1 | Lamo—‘Keturu Parruoku Duto Kuome’

MUMA WACHO KAMA: ‘Keturu parruoku duto kuom Nyasaye nikech odewou.’—1 PETRO 5:7.

Tiend Wachno

Jehova Nyasaye dwaro ni wawuo kode e wi gimoro amora ma chando pachwa kod chunywa. (Zaburi 55:22) Wanyalo nyiso Jehova gimoro amora ma chandowa, bed ni en gima tin kata maduong’. Ka wach moro chando chunywa, wanyalo bedo gadier ni wachno chando chuny Jehova bende nikech odewowa. Wuoyo gi Jehova e lamo en okang’ maduong’ ma dwarore ni wakaw mondo pachwa obed mokuwe.—Jo-Filipi 4:6, 7.

Kaka Wachno Nyalo Konyo

Sama wanyagore gi tuoche mag paro, wanyalo winjo ka piny ochamowa. Kinde moko, jomamoko ok nyal ng’eyo kuom adier gima wakaloe. (Ngeche 14:10) Kata kamano, sama wawuoyo gi Nyasaye e lamo ka wanyise kaka wawinjo e chunywa, wanyalo bedo gadier ni owinjowa kendo okechowa. Jehova nenowa, ong’eyo lit ma wakaloe kod chandruoge ma wanyagorego, kendo odwaro ni wawuo kode e lamo ka wanyise gimoro amora ma chandowa.—2 Weche mag Ndalo 6:29, 30.

Sama wawuoyo gi Jehova e lamo, wabedo gadier ni odewowa. Wanyalo winjo e chunywa mana kaka jandik-zaburi ma nolemo kama: “Iseneno chandruokna, kendo ing’eyo gik ma chando chunya.” (Zaburi 31:7) Ng’eyo ang’eya ni Jehova ong’eyo maber chandruoge ma wakaloe nyalo konyowa dhi nyime nano e kinde matek. To Jehova timo momedore: Okonyowa mondo wayud hoch kod jip mowuok e Muma.

Kaka Muma Konyo Julian

Kaka Parruok Chandaga

“Anyagora gi tuo moro mar paro miluongo ni obsessive-compulsive disorder (OCD). Achakoga parora apoya nono. Sama tin awinjoga ka aber abera, to sama tin awinjoga ka an gi parruok mang’eny ma akia kata ni atim nang’o, to moloyo sama an e kind ji. Asiko apenjoraga gima dibed ni giparo kuoma.

“Joma ong’eyo chandruoknano konyaga ahinya. En adier ni seche moko ginyisaga gik ma ne ok agen winjo. Kata kamano, amor gi kinda ma gitimo e konya.

“Seche moko, tuonani miyo bedonaga matek wuoyo gi Nyasaye e lamo. Dwarore ni atim kinda mang’eny mondo awuo gi Jehova e lamo. Wiya ringoga matek ma ok anyal. Sama obwongona oparo mochopo tung’, dhoga mokoga ma kata gima dawach tama.”

Kaka Muma Osekonya

“E puonjruokna mar Muma, asefwenyo ni ok ochuno ni lamba obed ma rabora e ka Nyasaye owinja. Nitie kinde moko ma kata wuoyo tamaga. E kinde kaka mago, awachoga awacha ni, ‘Jehova, konya.’ Anenoga ni pod Jehova winja kendo odwoko lamoga. E wi mano, amanyoga thieth. Amor ahinya ni timo kamano osekonya nyagora maber gi tuonani. Kinda ma atimoga e manyo kony kuom Wuonwa manie polo osehoya ahinya.”