Inyalo Tiegori Imed Paro Gik Moko

JEHOVA NYASAYE nochweyo obwongo dhano gi nyalo majaber miwuoro mar paro gik moko. Nochweyogo mondo obed kaka dak minyalo gol gima okan e iye, to podi gik manie iye ok rum kata lal. Kaka ochwe obwongo luwore gi dwaro mar Nyasaye ni dhano odag nyaka chieng’.—Zab. 139:14; Joh. 17:3.

Kata kamano, inyalo neno ni wiyi wil gi gik mang’eny misepuonjori. Ineno ni ok inyal parogi sama idwaro tiyo kodgi. Ang’o minyalo timo mondo imed paro gik moko?

Bed gi Gombo mar Ng’eyo

Bedo gi gombo mar ng’eyo gimoro konyo ng’ato ahinya mondo opar gik moko. Ka wabedo gi tim mar nono gik moko adimba, hero jomoko, kendo temo ng’eyo gigo matimore e alworawa, mano biro jiwo pachwa. Mano biro miyo sama wasomo kata winjo gima nyalo konyowa, wabed gi siso mar ng’eyo gino e yo matut.

Paro nyinge ji ok en gima yot ne jomoko. Kata kamano, wan kaka Jokristo, wang’eyo ni Jokristo wetewa, jogo mwalendonegi, koda jogo mwatudorego e ngimawa mapile, gin joma wageno ahinya. Ang’o manyalo konyowa paro nyinge ji madwarore ahinya ni wapar? E barua ma jaote Paulo nondiko ne kanyakla moro, nochano nyinge 26 mag joma ne nie kanyaklano. Siso mare mar ng’eyogi nenore maler ok mana kuom luongogi gi nyingegi kende, to bende kuom medo lero weche moko kuomgi. (Rumi 16:3-16) Moko kuom jorit malworo mag Joneno mag Jehova timo maber ahinya e paro nyinge ji, kata obedo ni juma ka juma gilimo kanyakla mopogore opogore. Ang’o makonyogi? Sama gikwongo ng’ere gi ng’ato, gitemo ahinya tiyo gi nyinge nyadinwoya sama giwuoyo kode. Gitemo ahinya mondo gitud nying ng’atno gi chal moro kuome. E wi mano, kawo thuolo mar lendo kendo chiemo gi ji mopogore opogore konyogi paro nyingegi. Bang’ ng’eyoru gi ng’ato, be ibiro paro nyinge? Kwong ing’e gimomiyo onego ipar nyinge, kae to item tiyo gi weche mosewachgi.

Paro gigo misesomo bende dwarore. Ang’o manyalo konyi medo timo kamano? Bedo gi gombo mar ng’eyo kendo winjo tiend gimoro e yo matut, nyalo konyi. Onego ibed gi chuny mar dwaro ng’eyo gigo misomo mondo omi iket pachi duto kuomgi. Ok inyal mako weche misomo kapo ni pachi ni kamachielo. Ibiro medo winjo tiend gima isomo, ka itudo wach misomono gi gigo ming’eyo kata misepuonjori. Penjri ane kama: ‘Ere kaka anyalo tiyo gi wachni e ngimana, to e kinde mage? Anyalo tiyo kode nade e konyo ng’at machielo?’ Ng’eyo tiend weche misomo bende nyalo medore kuom somo weche mogwaro kanyachiel kar somo wach achiel achiel. Ibiro medo mako weche mapiyo kendo ng’eyo puonj madongo monego ojiw, to mano biro miyo ipargi mayot.

Kaw Thuolo Mondo Ikal Kendo Kuom Gik Misomo

Jo molony e weche somo jiwo ni ber ka ng’ato odok mokalo kendo kuom gik moa somo. Profesa moro mar yunivasiti notimo nonro moro manyiso ni ka ng’ato okalo kendo kuom gik moa somo kuom dakika achiel mapiyo bang’ somo, weche moparo medore nyadiriyo. Omiyo, mapiyo bang’ tieko somo gimoro, dog ikal e puonj madongo gi chunyi mondo gimed gurore e pachi. Tem paro kaka inyalo tiyo gi wecheni iwuon e lero gigo manyien mipuonjori. Kinwoyo gigo mipuonjori mapiyo bang’ somogi, gigurore e pachi gaming’a.

Mondo iyud thuolo mar kalo kendo kuom gik mia somo, e odiechienge maluwo, tem manyo thuolo mondo ipimgi ne ng’ato. Inyalo pimogi ne achiel kuom joodu, jo kanyaklau, jotich weteni, joskul weteni, joma idakgo machiegni, kata ng’at miromogo e tiji mar lendo. Tem mondo inwo, ok mana puonj madongo kende, to inyis bende kaka Ndiko konyo e lero kor wechego. Timo kamano biro konyi mondo weche madongo mipuonjori ogurre e pachi, to jomoko bende biro yudo ber kuom ng’eyo gigo mipuonjori.

Par Matut Kuom Weche Madwarore

E wi kaloe kendo nyiso jomoko gik misesomo, paro matut kuom wechego bende biro konyi. Moko kuom jondik Muma, Asaf kod Daudi, notimo kamano. Asaf nowacho kama: “Nahul timbe mag Jehova; nimar napar honini magi machon. Nabudh gi paro bende kuom tichni duto, napar gi chunya kuom timbeni.” (Zab. 77:11, 12) Daudi bende nondiko niya: “Kabudho gi paro kuomi e arita mag otieno,” kendo “aparo ndalo machon; abudho gi paro kuom timni duto: chunya ng’eny gi weche maparo kuom tich lweti.” (Zab. 63:6; 143:5) Be itimo kamano?

Paro e yo matut kamano kuom tije Jehova, kido mage mabeyo koda yore monyisogo dwarone, ok bi konyi mana kano wechego e pachi, to biro konyi e yore mamoko bende. Ka in gi tim mar paro e yo matut kamano, wechego biro gurore e chunyi gadier. Gibiro kelo lokruok e kit chunyi. Gigo misomo koro biro bedo weche machiki.—Zab. 119:16.

Kony ma Roho mar Nyasaye Chiwo

Sama watemo paro adiera motudore gi tije Jehova koda weche ma Yesu Kristo nowacho, ok owewa maonge kony. Otieno mogik kapok otho, Yesu nowacho ne jolupne niya: ‘Wechegi asewachonu ka pod abedo kodu. To jakony cha, en roho maler, ma Wuoro noor e nyinga, enopuonju weche duto, kendo noparnu duto ma nawachonu.’ (Joh. 14:25, 26) Mathayo kod Johana ne gin moko kuom joma ne nitie. Be roho maler nobedonegi jakony ma kamano? Ee, adier nokonyogi! Higini machiegni aboro bang’e, Mathayo notieko ndiko barua mokwongo ma nowuoyo adimba kuom ngima mar Kristo, ma noriwo weche mabeyo ahinya kaka Twak mar Got koda ranyisi moler adimba mar bedoe mar Kristo koda giko mar piny marachni. Higini 65 bang’ tho Yesu, jaote Johana nondiko Injili mare, ma noriwo gigo ma ne Yesu owacho e otieno mogik ma ne obedo kaachiel gi jootene kapok ochiwo ngimane. Onge kiawa ni Mathayo gi Johana ne nyalo paro maber gik ma Yesu nowacho kendo timo e kinde ma ne en kodgi, kata kamano, roho maler nokonyogi e okang’ malach mondo kik wigi wil gi weche mapek ma Jehova ne dwaro ni ondik e Muma.

Be roho maler bedo jakony ne jotich Nyasaye e kindegi? Onge kiawa! Kuom adier roho maler ok ket e pachwa gigo mapok ne wapuonjore, to obedo jakony maparonwa gigo madwarore ma ne wasepuonjore kinde mokalo. (Luka 11:13; 1 Joh. 5:14) Kae to kaluwore gi chal mantie, rohono jiwo pachwa mondo wapar ‘weche ma jonabi maler nowacho chon, gi chik moa kuom joote, [ma] en chik mar Ruoth gi Jawar.’—2 Pet. 3:1, 2.

“Wiyi Kik Wil”

Jehova nochiwo siem nyadinwoya ne Jo-Israel niya: “Wiyi kik wil.” Ok en ni Jehova ne dwaro ni gipar gik moko duto te. Kata kamano, ok nonego giket pachgi duto e luwo yoregi giwegi ma wigi wil gi gik ma Jehova nosetimonegi. Ne dwarore ni gisik ka giparo kaka Jehova noresogi kane malaika onego nyithindo makayo duto mag Jo-Misri, kendo kaka nobaro Nam Makwar mochako olore ma pi onego Farao gi jolweny mage. Jo-Israel ne onego opar ni Nyasaye nomiyogi Chik e Got Sinai kendo ni notayogi e thim nyaka e Piny Manosingi. Tiend wacho ni wigi ok nonego owil, ne en ni paro mag gik ma ne osetimorenegi nonego omul ngimagi mapile.—Rapar 4:9, 10; 8:10-18; Wuok 12:24-27; Zab. 136:15.

Wan bende onego watang’ wiwa kik wil. Kaka wadhi nyime nyagore gi chandruoge mag ngima, onego wapar ni Jehova en Nyasaye machalo nade, kendo paro kaka nonyisowa hera kuom chiwonwa Wuode obed mich mar rawar nikech richowa mondo wayud ngima makare chuth manyaka chieng’. (Zab. 103:2, 8; 106:7, 13; Joh. 3:16; Rumi 6:23) Somo Muma pile, chiwo paro e chokruoge mag kanyakla, kendo riwo lwedo tij lendo, biro miyo wabed kwaparo adiera mabeyogi kinde duto.

Sama onego ing’ad paro kuom weche madongo kata matindo, wiyi kik wil gi adiera mabeyogi, kendo we gichik pachi. Wiyi kik wil. Kwa Jehova mondo otayi. Kar neno weche mana e yor ringruok, kata weyo chunywa morem ema otawa, penjri ane niya, ‘Gin puonj mage mayudore e Wach Nyasaye monego ochik kaka adwaro ng’ado wachni?’ (Nge. 3:5-7; 28:26) Ok inyal paro gigo ma ne pok isomo kata winjo. Kata kamano, kaka imedo ng’eyo kendo hero Jehova, roho mar Nyasaye biro medo konyi paro rieko misekano, kendo hera mimedo herogo Jehova biro jiwi mondo itim kaka odwaro.