab. 55:22) We wanon ane weche moko ariyo momiyo Paulo nowacho kamano.
Mokwongo, tembe ma wakaloe bende “yudo ji duto.” Mano tiende ni tembe ma yudowa osegayudo jomamoko bende. Mano nyiso ni wanyalo nano e tembe ma kamago ka wageno kuom Nyasaye. (1 Pet. 5:8, 9) Weche molworo ndiko mar 1 Jo-Korintho 10:13, nyiso ni Paulo ne wuoyo kuom tembe ma Jo-Israel noyudo ka ne gin e thim. (1 Kor. 10:6-11) Tembe duto ma Jo-Israel noyudo ne gin mana ma pile kendo joma nogeno kuom Jehova nonano e tembego. Kata kamano gima lit en ni Jo-Israel moko notamore winjo Jehova nikech ne giweyo mondo gombo maricho ochikgi ma giketho chike Nyasaye
Mar ariyo, “Nyasaye en ng’at migeno.” Gik ma Nyasaye notimo ne joge e kinde mokalo nyiso maler ni ohero “jogo mohere kendo momako chikne.” (Rap. 7:9) Gik ma notimogo nyiso ni en Nyasaye ma chopo singoge. (Jos. 23:14) Kaluwore gi gik ma Jehova notimo ne joge e kinde mokalo, mano miyo wabedo gadier e wi weche ariyo maluwogi: (1) Nyasaye ok bi yie mondo tem moro amora ma yudowa obed matek machop kama koro ok wanyal nano, to (2) ‘obiro losonwa yo mar wuok’ e tem.
Ere kaka Jehova loso ne joma ogeno kuome yo mar wuok e tem? En adier ni Jehova nyalo golonwa tem moro amora ma wakaloe. Kata kamano, Paulo nowacho ni Jehova ‘biro losonwa yo mar wuok mondo wabed gi nyalo mar nano.’ Omiyo, kinde mang’eny, Jehova “losonwa yo mar wuok” e tem kuom miyowa gik ma nyalo konyowa nano e yo maber. Ne ane yore moko ma Jehova tiyogo mondo olosnwa yo mar wuok e tem:
▪ Jehova “hoyowa e masichewa duto.” (2 Kor. 1:3, 4) Jehova nyalo hoyo pachwa kod chunywa kotiyo gi Wachne, roho maler, kod chiemb chuny ma jatich mogen miyowa.—Mat. 24:45; Joh. 14:16; Rumi 15:4.
▪ Onyalo tayowa kotiyo gi roho maler. (Joh. 14:26) Sama tem moro oyudowa, roho maler nyalo konyowa paro weche ma wasesomo e Muma to mano nyalo miyo wakaw okang’ mowinjore.
▪ Onyalo konyowa kotiyo gi malaikene.—Hib. 1:14.
▪ Onyalo konyowa kokalo kuom Jokristo wetewa ma biro hoyowa kokalo kuom wechegi mang’won kod gik mabeyo ma gibiro timonwa.—Kol. 4:11.
Weche ma Paulo nondiko e 1 Jo-Korintho 10:13 puonjowa ang’o? Jehova ok yier ni en tem mane monego oyudwa. Kata kamano, sama tem moro amora oyudowa, wach ma wanyalo bedogo gadier e ma: Ka wageno kuom Jehova gi chunywa duto, wanyalo bedo gadier ni onge tem moro amora ma yudowa ma biro tamowa nanoe. Obiro losonwa yo mar wuok mondo wanan e tem. To mago doko weche ma jiwowa!
Nono Puonj Manie Wach Nyasaye
w04-SW 4/1 29
Penjo Moa Kuom Josombwa
Ang’o momiyo 1 Jo-Korintho 10:8 wacho ni Jo-Israel 23,000 notho e thim e odiechieng’ achiel nikech tim mar terruok, to Kwan 25:9 wacho ni ne gin ji 24,000?
Nitie gik mang’eny ma nyalo miyo pogruogno obedie. Ma yot moloyo en ni nyalo bedo ni kwand jogo ne ni e dier 23,000 gi 24,000, omiyo, kondike e yo mikwano aluf-aluf, onyalo bedo 23,000 kata 24,000.
Ne ane gima chielo. Jaote Paulo nondiko gima notimore ne Jo-Israel ka ne gin Shittim-no kochiwo siem ne Jokristo ma ne ni Korintho ma ne en taon mopong’ gi timbe anjawo. Nondiko niya: “Kik wabed gi tim terruok, kaka moko kuomgi ne oterore mi ji 23,000 kuomgi ne otho e odiechieng’ achiel.” Paulo nowuoyo mana kuom ji 23,000 ma Jehova owuon e ma nonego nikech terruok.—1 Jo-Korintho 10:8.
Kwan sula mar 25 wacho ni “Israel noriwore gi Baal-peor: kendo mirimb Jehova ne ger kuom Israel.” Kae to Jehova nonyiso Musa mondo oneg “jo madongo mag ji.” Musa nonyiso jong’ad-bura mag Israel mondo e ma oneg jogo. Gikone, ka ne Finehas osekawo okang’ mapiyo mar nego Ja-Israel ma ne odonjo gi Nya-Midian e kama Jo-Israel nojotie, “gochno nogeng’.” Muma tieko leronwa wechego kowacho niya: ‘Joma notho e gochno ne kwan-gi 24,000.’—Kwan 25:1-9.
Nenore ni namba mochiw e bug Kwan oriwo “jo madongo mag ji” ma jong’ad-bura nonego kaachiel gi joma Jehova owuon e ma nonego. Nyalo bedo ni jong’ad-burago nonego jodongo 1,000, to mano e ma miyo kwanno donjo 24,000. Bed ni jodongogo noterore, kata ne gitimo nyasi ma jiwo terruok, kata ne gichiwo thuolo ne joma ne dwaro terore, gima duong’ en ni ne ‘ne giriwore gi Baal-peor.’
Buk moro ma lero weche Muma wacho ni wach molok kae ni ‘riwruok’ tiende nyalo bedo “makruok gi ng’ato.” Jo-Israel ne gin oganda ma nowalore ne Jehova, to ka ne ‘giriwore gi Baal-peor,’ ne giketho winjruok makende ma ne gin-go gi Nyasaye. Chiegni higni 700 bang’e, Jehova nowuoyo kuom Jo-Israelgo kokalo kuom janabi Hosea, kowacho kama: ‘Ne gibiro Baal-peor mi ne giwalore ne gir wich kuot, kendo ne gidwanyore mana kaka gima ne giherono.’ (Hosea 9:10) Ji duto ma nodonjo e tim marachno nowinjore gi kum mowuok kuom Nyasaye. Omiyo, Musa noparo ne Jo-Israel niya: ‘Wang’u oseneno gima ne Jehova otimo nikech wach Baal-peor, nikech jogo duto ma noluwo bang’ Baal-peor, Jehova Nyasachu notiekogi kendo gologi oko e kindu.’—Rapar mar Chik 4:3.
Penjo Moa Kuom Josombwa
Be nyaminwa onego oum wiye sama otayo puonjruok mar Muma ka en gi jalendo ma dichwo?
▪ “Penjo Moa Kuom Josombwa” ma yudore e Mnara wa Mlinzi ma Julai 15, 2002 nowacho ni nyaminwa onego oum wiye sama otayo puonjruok mar Muma ka en-gi jalendo ma dichwo, bed ni jalendo ma dichwono osebatisi kata pok obatisi. Kaluwore gi nonro mosetim e yo matut e wi wachni, dwarore ni otim lokruok moro mowinjore.
Kapo ni jalendo ma dichwo modhi gi nyaminwano e tayo puonjruok mar Muma en jalendo mosebatisi, nyaminwano biro umo wiye sama otayo puonjruogno. Timo kamano nyiso ni ochiwo luor ne chenro mar wich ma Jehova oketo e kanyakla mar Jokristo nikech otimo migawo ma owete e ma onego otim. (1 Kor. 11:5, 6, 10) Ka mano ok nyalre, nyaminwano nyalo kwayo owadwano mondo e ma ota puonjruogno ka owadwano owinjore timo kamano kendo ka onyalo.
Kapo ni nyaminwa odhi tayo puonjruok mar Muma to jalendo ma dichwo ma odhi godono pok obatisi to ok en chwore, onge wach moro e Ndiko ma nyiso ni nyaka oum wiye. Kata kamano, nitie nyimine moko ma chunygi nyalo yienegi tweyo otamba kata e sechego.
APRIL 22-28
MWANDU MA YUDORE E WACH NYASAYE | 1 JO-KORINTHO 14-16
“Nyasaye Nobed ‘Gik Moko Duto ne Ji Duto’”
w98-SW 7/1 21 ¶10
‘Ibiro Tiek Tho Chuth’
10 Sama 1 Jo-Korintho 15:24 wacho ni “gikone,” owuoyo kuom giko mar loch Kristo mar higni aluf achiel ka koro Yesu dwoko Pinyruoth e lwet Wuon-gi kendo Nyasache. (Fweny 20:4) Kindeno biro yudo ka dwaro ma Nyasaye nigo mar ‘choko gik moko duto kanyachiel e Kristo’ osetimore. (Jo-Efeso 1:9, 10) Motelo ne mano, Kristo biro ketho “loje duto gi telo duto kod teko” ma kwedo dwach Nyasaye. Mae ok timre mana e lweny mar Har–Magedon kende kae to orumo gi kanyo. (Fweny 16:16; 19:11-21) Paulo nowacho kama: ‘Kristo nyaka loch ka en ruoth nyaka chop kama Nyasaye biro keto wasike duto e bwo tiende. Kendo jasigu mogik ma en tho, ibiro tiek chuth.’ (1 Jo-Korintho 15:25, 26) Ee, chandruok duto ma richo Adam osebedo ka kelo kaachiel gi tho ibiro tiek chuth. Mano e momiyo Nyasaye biro chiero ji duto ma ni e raparne.—Johana 5:28, weche moler piny.
Kaka Pinyruoth Miyo Dwach Nyasaye Timore e Piny
21 To nade tho? En e gima ji te oluoro, kendo onyalo kadho gi ng’ato ang’ata sa asaya. En e jasikwa marach mogik. (1 Kor. 15:26) To be tieko tho en gima ohingo Jehova? Ne ane weche ma ne Isaya okoro: ‘Obiro golo tho nyaka chieng’, kendo Ruoth Nyasaye noywe pi wang’ kuom wenge duto.’ (Isa. 25:8) Parie apara kaka kindeno biro chalo ka koro onge liete, onge mochari, kendo onge pi wang’ ma chuer nikech lit ma tho kelo! Pi wang’ ma biro betie en mana mar mor lilo sama waneno ka Jehova chopo singone mar chiero jomotho! (Som Isaiah 26:19.) Ee, adhonde duto ma tho osekelo e chunywa biro chango chuth!
Kuwe mar Higini Gana Achiel Kadhi Nyime!
17 Onge weche mwanyalo tiyogo e yo maber manyiso kaka ngima nobedi bang’ higini gana achielgo moloyo weche mawacho niya, ‘Nyasaye nobed duto kuom duto.’ Tiend wechegi gin ang’o? Par ane chien kane Adam gi Hawa pod ne nie Eden, ne gin achiel kuom jood Jehova modak gi kuwe kendo gi winjruok maber. Jehova, ma en Jaloch e wi gik moko duto, ne locho achiel kachiel e wi chwechne duto, moriwo malaike koda dhano. Ne ginyalo wuoyo kode, lame, kendo yudo gweth mowuok kuome. Ne ‘obedo duto kuom duto.’
Nono Puonj Manie Wach Nyasaye
w12-SW 9/1 9, sanduk
Be Dibed ni Jaote Paulo Notamo Mon Wuoyo?
Jaote Paulo nondiko niya: “Mon mondo oling’ ei kanyakla.” (1 Jo-Korintho 14:34) Ang’o ma notemo wacho? Dibed ni nowacho ni mon ok riek? Ooyo. Donge kinde ka kinde nojawuoyo kuom mon ma ne puonjo maber! (2 Timotheo 1:5; Tito 2:3-5) E barua ma nondiko ne Jo-Korintho, ne ok onyiso mana mon kende mondo oling’ e i kanyakla, to nonyiso nyaka joma ne nigi mich mar dhum kod ma ne koro. (1 Jo-Korintho 14:26-30, 33) Nenore ni mon moko ma nobedo Jokristo ne oil ahinya gi yie manyien ma ne girwako, to mano ne miyo ging’adoga owete ma puonjo mondo gipenj penjo, mana kaka mon nohero timo e alworano. Mondo chochni kik bedie, Paulo nojiwo mon-go mondo “gipenj chwogi ka gin pacho.”—1 Jo-Korintho 14:35.
it-1-E 1197-1198
Del ma Ok Tow
Nikech joma biro locho gi Yesu bende ichiero kaka nochier Yesu, mano nyiso ni ichierogi ka gin chuech mag roho mondo giyud ngima mochwere ka gin gi del ma ok nyal tho kendo ma ok nyal tow. Ka ne gin e piny, ne gin gi del ma tow kendo ne gimakore gi Nyasaye. Mano e momiyo imiyogi del mar roho ma ok nyal tow, mana kaka Paulo wacho e 1 Jo-Korintho 15:42-54. Kuom mano, nenore ni sama Ndiko wacho ni Jokristo mowal biro yudo “del ma ok tho,” owuoyo kuom kit ngima ma gibedogo, ma en ngima mochwere kendo ma onge gima nyalo nego; to sama owuoyo kuom “del ma ok tow,” owuoyo kuom del ma Nyasaye miyogi ma onge gimoro amora ma nyalo ketho. Nenore ni Nyasaye miyogi nyalo mar siro ngimagi giwegi ma onge teko moro amora ma giyudo kuma chielo. Chuech mamoko to Nyasaye e ma siro ngimagi, gibed dhano, le, kata malaike. Mano nyiso ni Nyasaye ogeno joma biro locho gi Yesugo ahinya. Bedo ni gin gi nyalo mar siro ngimagi giwegi kendo ok ginyal tho ok nyis ni koro Nyasaye ok chikgi. Mana kaka Jatendgi ma Yesu Kristo, gin bende gibiro dhi nyime bolore ka gitimo dwach Wuon-gi kendo luwo kaka otayogi.—1Ko 15:23-28; som immortality; soul.
APRIL 29–MEI 5
MWANDU MA YUDORE E WACH NYASAYE | 2 JO-KORINTHO 1-3
“Jehova En ‘Nyasach Hoch Duto’”
“Ywaguru Kanyachiel gi Joma Ywak”
4 Jehova Wuonwa ma jang’wono bende nowinjo malit ka ne osiepene mogeno ahinya otho. Moko kuomgi ne gin Ibrahim, Isaka, Jakobo, Musa, kod Ruoth Daudi. (Kwan 12:6-8; Mat. 22:31, 32; Tich 13:22) Wach Nyasaye nyisowa ni Jehova gombo ahinya kinde ma obiro chierogie mondo gibed ma ngima kendo. (Ayub 14:14, 15) Jogo biro bedo ma mor kendo ngimagi biro bedo maber. Par bende ni wuod Nyasaye mohero ahinya kendo ‘ma nomorgo pile’ notho malit. (Nge. 8:22, 30) Lit ma Jehova nowinjo ok nyal wach wachre.—Joh. 5:20; 10:17.
“Ywaguru Kanyachiel gi Joma Ywak”
14 Omiyo, nenore maler ni nyalo bedo matek ng’eyo gima wanyalo wacho ne joma okuyo nikech wedegi otho. Kata kamano, Muma wacho ni ‘weche mag jo mariek kelo ngima.’ (Nge. 12:18) Ji mang’eny oseyudo weche ma beyo ma ginyalo hoyogo jomamoko e brosua mar Ka Ng’at Mihero Otho. Kata kamano, gima berie moloyo minyalo timo en ‘ywak gi jo ma ywak.’ (Rumi 12:15) Nyaminwa miluongo ni Gaby ma chwore notho wacho kama: “Ywak e ma osebedo ka konya. Mano e momiyo sama osiepega ywak koda awinjo ka chunya okuwe. Kinde kaka mago, anenoga ni kare nitie joma dewa.”
Nono Puonj Manie Wach Nyasaye
Penjo Moa Kuom Josombwa
“Singo” kod “alama” ma moro ka moro kuom Jokristo mowal gi roho yudo kowuok kuom Nyasaye gin ang’o?—2 Kor. 1:21, 22.
▪ Singo: Kaluwore gi buk moro, wach ma yudore e dho Grik ma nolok ni “singo” e bug 2 Jo-Korintho 1:22 ne en “wach mitiyogo e weche mag chike sirkal kata ohala.” Wachno tiende sie en “pesa mokwong chul, kata pesa momakgo gimoro ma chulo bath nengo mar gima iuso, kendo mano miyo ng’ato bedo gi ratiro e nyim sirkal ni gino en mare kata ni nitie winjruok ma ne otim adier.” Kuom Jokristo mowal, pokgi kata chudo margi mogik kaka oler e 2 Jo-Korintho 5:1-5 en bedo gi del mar polo. Pok margi bende oriwo yudo mich mar ngima ma ok nyal kethi.—1 Kor. 15:48-54.
E dho Grik masani, ipimo wachno gi tere ma wuowi miyoga nyako kosingone ni obiro kende. Mani en ranyisi mowinjore ahinya ne jogo mabiro bedo kaka chi Kristo e yor ranyisi.—2 Kor. 11:2; Fwe. 21:2, 9.
▪ Alama: Ndalo machon, ne iketoga alama kuom gimoro mondo onyis ni gino en mar ng’ato kata ni nitie winjruok moro mosetim e wi gino. Kuom wach Jokristo mowal, oseketnegi “alama” gi roho maler ni gin mwandu Nyasaye. (Efe. 1:13, 14) Kata kamano, alamano nyalo ruchore ka Jakristo mowalno ok ochung’ motegno nyaka e thone, kata ok ochung’ motegno nyaka kinde ma masira maduong’ chakoree.—Efe. 4:30; Fwe. 7:2-4.
w10-SW 8/1 23
Be Ing’eyo?
Ang’o ma jaote Paulo ne paro sama nowuoyo kuom “oganda ma wuotho gi mor ka joma oa locho”?
▪ Paulo nondiko kama: “Nyasaye . . . tayowa kanyachiel gi Kristo ka wan kaka oganda ma wuotho gi mor ka joma oa locho, kendo omiyo suya mang’ue mamit mar ng’eyo mare landore kuonde duto kokalo kuomwa! Nikech e wang’ Nyasaye, wan tik mang’ue mamit mar Kristo ne joma ireso kod joma ochomo kethruok; kuom joma ochomo kethruok, wan tik mar tho ma tero ji e tho, to kuom joma ireso wan tik mang’ue mamit mar ngima ma tero ji e ngima.”—2 Jo-Korintho 2:14-16.
Jaoteno ne paro tim ma Jo-Rumi ne nigo mar bago nyasi ma ji ne wuothoe e nderni ka gimiyo jatend lweny duong’ bang’ konyogi loyo jowasik Sirkal. E nyasi kaka mago, mwandu ma jolweny noyako kuom jowasikgi kod joma ne gimako e lweny ne iwuothogo e nyim ji kaachiel gi ruedhi ma ne idhi timgo misango, ka e sechego ji dendo jatend lweny kod jolwenyge. E giko wuodhno, ne itimo misango gi ruedhigo, kendo nenore ni ne ginego thoth joma ne gimako.
The International Standard Bible Encyclopedia wacho ni nenore ni ranyisi motigo mar “tik mang’ue mamit mar Kristo” e lero kaka jomoko yudo ngima to moko tho “ogol e tim ma Jo-Rumi ne nigo mar wang’o ubani e nyasi [ma ne ibago ka ji oa locho e lweny].” Omedo ni “suya ma ne nyiso ni jolweny ne olocho ne paro ne joma ne gimako e lweny ni tho nochomogi.”