Gik ma Nyalo Konyi e Puonjruok

Ng’e Gik ma Dwarore Moloyo

Waduto wabedoga mana gi thuolo matin mar timo puonjruokwa wawegi. Ere kaka wanyalo tiyo gi thuolono e yo maber moloyo? Mokwongo, kaw thuolo moromo sama isomo. Ibiro yudo ber mang’eny ka isomo matin tin kar somo gik mang’eny dichiel.

Kae to, ng’e gik ma dwarore ni ipuonjri moloyo. (Efe. 5:15, 16) Ma luwogi gin moko kuom paro minyalo tiyogo:

• Som Muma pile ka pile. (Zab. 1:2) Inyalo chako gi luwo chenro mar Somo Muma mitimo e chokruogewa ma kor juma.

• Ik Puonjruok mar Ohinga mar Jarito kod chokruok ma kor juma, kendo iik nyaka paro mibiro chiwo.​—Zab. 22:22.

• Ka in gi thuolo momedore, tem isom gasedewa mogo ne ji duto, ine vidio, kendo isom sula mopogore opogore ma yudore e jw.org.

• Tim nonro. Inyalo timo nonro e wi pek moro mikaloe, penjo moro ma in-go, kata wach moro ma diher ng’eyo maber e Muma. Mondo iyud paro momedore, dhi e kare ma wacho ni, “Gik Minyalo Tiegruokgo e Weche Muma” e jw.org.