Jehova Osekonyowa Nano Kendo Bedo Mamor e Migepewa Duto

Owadwa gi Nyaminwa Kassholm nodhi e Skul mar Gilead e higa mar 1979 kendo gisetiyo ne Jehova e pinje kaka Iran, Mauritius, Myanmar, Tanzania, Uganda, kod Zaire. Ka ne gin e Skul mar Gilead, achiel kuom jopuonjgi ma niluongo ni Jack Redford nowacho gimoro ma osekonyogi ahinya e migepe mopogore opogore ma giseyudo. Wawinj ane ka gileronwa wechego.

Mats gi Ann-Catrin, kwong ulernwae kaka nuyudo adiera.

Mats: Wuonwa nodak e piny Poland e kinde Lweny mar Ariyo mar Piny Ngima kendo noneno kaka ne nitie wuondruok mang’eny e Kanisa mar Katholik. Nojawacho niya: “Ang’eyo ni nitie din madier kamoro!” Bang’ kinde, nafwenyo ni weche ma wuonwa nowachogo ne gin adier. Nanyiewo buge mang’eny mondo asom. Achiel kuomgi ne en buk ma rambulu miluongo ni Adiera Materi e Ngima Mochwere. Bugno nomako pacha ahinya kendo nasome oduto e otieno ma nanyieweeno. Ka ne piny oru, ne an gadier ni aseyudo adiera!

Chakre April higa mar 1972, nasomo buge mamoko mag Joneno mag Jehova kendo ne ayudo dwoko mag penjo ma nosebedo ka chanda. Ne achalo mana gi ja ohala moro ma Yesu nowuoyo kuome. Ng’atno nouso gige duto mondo onyiew lulu achiel ma nengone tek. An bende naweyo dhi somo e yunivasiti mondo abed laktar kendo nachako keto pacha e tiyo ne Jehova. (Mat. 13:​45, 46) Nobatisa Desemba 10, 1972.

Jonyuolna gi owadwa matin bende ne opuonjore adiera kendo ne obatisgi mana bang’ higa achiel. Nachako tiyo ne Jehova gi thuolona duto Julai, 1973. Ne nitie japainia ma jakinda e kanyaklawa miluongo ni Ann-Catrin. Ne en nyako ma jaber kendo mohero Nyasaye. Nahere ahinya kendo ne wakendore e higa mar 1975. Kuom higni ang’wen ma noluwo, ne wadak e taon mar Strömsund e piny Sweden, ma en taon ma jaber kendo ma ji nigi riyo mar winjo wach Nyasaye.

Ann-Catrin: Wuonwa nopuonjore adiera ka nochiegni tieko somo e yunivasiti e taon mar Stockholm. Ne an mana ja dweche adek e kindeno kendo wuonwa ne dhiga koda e chokruoge kod tij lendo. Minwa ne ok mor gi wachno kendo notemoga kwedo Joneno. Kata kamano, bang’ kinde, en bende nobatise. Nobatisa ka an jahigni 13 kae to nabedo painia ka ajahigni 16. Nachiwora dhi lendo e taon mar Umeå kama jolendo ne dwarore ahinya, kendo bang’e nabedo japainia makende.

Bang’ kend, ne wayudo thuolo mar konyo ji mang’eny ng’eyo adiera. Achiel kuomgi ne en nyako miluongo ni Maivor, ma noweyo dhi e tuke ma ne dhi miyo oyud pesa mang’eny mondo oti ne Jehova. Bang’e, nobedo painia kaachiel gi nyaminwa matin. Ne gidhi Gilead e higa mar 1984 kendo sani gin jomisonari e piny Ecuador.

Ang’o ma nokonyou nano kendo bedo mamor e migapu kaka jomisonari?

Mats: Ne owilnwa migepewa nyading’eny. Kata kamano, gima nokonyowa ahinya en luwo ranyisi mar Yesu mar bolruok. (Kol. 2:​6, 7) Kuom ranyisi, kar geno ni owete otim gik moko kaka ne wadwaro, ne watemo ng’eyo gimomiyo ne gitimo gik moko e yo moro. Ne wagombo ng’eyo paro ma ne gin-go kod kit ngimagi. Kaka ne wadhi nyime luwo ranyisi mar Yesu, e kaka ne wamedo nano kendo bedo mamor e migepewa. Ne wachalo mana gi “yath ma dongo e bath aora”.—Zab. 1:​2, 3.

Ann-Catrin: Ka osepidh yien, dwarore ni oyud chieng’ moromo. Jehova nobedonwa kaka “wang’ chieng’” kinde duto. (Zab. 84:11) Noguedhowa gi owete gi nyimine moherowa. Kuom ranyisi, owete gi nyimine ma ne wan-go e piny Iran e kanyakla matin ma ne ni Tehran ne jarwakowa nyading’eny mana kaka jotich Jehova machon ne timoga. Ne wagombo dhi nyime dak e piny Iran, kata kamano, e higa 1980, ne ogo tij Joneno mag Jehova marfuk e pinyno kendo ne omiwa seche 48 kende mondo wawuog e pinyno. Ne omiwa migawo e piny Zaire (ma sani iluongo ni Congo) manie Afrika.

Naywak ka nawinjo ni omiwa migawo e piny Afrika. Naluor nikech weche ma nasewinjo e wi thuonde kod tuoche man Afrika. Kata kamano, osiepewa moko ariyo ma nosegami migawo e Afrika nonyisowa niya: “Kik uluor! Pok udakga Afrika kata kamano, ubiro hero dak kuno.” Ne giwacho adier! Owete gi nyimine ma Afrika ohero ji gadier. Ka nochunowa wuok Zaire higni auchiel bang’e ka ne ogo tijwa marfuk, nalemo ka anyiso Jehova niya, “Yie mondo wadhi nyime tiyoni Afrika kae.”

Gin gueth mage museyudo sama utiyo ne Jehova?

Mats: Wasemako osiep gi jomisonari ma wuok e pinje mopogore opogore. Bende, ka ne wan e migapwa mar misonari, nitie kinde ma ng’ato ka ng’ato kuomwa ne tayo jopuonjre mag Muma ma dirom 20 dwe ka dwe kendo mano ne kelonwa mor mang’eny! Wiya ok nyal wil gi kaka owetewa gi nyiminewa norwakowa kod kaka ne ginyisowa hera ka ne wan Afrika. Ne wanindoga e mtokwa e kinde ma ne walimo kanyakla mogopore opogore e piny Tanzania, kendo owete gi nyimine ne rwakowaga maber kata obedo ni ne gidhier. (2 Kor. 8:3) Gima ne wahero ahinya en kinde ma ne wan-go mar goyo mbaka kaka joot. E giko odiechieng’ kodiechieng’, ne agoyoga mbaka gi jaoda e wi gik motimore chieng’no kendo goyo ne Jehova erokamano kuom konyowa.

Ann-Catrin: Gima osebedo ka mora ahinya en ng’eyo owete gi nyimine ma wuok kuonde mopogore opogore e piny mangima. Waseyudo thuolo mar puonjruok dhok mopogore opogore kaka Farsi, French, Luganda, kod Kiswahili kendo ng’eyo kit ogendni mamoko. Ne watiego jopuonjre manyien, wabedo gi osiepe madier, kendo tiyo ne Jehova ka wan gi ‘winjruok’ maber gi owetewa gi nyiminewa.—Zef. 3:9.

Bende, ne wapuonjore gik mang’eny kuom nono chuech mag Jehova. Sa asaya ma ne wayudo migawo moro manyien, ne chalonwa mana ka gima Jehova oterowa e alwora machielo maber kendo otelo e nyimwa kotayowa. Osepuonjowa gik mang’eny ma dine ok wapuonjre kendwa.

Gin pek mage ma useromogo, to ere kaka nunyagoru kodgi?

Mats: Tuoche mopogore opogore nomakowa, moriwo nyaka malaria. Ann-Catrin bende kinde moro notimne yeng’o moko apoya. Gimachielo ma ne chando chunywa ne gin jonyuolwa ma ne medo bedo moti; kata kamano, nyithindwa mamoko nokonyowa ritogi. Ne gitimo kamano gi horuok, ka gimor, kendo gi hera. (1 Tim. 5:4) Kata obedo ni ne watimo duto ma wanyalo mondo wakonygi, kinde moko chunywa ne chandorega kendo ne wagombo timonegi momedore.

Ann-Catrin: Ka ne wan Zaire e higa mar 1983, tuo mar cholera nogoya matek. Laktar nonyiso Mats niya: “Daruru e pinyni kawuononi!” Kinyne, ne waidho ndege ma ting’o misike mi wadhi Sweden nikech mano kende e ndege ma ne yudore.

Mats: Ne waywak ahinya nikech ne waparo ni migwapwa kaka jomisonari norumo gi kanyo. Gima ber en ni Ann-Catrin nochango kendo bang’ higa achiel kama ne wadok Zaire. Ne oorwa e kanyakla mar dho Swahili manie taon mar Lubumbashi.

Ann-Catrin: Namako ich e kinde ma ne wan Lubumbashi, kata kamano, nyathiwano notho ka ne pok onyuole. Kata obedo ni ne waonge gi chenro mar yudo nyathi, tho mar nyathiwano ne litna ahinya. E kinde ma ne wakuyono, Jehova nomiyowa mich moro makende ahinya. Ne wachako puonjore Muma gi ji mang’eny ahinya moloyo kinde moro amora. Kuom thuolo matin ne higa achiel, kwan mar jolendo mag kanyaklawa nomedore koa e 35 nyaka 70, kendo kwan mar joma ne biro e chokruoge nomedore koa e 40 nyaka 220. Ne wadich ahinya e tij lendo kendo Jehova ne guedho kinda ma ne watimo, to mano nohoyo chunywa ahinya. Pod wawuoyoga e wi nyathiwano, kendo warito kinde ma Jehova biro golonwa gik moko duto ma kelonwa kuyo.

Mats: Nitie kinde moro ma Ann-Catrin ne winjo kool ahinya. E kindeno bende, noyuda gi kansa mar nyombich kendo ne dwarore ni otimna yeng’o. Sani to adhi maber kendo jaoda bende timo duto monyalo e tij Jehova.

Wasefwenyo ni ok wan kendwa e ma waromo gi chandruoge. Bang’ lweny malich ma notimore e piny Rwanda e higa mar 1994, ne walimo owete gi nyimine mang’eny ma noringo modhi e kembe. Neno kaka ne gin gi yie motegno, sinani margi, kod kaka ne gihero rwako welo nokonyowa bedo gadier ni Jehova nyalo reso joge e tem moro amora.—Zab. 55:22.

Ann-Catrin: Ne wayudo pek machielo ka ne wadhi e program mar walo ofis ma Uganda e higa mar 2007. Bang’ programno, ne wachako safar mar dhi Nairobi, e piny Kenya, ka wan gi jomisonari kod jo Bethel ma dirom 25. Ka ne pok wachopo e boda mar Uganda gi Kenya, lori moro nobayo yo mi otuomo mtokwa. Dereva kaachiel gi owete gi nyimine abich ne otho gi kanyo; nyaminwa moro to notho bang’e e osiptal. Wagombo ahinya romo gi osiepewago kendo e kinde ma biro!—Ayub 14:​13-15.

Nachango mos mos. Kata kamano, an gi Mats kaachiel gi thoth joma ne wan-go pod wanyagore gi parruok kod luoro nikech masirano. Nabwogoraga gotieno kendo nachalo mana ka ng’at ma nigi tuo mar adundo (heart attack). Wachno ne lit ahinya. Kata kamano, lamo kaachiel gi somo ndiko moko ma wahero nokonyowa nano. Bende, ne wadhi ir lakteche molony e thiedho tuoche mag parruok, to mano nokonyowa. Gie sani, ok wan gi parruok ahinya, kendo wakwayoga Jehova mondo okonyowa hoyo joma nyagore gi chandruoge kaka mago.

Sama ne ulero kaka ne unyagoru gi pek ma ne uromogo, ne uwacho ni ne “oting’u mana ka tong’.” Mano tiende ang’o?

Mats: E Kiswahili wechego gin “Tumebebwa kama mayai mabichi,” ma tiende en ni “odembwa mana ka tong’.” Mana kaka ng’ato dembo tong’ mondo kik tore, e kaka Jehova osebedo ka dembowa e migepewa duto. Pok wachandoga gimoro amora kendo nitie kinde ma wayudoga gik mang’eny moloyo kata ma wadwaro. Yo ma Bura Matayo dewowago osemiyo wabedo gadier ni Jehova oherowa kendo oikore konyowa.

Ann-Catrin: Daher nyisou kaka Jehova nokonyowa e wach moro. Chieng’ moro, nogona simo ni baba ne tuo marach e piny Sweden kendo ne osetere e osiptal. Noyudo Mats pod chango nikech malaria nogoye matek kendo ne waonge gi pesa ma noromowa dhi Sweden. Ne wang’ado ni wadhi uso mtokwa. Kae to ne ogonwa simbe moko ariyo; simo mokwongo nowuok kuom owadwa moro ma nowinjo chandruok ma ne wan-go kendo noyie chulonwa tiket mar ng’ato achiel. Simu machielo ne owuok kuom nyaminwa moro ma hike ng’eny ma noyudo okano pesa mar konyo joma ochando. Jehova nokonyowa yudo pesa moromowa dhi Sweden!—Hib. 13:6.

Ang’o musepuonjoru kuom higni mokalo 50 ma usetiyonego Jehova gi thuolou duto?

Ann-Catrin: Asepuonjora ni wayudoga teko sama wageno kuom Jehova kendo wahore mos. Sama wageno Jehova, en ema okedonwa. (Isa. 30:15; 2 We. 20:​15, 17) Waseyudo gueth mang’eny ma tamre gi nono nikech wachiwore tiyo ne Jehova gi chunywa duto e migawo moro amora momiyowa.

Mats: Gima duong’ ma asepuonjora en geno kuom Jehova e chal moro amora kendo fwenyo kaka okonya. (Zab. 37:5) Osebedo ka okonya kinde duto. Pod odhi nyime konyowa kata e migapwa ma watimo sani e Bethel ma Myanmar.

Wan gadier ni rowere mang’eny ma gombo tiyo ne Jehova e yore momedore bende biro yudo gueth kaka mago. Gibiro yudo guethgo ka gidhi nyime nano kendo bedo mamor e migawo moro amora momigi.