ANG’O MINYALO TIMO MONDO KIK IBED GI SIGU GI NG’ATO ANG’ATA?

2 | Kik Ichul Kuor

Puonj ma Muma Chiwo:

“Kik uchul richo kar richo ne ng’ato. . . . Ka nyalore, to temuru matek mondo udag gi kuwe gi ji duto. . . . Kik uchul kuor, . . . nimar ne ondik niya: ‘Jehova owacho ni, “Chulo kuor en mara; abiro chulo.”’”—JO-RUMI 12:17-19.

Tiend Puonjno:

Kata obedo ni iwa nyalo wang’ sama ng’ato ochwanyowa, Nyasaye ok oyie ni wachul kuor. Kar mano, ojiwowa ni mondo warit kinde mobiro rieyoe weche duto.—Zaburi 37:7, 10.

Gik Minyalo Timo:

Sama dhano morem chulo kuor, mano medo mana jiwo sigu. Omiyo, ka ng’ato ochwanyi kata ohinyi, kik ichul kuor. Dwoke gi muolo kendo igeng’ mirimbi. Kinde moko nyalo bedo maber kiweyo aweya wachno okal kamano. (Ngeche 19:11) To kineno ni temo loso wachno nyalo konyo kamoro, inyalo kawo okang’ mowinjore. Kuom ranyisi, inyalo tero wachno ka sirkal.

Chulo kuor biro mana medo hinyowa

To nade kifwenyo ni onge yo moro amora mar loso wachno gi kuwe? Kata, nade ka po ni isetimo duto minyalo mondo item loso wachno to weche pod richo aricha? Kik ichul kuor. Chulo kuor biro mana medo ketho weche. Omiyo, tem atema mondo kik ibed gi sigu e chunyi. Inyalo geno ni Nyasaye biro loso weche e yo maber moloyo. “Gen kuome, eka notimni kaka ikwaye.”—Zaburi 37:3-5.

Gima Notimore e Ngima Ng’ato—ADRIÁN

Noloyo Chuny mar Chulo Kuor

Ka ne Adrián en rawera, ne en ng’at mager ma nohero dhawo. Owacho kama: “Seche moko ne wadhawo gi bunde. Kinde moko joma ne wadhawogo ne weya e bath ndara ka remo otiap kuoma ka giparo ni asetho.”

Ka ne Adrián jahigni 16, nochako puonjore Muma. Owacho kama: “Kaka namedo puonjora Muma, nafwenyo ni ne dwarore ni atim lokruoge moko e ngimana.” Ne dwarore ni Adrián ogol sigu e chunye kendo owere gi dhawo. Nomor ahinya gi gima nopuonjore e bug Jo-Rumi 12:17-19 ma kwero chulo kuor. Owacho kama: “Naduogo ayie ni Jehova biro kawo okang’ mar tieko gik maricho ma timore e piny e kinde mowinjore kendo kaka ohero. Mosmos, naweyo bedo ng’ama ger.”

Chieng’ moro godhiambo, rowere moko ma Adrián ne jakedogago chon nomonje. Jatend rowerego nokokne kama: “Tem ane kedo kodwa inee!” Adrián wacho kama: “Iya nowang’ matek kendo nawinjo e chunya ni achul kuor.” Adrián ne ok ochulo kuor, kar mano, nolemo kae to nochako wuoth koa kanyo.

Adrián dhi nyime wacho kama: “Odiechieng’ maluwo, naromo gi jatend rowerego ka en kende. Mirima nomaka matek, to nachak alemo kendo ka akwayo Jehova mondo okonya kik amwomra. Rawerano notimo gima nomako dhoga. Nobiro nyaka ira, kae to owacho niya: ‘Ng’wonna kuom gima natimo nyoro. Kiwacho awacha adier, daher chalo kodi. Daher puonjora Muma.’ Kare natimo maber kuom tamora chulo kuor! Timnano nomiyo oyie puonjore Muma.”