2 | “Hoch Moa e Ndiko”

MUMA WACHO KAMA: “Weche duto ma ne ondik chon, ne ondikgi mondo gipuonjwa, mondo kokalo kuom sinani ma watimo, kendo kokalo kuom hoch moa e Ndiko, wabed gi geno.” —JO-RUMI 15:4.

Tiend Wachno

Muma oting’o paro ma nyalo hoyowa kendo miyowa teko mar nano sama wanyagore gi tuo mar paro. Bende, omiyowa geno ni machiegnini, parruok duto ma kelonwaga kuyo biro rumo.

Kaka Wachno Nyalo Konyo

Waduto nitie sama wabedoga gi parruok. Kata kamano, joma nigi tuo mar depression kod tuoche mamoko mag parruok nyalo nyagore gi chuny malit pile ka pile. Ere kaka Muma nyalo konyo joma kamago?

Muma nigi paro mang’eny mabeyo ma nyalo konyowa kedo gi chuny monyosore. (Jo-Filipi 4:8) Paro mabeyogo nyalo pong’o pachwa gi weche ma hoyowa kendo konyowa nyagore maber.—Zaburi 94:18, 19.
Muma nyalo konyowa mondo kik wanere ka joma nono.—Luka 12:6, 7.
Muma konyowa bedo gadier ni ok wan kendwa, kendo ni Nyasachwa ma bende en Jachuechwa ong’eyowa maber.—Zaburi 34:18; 1 Johana 3:19, 20.
Muma singonwa ni Nyasaye biro golo kuyo ma wan-go e chunywa. (Isaya 65:17; Fweny 21:4) Sama wachandore nikech parruok, singo ma kamano nyalo miyowa teko mar dhi nyime nano.

Kaka Muma Konyo Jessica

Kaka Tuo mar Depression Chandaga

“Ka ne an jahigni 25, ne an gi parruok ahinya kendo noyuda gi tuo mar depression. Nasiko aparoga gik maricho ma notimore e ngimana, to mano ne miyo abedoga gi chuny malit. Lakteche nokonya ng’eyo ni tuona mar depression notudore gi gik maricho ma notimore e ngimana chon, ma nasiko ka aparoga. Mopogore gi yedhe ma natiyogo, ne dwarore ni lakteche okonya fwenyo paro maricho ma ne chandago kendo ariegi.”

Kaka Muma Osekonya

“E kinde ma tuo mar depression ne ketaga piny, ne abwogoraga, ne an gi luoro mokalo tong’, kendo nindo ne lalnaga gotieno. Nyading’eny otieno kotieno, wiya ne ringoga matek nikech parruok mang’eny ma ne chanda. Mana kaka Zaburi 94:19 wacho, Nyasaye nyalo hoyowa sama parruok opong’o chunywa. Omiyo, e bath otandana naketoga Muma gi buk moro matin ma nigi ndiko moko ma nyalo jiwa. Sama ne nindo otamore tera gotieno, ne asomoga moko kuom ndikogo mondo pach Nyasaye oho chunya.

“Muma jiwowa ni wagol paro moro amora ma guenyore gi gik ma wang’eyo e wi Jehova. E kinde machon, naparoga ni ne an ng’at manono, kendo ni Nyasaye ok nyal hera. Kata kamano, asefwenyo ni paro ma kamago tuomore gi gima Muma puonjo e wi Nyasaye. Muma puonjowa ni Jehova en Nyasaye ma jahera, mang’won, kendo ma dewo ng’ato ka ng’ato. Mosmos nachako chiko gik ma donjo e pacha kar weyo mondo gigo e ma ochika. Asepuonjora nenora kaka Jehova nena. Mano e okang’ maduong’ ma nakawo mondo okonya golo paro maricho ma ne an-go kuoma.

“Arito gi siso kinde ma paro duto ma kelonwa kuyo biro rumo. Ng’eyo ang’eya ni tuoche mag parruok biro bedo ma onge, miyaga teko mar dhi nyime nyagora gi tuona nyaka chop kinde ma tuoche kaka mago biro bedo ma onge chuth.”