Nonro mag Chenro mar Chokruok mar Ngimawa kod Tijwa
© 2024 Watch Tower Bible and Tract Society of Pennsylvania
JANUAR 6-12
MWANDU MA YUDORE E WACH NYASAYE ZABURI 127-134
Jonyuol, Dhiuru Nyime Rito Mwandu Makende ma Jehova Omiyou
Kaw Mapek Migawo Mari e Od Jehova
9 Jehova osemiyowa nyalo mar nyuolo nyithindo, kaachiel gi ting’ mar puonjo nyithindogo mondo ohere kendo otine. Ka po ni in janyuol, be igoyoga ne Jehova erokamano kuom mich makendeno? Kata obedo ni Jehova osemiyo malaike nyalo mabeyo miwuoro, ne ok omiyogi migawo mar nyuolo nyithindo. Omiyo, ka po ni in janyuol, bed mamor gi thuolo makende ma in-go mar pidho nyithindo. Osemi jonyuol ting’ makende mar pidho nyithindgi ka ‘girieyogi kendo puonjogi kaka Jehova dwaro.’ (Efe. 6:4; Rap. 6:5-7; Zab. 127:3) Riwruok mar oganda Jehova osemiyo jonyuol gik mang’eny mondo okonygi puonjo nyithindgi. Gigo oriwo buge, vidio, thumbe, kaachiel gi weche mamoko ma yudore e websaitwa. Kuom adier, Wuonwa manie polo kod Wuode ohero nyithindwa ahinya. (Luka 18:15-17) Sama jonyuol ogeno Jehova kendo gitimo kinda mondo gipidh nyithindgi e yo maber, Jehova bedoga mamor ahinya. Kendo jonyuol ma timo kamano konyoga nyithindgi mondo gibed gi geno mar bedo nyithind Jehova nyaka chieng’!
Jonyuol—Tieguru Nyithindu Mondo Giher Jehova
20 Tem ng’eyo nyithindi e yo maber. Zaburi 127 pimo nyithindo gi aserni. (Som Zaburi 127:4) Mana kaka aserni inyaloga los gi gik mopogore opogore kendo moko tindo to moko dongo, e kaka nyithindo be ok nyal chalore te e ot. Omiyo, jonyuol onego ong’e tiegruok ma ber gi nyathi ka nyathi. Owadwa moro gi chiege ma ni e piny Israel ma notiego nyithindgi ariyo e yo maber lero gima nokonyogi. Giwacho kama: “Ne wapuonjoga nyathi ka nyathi Muma yore.” Wiye udi nyalo yiero ka be dwarore ni giti gi yorno e puonjo nyithindgi kata ooyo.
Puonj Manie Wach Nyasaye
it-1-E 543
Yiende ma Muma Wuoye
Jandik zaburi nowuoyo e wi yadh zeituni ka ne owacho gik ma Jehova osingo ne joma oluore. Nondiko niya: “Yawuoti nochal gi mzabibu matindo tindo molworo mesani.” (Za 128:1-3) Kete matindo mong’ad e yadh zeituni motegno e ma thothne ichuoyoga e lowo mondo odongi. Bende, yiende matindo tindo mag zeituni nyaloga chako twi e tiend yadh zeituni motegno. Mana kaka zeituni matindo moloth molworo yadh zeituni maduong’, e kaka yawuowi ne lworoga wuon-gi to mano ne kelo mor ne joot.
JANUAR 13-19
MWANDU MA YUDORE E WACH NYASAYE ZABURI 135-137
“Ruodhwa Duong’ Moloyo Nyiseche Mamoko Duto”
it-2-E 661 ¶4-5
Teko, Tije ma Nyiso Teko
Nyasaye chiko teko mag chuech e yo makende. Jehova osenyiso ni en Nyasaye madier kuom chiko teko mag gik ma nochueyo, kendo otimoga kamano kong’eyo ni yo ma otiyogo gi tekone otudore gi nyinge. (Za 135:5, 6) Chieng’, dwe, planet mopogore opogore, sulwe, kaachiel gi kor lwasi (moriwo teko mar yamo, koth, kod gik mamoko) luwoga yoregi moseketnegi. Winy gi dede bende darga ka gia kamoro achiel ka gidhi komachielo. Gigo duto kaachiel gi gik mamoko ma luwo chike moseketnegi, ok nyal keto nying Nyasaye obed maler sama ikwede kata sama ipime gi nyiseche manono.
Kata kamano, Jehova Nyasaye nyalo tiyo gi teko mag gik ma nochueyo e timo gik mopogore opogore mondo onyisgo ni en e Nyasaye madier; thothne otimoga kamano e kinde ma en owuon oketo. Jehova ne nyalo tiyo gi oro, kodh yamo maduong’, kata gik machal kamago e chopo wechene ma nokoro. Nonyalo kelo gik ma kamago sa asaya ma nodwaro. (Pim gi 1Ru 17:1; 18:1, 2, 41-45.) Thothne, gigo ne bedo makende nikech ne ginyalo biro mang’eny kata kuom kinde malach, (Wuo 9:24) kata nikech ne ginyalo biro e kinde ma ji ne ok par.—Wuo 34:10; 1Sa 12:16-18.
Ere Kaka Hera Mosiko mar Jehova Nyalo Konyi?
16 Sama waketo Jehova obedo kar bwokwa, ok wabedga maluor. Kata kamano, nitie kinde ma pod chunywa nyaloga nyosore. E kinde kaka mago, Jehova timoga ang’o mondo okonywa? (Som Zaburi 136:23.) Omakowaga gi bedene kendo ochungowa mos. (Zab. 28:9; 94:18) Kaka mano konyowa: Ng’eyo ni Jehova biro konyowa kinde duto, miyowa gueth moko ariyo. Mokwongo, wan gi kar bwok maber kata bed ni wadak kanye ariyo, Wuonwa manie polo dewowa ahinya.
Puonj Manie Wach Nyasaye
it-1-E 1248
Jah
Thothne, nyingno itiyogago sama idwaro ni ji opak Nyasaye gi chunygi duto sama giwer, gilamo, kendo gisayo. Kinde mang’eny itiyoga kode bang’ locho, kata resruok, kata sama iwuoyo kuom lwet Nyasaye ma nigi teko. Muma tiyo gi wachno kuonde mang’eny. Kuom ranyisi, “Pakuru Jah” (Haleluyah) gin weche ma itiyogo e pako Nyasaye e bug Zaburi kendo ohang ti kodgi e Zaburi 104:35. Zaburi moko chakoga gi wechego (Za 111, 112), moko tiyo kodgi e igi ka dichiel (135:3), to moko tiyo kode e gikogi (Za 104, 105, 115-117), kata kamano, thothne itiyoga gi wechego sama ichako kata itieko zaburi moro (Za 106, 113, 135, 146-150). E bug Fweny, malaike pakoga Jehova gi wechego nyading’eny.—Fwe 19:1-6.
Kuonde mamoko itiyoe gi “Jah” kipako Jehova gi wende kata e lamo mag sayo. Achiel kuomgi en wend resruok ma Musa nowero bang’ ka noseresgi. (Wuo 15:2) Bug Isaya jiwoga wachno kuom tiyo gi nyingego duto kanyachiel, tiende ni, “Jah Jehova.” (Isa 12:2; 26:4) Ka ne Hezekia ohewore kendo nochiegni tho, Nyasaye nochange e yor hono. Bang’ ka nosechange, nopako Jehova gi wer konwoyo nyinge machuok mar Jah. (Isa 38:9, 11) Muma wacho ni jomotho ok nyal pako Jah, to joma ngima e ma nyalo dhi nyime pake. (Za 115:17, 18; 118:17-19) Zaburi mamoko to tiyo gi wachno sama igoyo ne Nyasaye erokamano kuom reso ji, ritogi, kendo rieyogi.—Za 94:12; 118:5, 14.
JANUAR 20-26
MWANDU MA YUDORE E WACH NYASAYE ZABURI 138-139
Kik Iwe Luoro Omoni Pako Jehova e Chokruok
Pak Jehova e Chokruok
10 Be iwinjoga ka adundoni guecho matek sa asaya ma idwa ting’o badi mondo ichiw paro e chokruok? Ka en kamano, ng’e ni ok in kendi. Thothwa bedoga gi luoro moko sama wadwaro chiwo paro. Ka pok ing’eyo kaka inyalo loyo luorono, dwarore ni ikwong ing’e gima kele. Dibed ni iluor ni wiyi biro wil gi gima idwa wacho, kata iluor ni inyalo wacho gima ok owinjore? Dibed ni chunyi chandore ni ok ibi chiwo dwoko maber kaka jomoko? Parie ni bedo gi luoro ma kamago nyiso ni in Jakristo maber! Nikech ang’o? En nikech luorogo nyiso ni in ng’ama obolore kendo ma neno ni jomamoko oloye gi ber. Mano kido ma Jehova morgo. (Zab. 138:6; Fil. 2:3) Kata kamano, Jehova dwaro ni ipake kendo ijiw owete gi nyimine e chokruok. (1 The. 5:11) Oheri kendo obiro miyi chir ma dwarore.
Wajiwreuru e Chokruogewa mag Kanyakla
7 Inyalo nono sula moko mokalo mag Ohinga mar Jarito mosegawuoyo e wi wachno. Kuom ranyisi, achiel kuom weche mosegajiwnwa en ni waikre maber ne chokruok. (Nge. 21:5) Kaka imedo lony gi weche manie sula ma idhi non, e kaka ibiro medo bedo thuolo chiwo paro. Bende, chiw paro machuok. (Nge. 15:23; 17:27) Chiwo paro machuok dwokoga luoro chien. E wi mano, nyalo bedo mayot ne owete gi nyimine paro dwoko mochiw e yo machuok, kar dwoko ma rabora ma nigi weche mang’eny. Sama igolo paro machuok mowuok e chunyi kendo kitiyo gi wecheni iwuon, inyiso ni iikori maber kendo ni sulano odonjoni malong’o.
Puonj Manie Wach Nyasaye
it-1-E 862 ¶4
Weyo Ketho; Ng’wono ne Jomamoko
E wi mano, Jakristo nigi ting’ mar weyo ne jomamoko kethogi kata ka gikethone nyading’eny. (Luk 17:3, 4; Ef 4:32; Kol 3:13) Nyasaye ok nyal ng’wono ne joma odagi weyo ne jowetegi kethogi. (Mat 6:14, 15) Kata mana “ng’at marach” ma ogol e kanyakla mar Jokristo nikech otimo richo maduong’, bende inyalo ng’wonne ka onyiso ni oseloko chunye gadier. Bang’ mano, ji duto e kanyakla nyalo nyiso ni gihere. (1Ko 5:13; 2Ko 2:6-11) Kata kamano, ok ochuno ni Jokristo ong’won kata owe ne joma ohero timo richo goyiem kendo ma ok oikore loko chunygi. Joma kamago bedo wasik Nyasaye.—Hib 10:26-31; Za 139:21, 22.
JANUAR 27–FEBRUAR 2
MWANDU MA YUDORE E WACH NYASAYE ZABURI 140-143
Tim Kaluwore gi Kwayoni Bang’ Lemo
‘Winj Weche mag Jo Mariek’
13 Ne siem kaka yo ma Nyasaye nyisogo ni oheri. Jehova dwaronwa mana ber lilo. (Nge. 4:20-22) Sama orieyowa kotiyo gi Wachne, bugewa ma lero Muma, kata Jakristo moro motegno, onyisowaga mana kaka oherowa. Jo-Hibrania 12:9, 10 wacho ni ‘otimo kamano mondo wayud ber.’
14 Ket pachi kuom siem, to ok yo mochiwego. Nitie sama wanyalo neno ni ok omiwa siem moro e yo maber. En adier ni ng’ato ang’ata ma rieyo nyawadgi dwarore ni otem matek mondo ochiw siem e yo ma ng’at morieyono nyalo rwako e yo mayot. (Gal. 6:1) Kata kamano, ka po ni wan e ma irieyowa, ber ka waketo pachwa kuom siem mimiyowa, kata obedo ni samoro wanyalo neno ni ok ochiwe e yo maber. Inyalo penjori kama: ‘Kata obedo ni ok amor gi yo mochiwgo siemno, be nitie gimoro amora ma anyalo puonjora e siemno? Be anyalo golo pacha kuom nyawo mag ng’at momiya siemno kendo keto pacha kuom ber ma adhi yudo ka aluwo siemno?’ Wanyalo yudo ber mathoth ka warwako siem moro amora momiwa.—Nge. 15:31.
Siki gi “Ler mar Chuny” e Ndalo Matekgi
Joma kwedowa, chandruok mag yuto, tuoche ma korgi tek, osenyoso ahinya chuny jomoko ma gin jotich Nyasaye. Nitie kinde ma gin bende chunygi osechandore. Kata mana Ruoth Daudi nokalo e pek ma kamago mowacho niya: ‘Chunya ool; chunya otamore hore.’ (Zab. 143:4) Ang’o ma ne okonye loyo pek ma kamago? Daudi noparo kaka Jehova ne timo ne jotichne, koda kaka en owuon Jehova ne orese. Noparo matut kuom gigo ma Jehova nosetimo nikech nyinge maduong’. Daudi ne budho koparo kuom tije mag Nyasaye. (Zab. 143:5) E yo machalo kamano, paro matut kuom Jachwechwa koda kuom duto mosetimo gi mago modhi nyime timonwa, biro konyowa sama wan e bwo tem.
Be Kendruok “Mana Kuom Ruoth” Pod Nyalore?
Seche moko inyalo winjo kaka Daudi jandik-zaburi nowinjo ka nowacho niya: “A Jehova, reti idwokna wach; chunya onyosore: Kik ipandna wang’i.” (Zab. 143:5-7, 10) E kinde miwinjo kamano e chunyi, mi Wuonu me polo thuolo mar nyisi gima doher mondo itim. Inyalo timo kamano kikawo kinde mar somo Muma kendo paro matut kuom gigo ma isomo. Ibiro ng’eyo chikene kendo ibiro neno kaka nokawo okang’ mar rito jotichne e kinde machon. Kuom chikone iti, ibiro medo bedo gi jing’o kendo ibiro nyiso ni iriek nikech iluwo chikene.
Puonj Manie Wach Nyasaye
it-2-E 1151
Sum
Kaka Itiyo Kode e Yor Ranyisi. Miriambo ma joma richo wacho inyalo pim gi sum mar thuol nikech giketho nying ng’at ma giwuoyo kuome marachno. (Za 58:3, 4) Muma wacho kama e wi joma ketho nying jowetegi: “Dhogi nigi sum mar thuol.” (Za 140:3; Rum 3:13) Joma tiyo gi lewgi e ketho nying jomamoko, e kuoth, e puonjo miriambo, kata wacho weche maricho kaka mago, “opong’ gi sum ma nyalo neko.”—Jak 3:8.
FEBRUAR 3-9
MWANDU MA YUDORE E WACH NYASAYE ZABURI 144-146
‘Jo Mamor Gin Joma Nyasachgi En Jehova!’
Penjo Moa Kuom Josombwa
2. Wach manyien motigono winjore maber gi weche mamoko ma yudore e sulano duto. Wach motigo ni “e ka” e chakruok mar kwan matindo 12 nyiso ni gueth miwuoye e kwan matindo 12 nyaka 14 gin mag joma kare ma kwayo ni oresgi e lwet joma richo (kwan matindo 11). Notim lokruok mowinjore bende e kwan matindo 15 kama otiye gi wach mar “joma mor” nyadiriyo e yo machal. Nikech mano, e kuonde ariyogo duto joma bedo ma mor gin joma “Nyasachgi en Jehova!” Gima onego wapar en ni dho-Hibrania ma nokwong ndikgo Muma ne onge gi alama mag somo. Omiyo, joma ne loko Muma nyaka ne ng’e tiend wach e yo maber, kaka ne indiko shairi mag dho-Hibrania, weche molworo ndiko moro, kod ndiko mamoko motudore gi wachno.
3. Wach manyien motigono winjore maber gi ndiko mamoko e Muma ma wuoyo kuom singo mag Nyasaye ne jotichne mohere. Ka luwore gi kaka olok tiend asher e yo manyienno, weche manie ndikono sani koro nyiso e yo maler geno ma Daudi ne nigo ni Nyasaye ne dhi reso Jo-Israel kuom jowasikgi, nodhi guedhogi, kendo miyogi ngima maber. (Lawi 26:9, 10; Rap. 7:13; Zab. 128:1-6) Kuom ranyisi, Rapar mar Chik 28:4 wacho kama: “Nogwedh nyak mar ringri, kod nyak mar lopi, kod nyak mar jambi madongo, gi medruok mar dhogi, kod nyithi rombe magi.” Kuom adier, e kinde loch mar wuod Daudi ma Solomon, Jo-Israel nobedo gi kuwe kod ngima maber. E wi mano, loch mar Solomon ne nyiso kaka loch mar Mesia ne dhi chalo.—1 Ru. 4:20, 21; Zab. 72:1-20.
Med Tego Genoni Kaka Jakristo
16 Geno ma wan-go mar ngima ma nyaka chieng’ en mich ma jaber moa kuom Nyasaye. Wan gadier chuth gi genono. Genono chalo gi nanga ma konyowa chung’ motegno sama wanano e bwo tembe, sama wakalo e sand, kata sama tho ochomowa. Bende, genono chalo gi ogudu ma rito pachwa mondo okonywa kwedo gik maricho kendo makore gi gik makare. Geno ma wan-gono miyo wasudo machiegni gi Nyasaye kendo waneno maler kaka Nyasaye oherowa. Sama watego geno ma wan-go, wayudo ber lilo.
17 E barua ma jaote Paulo nondiko ne Jo-Rumi, nojiwogi kama: “Moruru nikech geno.” (Rumi 12:12) Paulo ne nyalo bedo mamor nikech ne en gadier ni ka nodhi nyime makore motegno gi Nyasaye, ne odhi yudo ngima ma nyaka chieng’ e polo. Wan bende, wanyalo bedo mamor gi geno ma wan-go nikech wan gadier ni Jehova biro chopo singoge. Mana kaka jandik-zaburi nondiko, “ng’at mamor en ng’at . . . mogeno Jehova Nyasache, ma . . . en ja adiera kinde duto.”—Zab. 146:5, 6.
En Hera Mane Makelo Mor Madier?
19 Kata obedo ni dhano osebedo ka chandore e bwo loch Satan kuom higni 6,000, gima ber en giko mar loch Satan koro osekayo machiegni. Piny opong’ gi joma oherore giwegi, mohero pesa, kendo mohero mor mar piny. Gidich mana gi gik ma konyogi giwegi kendo ok gidew jomamoko. Joma kamago ok nyal bedo ma mor gadier. Jandik zaburi nowacho gima nyalo kelo mor madier ka nowacho niya: “Ojahawi jalo man gi Nyasach Yakobo kaka jakonyne, ma geno kuom Jehova Nyasache.”—Zab. 146:5.
20 Jotich Jehova medo here kendo higa ka higa ji mathoth biro mondo otine nikech gihere. Mano en gima nyiso maler ni Pinyruodh Nyasaye sani locho kendo machiegnini obiro kelo gueth mogundho e piny. Wanyalo bedo ma mor gadier mana ka watimo dwach Nyasaye kendo ka wang’eyo ni wamore. Joma ohero Jehova gadier biro bedo ma mor nyaka chieng’! E sula ma luwo, wabiro neno kido moko maricho ma joma oherore giwegi bedogo kod kaka mano opogore gi kido mabeyo ma jotich Jehova nigo.
Puonj Manie Wach Nyasaye
it-1-E 111 ¶9
Le
Muma puonjo ni onego warit le e yo makare kendo mang’won. Jehova en Jachiwo ma Jahera kendo omiyo le gik moko duto ma gidwaro. (Nge 12:10; Za 145:15, 16) Chik Musa ne dwaro ni orit jamni e yo maber. Le molal ne nyaka duok ne wuon-go, kendo le ma oyud ka ogore piny gi osigo ne nyaka kony. (Wuo 23:4, 5) Ne ok onego osandgi e yo moro amora. (Rap 22:10; 25:4) Le bende ne nyaka yue e kinde Sabato mana kaka dhano ne yueyo e kindego. (Wuo 20:10; 23:12; Rap 5:14) Le makwiny kata ma ne nyalo hinyo ji ne nyaka tue kata negi. (Cha 9:5; Wuo 21:28, 29) Le ne onego onyuolre mana gi kit le machal kode.—Law 19:19.
FEBRUAR 10-16
MWANDU MA YUDORE E WACH NYASAYE ZABURI 147-150
Nitie Gik Mathoth Mamiyo Wapako Jehova
Ang’o Momiyo Onego Wapak Jehova?
5 Kata obedo ni Jehova nohoyo ogandano duto, notimo kamano bende ne ng’ato ka ng’ato. Pod otimo kamano kata e kindegi. Jandik zaburi nowacho kama kuom Nyasaye: “Ochango jo ma chunygi otur, kendo oboyo ringregi kohiny.” (Zab. 147:3) Kuom adier, Jehova dewo kendo konyo jogo duto ma chandore, bed ni tuoche kata parruok e ma chandogi. E kindegi bende, Jehova oikore hoyowa kendo kweyo chunywa mondo kik wabed gi parruok mang’eny. (Zab. 34:18; Isa. 57:15) Omiyowa rieko kod teko mondo wanyagre gi chandruoge ma waromogo.—Jak. 1:5.
6 Jandik zaburi chako wuoyo e wi chuech manie polo kowacho ni Jehova ‘kwano kar romb sulwe’ kendo “ochakogi giduto nyingegi.” (Zab. 147:4) Ang’o momiyo oweyo weche mag Jo-Israel kae to ochako wuoyo kuom chuech manie polo? Par ane wachni: Jandik zaburi ne nyalo neno sulwe mang’eny e polo, en mana ni ne ok ong’eyo kwan-gi. Kuom higni mathoth ma osekalo, kwan mar sulwe ma wang’ dhano nyalo neno osemedore ahinya. Jomoko paro ni nitie sulwe bilionde mang’eny e galaksi mar Milky Way kende. To nyalo bedo ni nitie galaksi trilionde mang’eny! Wan wawegi ok wanyal kwano sulwe! Kata kamano, Jachuech to miyo sulwe ka sulwe nyinge. Mano nyiso ni Jehova ong’eyo sulwe ka sulwe. (1 Kor. 15:41) To be ong’eyo dhano duto ma nochueyo e yo ma kamano? Mana kaka Nyasaye ong’eyo kama sulwe ka sulwe nitie seche duto, e kaka ong’eyi in iwuon. Mano nyiso ni ong’eyo kama intie, kaka iwinjo e chunyi, kod gima iremo e sa asaya!
Ang’o Momiyo Onego Wapak Jehova?
7 Jehova oheri, ong’eyo chandruoge ma in-go, kendo oikore tiyo gi tekone mondo okonyi e chandruogego. (Som Zaburi 147:5.) Seche moko inyalo neno ni chandruok ma in-go pek ahinya kendo ni obembi ma onge kaka ditim. Nyasaye ong’eyo kama tekowa nyalo chopee nikech ong’eyo ni ‘wan mana buch lowo.’ (Zab. 103:14) Nikech wan dhano morem, wanyalo timo gimoro marach nyadinwoya. Wanyalo winjo marach nikech samoro wawacho gima ok owinjore, samoro wan-gi gombo moko maricho ma bironwa kinde ka kinde, kata wan gi nyiego nikech gik ma jomoko nigo. Kata obedo ni Jehova ok nyal timo gik ma kamago, ong’eyowa e yo matut!—Isa. 40:28.
Ang’o Momiyo Onego Wapak Jehova?
18 Jandik zaburi nong’eyo maler kaka Nyasaye nohero jotichne. Gin e oganda kende ma Nyasaye nomiyo “wachne” kaachiel gi ‘chikene kod buchene mong’ado.’ (Som Zaburi 147:19, 20.) E kindegi, wan joma oguedhi nikech wan kendwa e ma iluongowa gi nying Nyasaye e piny ma ngima. Nikech wang’eyo Jehova kendo waluwo kaka Wachne tayowa e ngimawa, mano e momiyo wan gi winjruok maber kode. Mana kaka jandik Zaburi sula mar 147, donge ineno ka nitie gik mang’eny momiyo onego wakog gi dwol maduong’ ni “Pakuru Jehova” kendo jiwo jomamoko bende mondo otim kamano?
Puonj Manie Wach Nyasaye
it-1-E 316
Winy
Jandik zaburi nojiwo winy mondo gipak Jehova (Za 148:1, 10), kendo gitimoga kamano kokalo kuom yo makende mochuegigo. Winyo nyalo bedo gi yier maromo 1,000 kata mokalo 20,000 e dende. Yier achiel kende nigi gimoro moringo e diere ma nigi bede matindo tindo. Bede matindo tindogo bende nigi bede moko e igi mang’eny. Yier achiel kende mar akuru ma dirom inj auchiel nyalo ting’o bede matindo tindo milionde modhuro. Yo makende ma olosgo buomb winyo oloyo mabor ndege ma iye ogajore kendo ma nyasani. Nikech chok winy nigi buche e diergi, mano miyo gibedo mayot. Kuom ranyisi, winyo moro miluongo ni frigate ma buombe romo fut 7 koa konchiel nyaka komachielo, en mana gram 110 kende. Nitie winy moko ma chokegi dongo kendo ma buombegi nigi leche ma sirogi mana kaka bepe ma siro tado.
FEBRUAR 17-23
MWANDU MA YUDORE E WACH NYASAYE NGECHE 1
Un Rowere, En Ng’ano ma Ubiro Winjo?
Kik Iyie Mondo Gimoro Amora Omoni Yudo Mich
16 Nade ka in rawera to ineno ni jonyuolni ma Jokristo oridoni ngima ahinya? Chunyi nyalo chandore ma ipo ka ichako paro ni tiyo ne Jehova ok ber. Ka irwako paro ma kamano mi iweyo tiyo ne Jehova, ibiro ywak ahinya nikech ibiro fwenyo mapiyo ni onge ng’ato ang’ata ma nyalo heri gadier e pinyni mopogore gi Joneno mag Jehova kod jonyuolni moluoro Jehova.
17 Ka janyuolni pok nokweriga wach moro kata miyi kum, donge inyalo wuoro ka be giheri adier? (Hib. 12:8) Samoro nyalo bedo ni yo ma jonyuolni rieyigo e ma ok mori. Ka en kamano, tem kik itamri luwo kaka gichiki mana nikech ok imor gi yo ma gitimogo kamano. Tem matek mondo pachi oyie ni nyaka bedie ni nitie gimomiyo gitemo rieyi. Kik imin kodgi wach, kendo kik iyi wang’ mokalo tong’. Muma wacho kama: ‘Ng’ama rito dhoge en ng’a mong’eyo; kendo ng’ama chunye ng’ich en ng’at ma weche donjone.’ (Nge. 17:27) Tem ahinya mondo ibed ng’at mochwiny ma ka omiyi siem to irwako e yo mamuol ma ok iketo pachi ahinya kuom yo mochiwgo siemno. (Nge. 1:8) Bedo gi jonyuol ma ong’eyo Jehova en gueth maduong’ ahinya. Gibiro konyi kedo mondo ibi iyud mich mar ngima.
w05-SW 2/15 19-20 ¶11-12
Rit Nying Maber ma Wan-go Kaka Jokristo
11 Tim gik ma moro Nyasaye to ok dhano. Waduto wagomboga ni ong’ewa e yo moro, kuom ranyisi, wanyalo gombo ni ong’ewa kaka joma nie grup moro. Waduto wadwaroga bedo gi osiepe, kendo mano miyo wawinjo maber. E kinde ma rowere thiewoe to kata mana bang’e, aola mag mbese bedoga motegno to mano miyo gikopo gik ma jowetegi timo mondo gimorgi. Kata kamano, osiepewa kod mbesewa seche moko ok bi dewowa gadier ka giketo dwachwa obedo motelo ne maggi. Samoro gidwaro mana joma giriworego e timo gik maricho. (Ngeche 1:11-19) Sama Jakristo moro ochako timo gik maricho ma mbesene timo, thothne obiro temo pando ni en Jakristo. (Zaburi 26:4) Jaote Paulo nochiwo siem niya: “Kik utim gik moko kaka joma olworou timo”. (Jo-Rumi 12:2, The Jerusalem Bible) Jehova miyowa teko ma dwarore mondo wakwed timbe maricho mag joma olworowa.—Jo-Hibrania 13:6.
12 Sama mbesewa thung’owa ni watim gik maricho ma nyalo ketho nying maber ma wan-go kaka Jokristo, ber paro ni makruokwa motegno gi Nyasaye duong’ moloyo paro ma ji mathoth nigo. Puonj ma yudore e Wuok 23:2 nyalo konyowa ahinya. Owacho kama: “Kik itim gima rach mana nikech ji mang’eny timo.” Ka ne thoth Jo-Israel oketo kiawa e wi nyalo ma Jehova nigo mar chopo singo, Kaleb nochung’ kar tiende. Ne en gadier chuth ni singo mag Nyasaye inyalo gen kendo noguedhe nikech nomakore motegno gi Nyasaye. (Kwan 13:30; Joshua 14:6-11) Be iikori kwedo aola mag mbeseni mondo irit winjruok maber ma in-go gi Nyasaye?
Puonj Manie Wach Nyasaye
it-1-E 846
Ng’at Mofuwo
Sama Muma tiyo gi wachno, owuoyoga kuom ng’at ma timbene ok luwre gi chike makare mag Nyasaye, to ok ng’at ma ok par malong’o. E dho Hibrania, nitie weche mopogore opogore ma itiyogo kiwuoyo kuom ng’at ma kamano. Moko kuomgi gin kesilʹ (‘ng’at mofuwo’; Nge 1:22), ʼewilʹ (“ng’at mofuwo”; Nge 12:15), na·valʹ (‘ng’at mofuwo’; Nge 17:7), kod lets (“jasunga”; Nge 13:1). E dho Grik, weche kaka aʹphron tiende en “ng’at mofuwo” (Luk 12:20), a·noʹe·tos tiende en ng’at “ma onge rieko” (Gal 3:1), to mo·rosʹ tiende en “mofuwo” kata ‘ng’at mofuwo’ (Mat 23:17; 25:2).
FEBRUAR 24–MACH 2
MWANDU MA YUDORE E WACH NYASAYE NGECHE 2
Ang’o Momiyo Onego Itim Puonjruok Mari gi Chunyi Duto?
“Dhi Nyime Wuotho e Adiera”
16 Thothwa ok oheroga somo kata puonjruok. Kata kamano, Jehova nyisowa ni wasik ka ‘wamanyo adiera kendo wamanye gi kinda,’ mondo wamed winjo tiend adiera e yo matut. (Som Ngeche 2:4-6.) Sama watimo kinda kamano, wan e ma wayudoga ber. Owadwa moro ma nyinge Corey wacho ni sama osomo Muma, oketoga pache duto e wes achiel ka pok odhi e wes machielo. Owacho kama: “Asomoga weche moler piny, ndiko motudore gi wes ma asomono, kendo atimoga nonro momedore. Puonjruok e yo ma kamano miyo apuonjoraga weche mathoth ahinya!” Bed ni watiyo gi yo kaka mano e puonjruok kata watiyo gi yo machielo, sama waketo thuolo tenge kendo watimo kinda mondo wapuonjre adiera e yo matut, wanyiso ni waneno adiera kaka gima duong’.—Zab. 1:1-3.
“Rieko Madier Kok Matek”
3 Rieko en nyalo mar tiyo gi gik ma wasepuonjore e timo yiero mabeyo. Kata kamano, rieko madier oriwo gik mang’eny. Muma wacho kama: “Luoro Jehova e chakruok mar rieko, kendo ng’eyo Ng’at Maler Moloyo, e winjo tiend wach.” (Nge. 9:10) Omiyo, sama dwarore ni watim yiero moro maduong’, onego wayie mondo pach Jehova, tiende ni ‘ng’eyo mar Ng’at Maler Moloyo’ e ma mondo otawa. Wanyalo timo kamano kuom nono puonj ma yudore e Muma kod bugewa ma lero Muma. Sama watimo kamano, wanyiso ni wan gi rieko madier.—Nge. 2:5-7.
4 Jehova kende e ma nyalo miyowa rieko madier. (Rumi 16:27) Ang’o momiyo en e Soko mar rieko madier? Mokwongo, en e Jachuech, omiyo ong’eyo chuechne maber ahinya. (Zab. 104:24) Mar ariyo, gik moko duto ma Jehova timoga nyiso rieko. (Rumi 11:33) Mar adek, rieko mar Jehova keloga ber ne joma tiyo gi riekono. (Nge. 2:10-12) Ka wadwaro nyiso ni wan gi rieko madier, nyaka wayie mondo weche adekgo ota yierowa kod timbewa.
Un Rowere, Teguru Yie Maru
2 Kapo ni in rawera ma tiyo ne Jehova, kata pod ipuonjori e wi Jehova, be iyudoga ka seche moko idwaro ni iyie gi puonj mar ni gik moko nosieko kendgi kar keto yie mari kuom Jachuech? Ka en kamano, nitie okenge minyalo kawo mondo iteg yie mari. Achiel kuom okengego en tiyo gi rieko ma Nyasaye nomiyi mar pogo weche ma yore yore kendo riekono biro konyi. Riekono biro riti kuom puonj mag jopiny ma nyalo ketho yie mari.—Som Ngeche 2:10-12.
3 Yie madier otenore kuom ng’eyo Nyasaye e yo makare. (1 Tim. 2:4) Omiyo sama ipuonjori Wach Nyasaye kod bugewa malero Muma, kik isomgi asoma awiye awiye. Ti gi rieko ma in-go mar pogo weche mondo gik misomo odonjni. (Mat. 13:23) We wane ane kaka timo kamano nyalo konyi tego yie mari kuom Nyasaye kaka Jachuech kaachiel gi Muma. Nitie gik mang’eny ma nyiso gimomiyo onego wayie kuom Jachuech kod gimomiyo onego wayie kuom Muma.—Hib. 11:1.
Puonj Manie Wach Nyasaye
it-1-E 1211 ¶4
Tim Makare
Wanyalo siko ka wan gi tim makare, ok kuom tekowa wawegi, to mana kokalo kuom yie motegno ma miyo wageno kuom Jehova kod teko ma en-go mar reso joge. (Za 25:21) Nyasaye osingo ni obiro bedo “okumba” kendo “kar pondo,” ne joma wuotho e tim makare. (Nge 2:6-8; 10:29; Za 41:12) Kinda margi mar moro Jehova konyogi mondo gisik ka gichung’ motegno, to mano miyo gidhi nyime wuotho e yor tim matir. (Za 26:1-3; Nge 11:5; 28:18) Mana kaka Ayub nowacho, joma onge ketho nyalo yudo chandruok nikech joma richo mi githo kanyachiel gi jorichogo, kata kamano, Jehova singonwa ni ong’eyo gik ma ng’at ma onge ketho kaloe kendo ni obiro guedhe, obiro bedo gi kuwe e kinde mabiro, kendo obiro yudo pok maber. (Ayu 9:20-22; Za 37:18, 19, 37; 84:11; Nge 28:10) Mana kaka sigand Ayub nyiso, bedo gi tim makare e gima duong’ ma miyo ng’ato bedo mamor kendo imiye luor, to ok mana mwandu ma en-go. (Nge 19:1; 28:6) Nyithindo ma nigi jonyuol ma kamago gin nyithindo mamor ahinya (Nge 20:7), nikech wuon-gi ketonegi ranyisi maber kendo mano miyo jomoko miyogi luor nikech nying maber ma wuon-gi oloso.