3 | Puonjri Kuom Ranyisi mag Joma Iwuoyo Kuomgi e Muma

MUMA WUOYO KUOM . . . Ranyisi mag chwo gi mon ma nomakore motegno gi Jehova, kata obedo ni ne gin mana “dhano kaka wan.”—JAKOBO 5:17.

Tiend Wachno

Muma oting’o ranyisi mang’eny mag chwo gi mon ma nokalo e chandruoge mopogore opogore ma nokelonegi parruok. Sama wanono ranyisigo, wanyalo yudo moro kuomgi ma nokalo e chandruok ma wan bende wakaloe.

Kaka Wachno Nyalo Konyo

Waduto wadwaroga ni jomamoko ong’e kaka wawinjo e chunywa, to ahinya-ahinya sama wanyagore gi tuoche mag paro. Sama wasomo Muma, wayudo ranyisi mag joma bende nowinjo e chunygi mana kaka wawinjoga. Mano miyo wawinjo ni ok wan kendwa, nikech jomamoko bende nosekalo e chandruoge ma yudowago.

Muma oting’o weche mathoth mag joma ne piny ochamo, kendo ma chunygi nonyosore ahinya. Be isegawacho e chunyi ni, ‘Ok anyal dhi nyime dak kama’? Mano e kaka Musa, Elija, kod Daudi nowinjo e chunygi.—Kwan 11:14; 1 Ruodhi 19:4; Zaburi 55:4.
Muma wuoyo kuom dhako moro ma nyinge Hana ma ‘chunye ne lit ahinya’ nikech ne ok onyuol, to nyieke ne siko ka chwoyo chunye gi wachno.—1 Samuel 1:6, 10.
Muma nyisowa e wi ng’at moro ma nyinge Ayub ma nochandore ahinya. Kata obedo ni ne en gi yie motegno, chunye nochandore mowacho ni, “Ajok gi ngimanani; ok adwar bedo mangima kendo.”—Ayub 7:16.

Sama wasomo e Muma kaka jogo nonyagore maber gi parruok, mano jiwowa kendo konyowa ng’eyo kaka wan bende wanyalo nyagore maber gi parruok.

Kaka Muma Konyo Kevin

Kaka Tuo mar Bipolar Disorder Chandaga

“Ne ofweny ni an gi tuo mar bipolar disorder ka ne ahawo higni 50. Nitie kinde ma awinjoga ni anyalo kedo gi gimoro amora ma chanda. Kinde moko to awinjoga ka ngima ojoga.”

Kaka Muma Osekonya

“Ranyisi mar jaote Petro osekonya ahinya. Nitie gik ma notimo ma nomiyo owinjo ka en ng’at manono. Kata kamano, kar keto pache e ketho ma notimo, nobedo machiegni gi osiepe ma ne dewe ahinya. Sama tuona mar bipolar disorder omedore, kethoga nyaloga miyo awinj e chunya ni an ng’at manono ahinya. To mana kaka Petro, asefwenyo ni bedo machiegni gi osiepena konyaga mondo anyagra maber gi tuonani.

“Ranyisi machielo manie Muma ma hoyaga ahinya en mar Ruoth Daudi. Nitie kinde ma chunye ne nyosorega ahinya nikech chandruoge ma nokaloe kod ketho moko ma notimo. Ranyisi mare konyaga ahinya nikech nitie kinde ma ajawacho kata timo gik moko ma miyo aywago ang’e bang’e. Weche ma Daudi nowacho e Zaburi 51 hoyaga ahinya. E wes mar 3, Daudi nowacho kama: ‘Ang’eyo kethona, kendo asiko aparo richona.’ Wechego nyiso maler kaka awinjoga sama tuona omedore, nikech e kinde ma kamago, anenoraga ka ng’at manono ahinya. Kata kamano, weche ma Daudi nowacho e wes mar 10 jiwaga ahinya. Nowacho kama: ‘Yaye Nyasaye, chue chunya obed maler, kendo miya chuny manyien kendo motegno.’ Atiyoga gi weche ma kamago sama akwayo Nyasaye mondo okonya kik apar ni an ng’at manono. To mogik, wes mar 17 hoyaga ndi! Owacho kama: ‘A Nyasaye, ok ibi chayo chuny monyosore kendo motur.’ Wechego miyo abedo gadier ni Nyasaye ohera.

“Keto pacha kuom ranyisi mag joma iwuoyo kuomgi e Muma kod gik ma Nyasaye osemiya e kindegi, tegoga genona ma kinde mabiro. Mano konyaga neno ni singo manie Muma gin adier, kendo mano miya mijing’o mar dhi nyime nano gi tuonani.”