Gor Pichni Mondo Okonyi Paro Gik Mipuonjori

Nitie seche ma inyalo yudo ka tekni paro gik mipuonjori. Mano en gima timorega ne thothwa. Kata kamano, be isefwenyo ni wanyaloga paro mayot ranyisi ma Yesu ne tiyogo kopuonjo? Inyalo goyo picha mag ranyisigo e pachi kendo mano nyalo konyi paro puonj madongo manie ranyisigo. Kamano bende, inyalo paro gik ma ipuonjori sama igoyo picha mag gik misomo e pachi. Ere kaka inyalo timo mano? Inyalo goro pichni mag gik misomo.

Joma goroga pichni mag gik manyien ma gipuonjore, paroga gik ma gipuonjorego e yo mayot. Timo kamano konyogiga paro mayot puonj madongo, to ok mana weche kende. Ok ochuno ni igor pichni mabeyo beyo, kar mano, inyalo goro mana picha ma nyalo konyi paro gima ipuonjori. Nonro mosetim nyiso ni ng’enyne joma hikgi oniang’ yudoga ber mathoth ka gitiyo gi yorno sama gipuonjore.

Odiechieng’ machielo sama itimo puonjruok ma mari iwuon, tem ane goro pichni moko ma nyalo konyi paro gik mipuonjori. Ibiro wuoro kaka yotni paro gik mang’eny mipuonjori!