Japuonjwa Maduong’ Osemiyowa Puonj Mabeyo

RANYISI MABER MAR JONYUOLNA

E giko higni mag 1950, jonyuolna nowuok Italy ma gidhi dak e taon mar Kindersley ma yudore e alwora mar Saskatchewan e piny Canada. Mapiyo bang’ mano, ne gipuonjore adiera kendo adiera e mosebedo ka chiko ngimawa. Anyalo paro ni ka pod natin, nalendoga kuom seche mang’eny gi jonyuolna kendo samoro ajawachoga ka tugo ni nabedo japainia makonyo ka ajahigni aboro!

Kata obedo ni jonyuolna nodhier, ne giketo tij Jehova mokwongo e ngimagi. Kuom ranyisi, e higa mar 1963 ne giuso gigegi mang’eny mondo giyud pesa ma ne ginyalo dhigo e chokruok maduong’ moriwo pinje ma notim Pasadena, California e piny Amerka. E higa mar 1972 ne wadar ma wadhi e taon mar Trail, man British Columbia e piny Canada, ma en wuodh kilomita 1000 kama kiwuok kuma ne wadakie. Ne wadhi lendo e alwora ma niwachoe dho Italy. Wuonwa ne tiyoga tije mag lwedo. Notamore tije ma ne nyalo miye pesa mang’eny mondo oyud thuolo momedore mar tiyo ne Jehova.

Amor ahinya nikech ranyisi ma jonyuolwa noketonwa kaachiel gi nyithindwa adek. Ranyisigi noketona mise maber ne tij Nyasaye. Ne gipuonja wach moro maduong’ ma wiya pok owilgo ma en ni: Ka aketo Pinyruoth mokwongo to Jehova biro rita.—Mat. 6:33.

WACHAKO TIYO NE JEHOVA GI THUOLOWA DUTO

E higa mar 1980, nakendo nyako ma jaber miluongo ni Debbie, ma ne nigi chenro mag tiyo ne Jehova. Ne wagombo tiyo ne Jehova kuom thuolowa duto, omiyo, Debbie nobedo painia dweche adek bang’ ka ne wasekendore. Bang’ dak kuom higa achiel, ne wadar ma wadhi konyo kanyakla moro ma jolendo ne dwaroree moloyo, kae to an bende nabedo painia.

Bang’ kinde, chunywa nonyosore ahinya kendo ne wadwaro dar mondo wawuog e alworano. Kata kamano, ne wawuoyo gi jarit-alwora. Nowuoyo kodwa e yor hera kendo nonyisowa moriere niya: “Un e ma umiyo weche bedonu matek. Uketo pachu duto kuom chandruoge muromogo. Temuru manyo gik mabeyo e chal ma untie, to ubiro nwang’ogi.” Mano e siem ma ne wadwaro e kindego. (Zab. 141:5) Ne wachako tiyo gi puonjno kendo mapiyo ne wafwenyo ni nitie gik mabeyo mang’eny ma ne wan-go. Ji mathoth e kanyakla ne gombo tiyo ne Jehova e okang’ momedore, to mano noriwo rowere kod joma joutegi ne ok gin Joneno. Mano ne en puonj maduong’ ahinya ma nokonyowa. Ne wapuonjore keto pachwa kuom gik mabeyo kendo rito mondo Jehova e ma orie weche. (Mika 7:7) Ne wabedo mamor kendo weche nobedonwa maber.

Joma nopuonjowa e skul mar jopainia ma ne wadhie mokwongo, ne gin owete ma nosetiyo ne Jehova e pinje mamoko. Ne ginyisowa pichni kendo ne giwuoyo kodwa e wi pek kod gueth ma ne giyudo e migepegi, to mano nomiyowa siso mar bedo jomisonari. Omiyo, ne waketo chenro mar bedo jomisonari.

Mondo wachop gombowa mar bedo jomisonari, e higa mar 1984 ne wawuok British Columbia mi wadhi dak Quebec ma en alwora miwachoe Dho-French. Mano ne en wuodh kilomita 4,000 gi wiye. Nochunowa puonjore kit ngima manyien kod dhok manyien. Pek machielo ma ne waromogo en ni ne waonge pesa moromo. Nitie kinde ma ne wachamoga mana rabuon ma japur moro noyienwa hulo e puothe. Debbie ne tedo rabuon-go e yore mopogore opogore kendo mamit! Kata obedo ni ne waromo gi pek kaka mago, ne watemo mondo kik walal mor ma ne wan-go. E wi mano, ne wafwenyo ni Jehova ne ritowa.—Zab. 64:10.

Chieng’ moro nogonwa simu ma nobwogowa matin. Nogwelwa mondo wadhi wati e Bethel ma Canada. Noyudo wasepong’o fom mar dhi e Skul mar Gilead, omiyo, wachno bet nonyoso chunywa. Kata kamano, ne wayie dhi tiyo Bethel. Ka ne wachopo Bethel, ne wapenjo Owadwa Kenneth Little, ma ne nie Komiti mar Ofis mar Kanada niya: “To nade fom mar Gilead ma nyocha wapong’o?” Nodwokowa niya: “Wabiro wuoyo e wi wachno kogwelu e Gilead.”

Juma achiel bang’e, ne wayudo barua ma ne gwelowa dhi e Skul mar Gilead. Omiyo, ne nyaka watim yiero. Owadwa Little nonyisowa niya: “Kata bed ni nitie migawo mihero, nyalo chopo sama ichako gombo migawo ma ne ok ihero. Onge migawo maber moloyo nyawadgi. Jehova nyalo guedho ng’ato e yo moro amora.” Ne wayie dhi Gilead, kendo kuom higni mang’eny waseneno kaka weche ma Owadwa Little nowachogo gin adier. Wasetiyo gi wechego sama wajiwo joma ohero migawo moro moloyo machielo.

WABEDO JOMISONARI

Ne wamor ka nogwelwa e klas mar 83 mar Gilead ma noting’o jopuonjre 24. Notime Brooklyn, New York e dwe mar April 1987. Jopuonjwa ne gin Owadwa Ulysses Glass kod Owadwa Jack Redford. Dweche abich ma ne wan e skundno nokalo ka diemo wang’, kendo ne watieko e dwe mar Septemba 6, 1987. Noorwa e piny Haiti kaachiel gi John gi Marie Goode.

Nyaka ne riemb jomisonari e piny Haiti e higa mar 1962, ne pok oor jamisonari moro amora mowuok Gilead e pinyno. Jumbe adek bang’ wuok Gilead, ne wachopo e piny Haiti e kanyakla moro matin ma yudore e wi gode kendo ma ne nigi jolendo 35. Ne watindo kendo pod ne waonge lony. Ne wadak kendwa e od jomisonari. Joma nodak e alworano nodhier ahinya kendo thothgi ne ok ong’eyo somo. E kindego, ne nitie lwenje e kind dhoudi, jong’anyo ma wang’o gik moko e yore, joma dwaro loko sirkal githuon, kod yamo mager ma ketho gik moko.

Ne wapuonjore weche mathoth kuom owete gi nyimine ma Haiti. Thothgi nodak e ngima matek, to pod ne gihero Jehova kod tij lendo, kendo ne gimor gadier. Kuom ranyisi, ne nitie nyaminwa moro ma hike ng’eny ma ne ok ong’eyo somo to nomako ndiko ma dirom 150 e wiye. Chal ma ne waromogo pile ka pile ne miyo wamedo bedo gadier ni Pinyruodh Nyasaye kende e ma biro golo ne dhano chandruoge. Wamorga ahinya neno ka moko kuom joma ne wapuonjorego Muma e alworano tinde gin jopainia mapile, jopainia makende, kod jodong-kanyakla.

Ka ne wan Haiti, nachako puonjora Muma gi Trevor ma ne en jamisonari e din mar Mormon. Higni moko bang’e, ne oorona barua. Nondikona niya: “Idhi batisa e chokruok mar alwora ma biro! Daher dok Haiti mondo adhi abed jamisonari e alwora ma ne chon an jamisonari ka ne an ja Mormon.” To mano e gima notimo gi jaode kuom higni mang’eny.

WADHI ULAYA KAE TO AFRIKA

Pinje mathoth man Ulaya nochako golo marfuk ma ne giketo ne tijwa mar lendo, kendo noorwa mondo wadhi kuno. E higa mar 1992 ne wadhi Ljubljana, Slovenia, machiegni gi kama jonyuolna noponie ka ne pok gidar ma gidhi Italy. Lweny pod ne dhi nyime e alwora machon niluongo ni Yugoslavia. Tij lendo e alworano ne itayo gi owete ma ne ni Vienna e piny Austria, Zagreb e piny Croatia, kod Belgrade e piny Serbia. Pinjego koro ne dwarore ni obed gi Bethel ma maggi.

Mano nyiso ni ne nyaka wapuonjre kit ngima manyien kod dhok manyien. Jopinyno ne wachoga ni, “Jezik je težek,” ma tiende en “Dhokni ok yot wacho.” To adier notek! Ne wamor gi ranyisi ma owete gi nyimine noketo mar makruok gi riwruok mar oganda Jehova kendo yie timo lokruoge ma ne dwarore, kendo Jehova noguedhogi ahinya. Ne wachako waneno kendo kaka Jehova rieyo weche e kinde mowinjore. Ne wapuonjre gik mathoth ka ne wan Slovenia kendo ne wapuonjore kaka wanyalo nyagore gi pek ma ne waromogo.

Kata kamano, nitie lokruoge ma pod ne ni nyimwa. E higa mar 2000, noorwa e piny Côte d’Ivoire ma yudore Afrika. Kae to Novemba 2002 nodarwa moterwa Sierra Leone nikech lweny mar dhoudi ma ne ni Côte d’Ivoire. Noyudo ka lweny ma nosebedo e piny Sierra Leone kuom higni 11 oa rumo. Ne ok yot wuok Côte d’Ivoire apoya kamano. Kata kamano, gik ma ne wasepuonjore nokonyowa siko ka wamor.

Ne waketo pachwa kuom tij lendo kachiel gi ranyisi mag owete gi nyimine ma nosenano kuom higni mang’eny nikech lweny. Ne gidhier ahinya, kata kamano, ne gijochiwo. Nyaminwa moro nomiyo Debbie lewni moko. Ka ne Debbie dwaro tamore kawo lewnigo, nyaminwano noramo ka nyise niya: “E kinde mag lweny, owete gi nyimine moa e pinje mopogore opogore nokonyowa ahinya. Wan bende koro wan gi thuolo mar konyo jomamoko.” Ne wang’ado ni wadhi luwo ranyisigi.

Gikone ne wadok Côte d’Ivoire, kata kamano, lweny nochako omuoch kendo. Omiyo, e dwe mar Novemba 2004, nodarwa gi helikopta ka ng’ato ka ng’ato kuomwa oting’o mana bag achiel. Ne wanindo e dier ot e kambi mar jolweny mag France kendo kinyne noterwa nyaka Switzerland. Ka ne wachopo e ofiswa chiegni sa auchiel gotieno, owete manie Komiti mar Bad Ofis, kaachiel gi owete ma ne puonjo Skul mar Tiego Owete e Tije Kanyakla kod mondegi norwakowa gi mor. Ne gikwakowa kendo ne gimiyowa chiemo maliet kaachiel gi chokolet mag Switzerland. Wachno nojiwowa ahinya!

Ne omiwa migawo e piny Ghana kuom kinde, kae to bang’e ne wadok e piny Côte d’Ivoire ka ne lweny orumo. Yo ma owete gi nyimine ne onyisowago ng’wono nokonyowa ahinya e kinde mag tungnigo kod e migepewa ma ne siko ka lokore. Kata obedo ni ne wang’eyo ni jotich Jehova gin joma oherore, ne wang’ado ni ne ok wadhi kawo herano ka gima pile. Ne wapuonjore weche mathoth ahinya e kinde mag tungnigo.

WADHI E PINJE MAN MIDDLE EAST

E higa mar 2006, ne wayudo barua mowuok e ofiswa maduong’ ma ne nyiso ni wayudo migawo manyien e alwora mar Middle East. Mano ne nyiso ni nyaka ne waikre ne pek manyien, dhi kuonde ma pok ne wadhiega, puonjruok dhok manyien, kendo ng’iyo gi ngima kod kit oganda manyien. Ne wadhi puonjore gik mang’eny e alwora ma ne nitie pogruok nikech weche din kod siasa. Kata obedo ni owete gi nyimine ma ne wan-go e kanyakla ne wacho dhok mopogore opogore, ne gin gi winjruok maber e kindgi nikech ne giluwo kaka riwruok mag oganda Jehova tayowa. Ne wahero owetego nikech thothgi ne nyagore gi akwede mowuok kuom joodgi, joskul wetegi, joma gitiyogo, kod jirendegi.

E higa mar 2012 ne wadhi e chokruok moyiedhi ma notim Tel Aviv, e piny Israel. Mano e chokruok maduong’ ma jotich Jehova nohango timo e alworano nyaka ne tim Pentekost mar 33 B.K. Mano ne en chokruok makende adier!

E kindeno, noorwa dhi limo piny moro ma tijwa ogoye marfuk. Ne wadhi gi moko kuom bugewa, ne walendo e pinyno, kendo ne wadhi nyaka e chokruoge kuno. Jolweny moting’o bunde ne nitie kamoro amora. Kata kamano, ne wamor nikech jolendo manok ma ne wan-go nokonyowa timo gik moko e yor rieko.

WADOK AFRIKA

E higa mar 2013, ne wayudo migawo machielo mar dhi tiyo e ofiswa man Kinshasa e piny Congo ma en piny ma jaber ahinya. Kata kamano, thoth ji odhier kendo pinyno opong’ gi lwenje ma kinde ka kinde. Mokwongo okwongo ne wawacho ni, “Wang’eyo Afrika maber, kendo waikore dhi kuno.” Kata kamano, pod ne dwarore ni wapuonjre weche mathoth, to moloyo kaka wanyalo dak e piny ma onge nderni kod daraja mabeyo. Kata obedo ni thoth jolendo nodhier, mor kod kinda margi nojiwowa ahinya. Ne gihero tij lendo, ne gidhiga e chokruoge mag kanyakla, kod e chokruoge mag alwora. Ne waneno gi wang’wa kaka ji mathoth ne rwako adiera nikech Jehova ne guedho tije. Higni ma ne watiyogo ne Jehova gi thuolowa duto e piny Congo nopuonjowa weche mathoth, kendo ne wamako osiep gi owete gi nyimine mang’eny ahinya.

E giko higa mar 2017, ne wayudo migawo manyien e piny South Africa. Mano e ofis maduong’ie mogik ma wasetiye. Bende, migepe ma nomiwa kuno ne nyienwa. Ne wayudo kendo thuolo mar puonjore gik manyien, kata kamano, gik ma nosetimorenwa kinde mokalo nokonyowa ahinya. Ne wamor tiyo gi owete gi nyimine mosetiyo ne Jehova kuom higni mang’eny. Bende, wamor ahinya neno kaka owete gi nyimine manie Bethel tiyo kanyachiel kata obedo ni giwuok e pinje mopogore opogore kendo kit ngimagi bende opogore. Jehova guedho joge gi kuwe sama gitemo matek mondo giluw puonj mag Muma kendo nyiso kido mag Jokristo.

Kuom higni mang’eny, an gi Debbie waseyudo migepe mopogore opogore, wasepuonjore kit ngima manyien, kendo wasepuonjore dhok mang’eny. Kata obedo ni waseromo gi pek moko, waseneno kaka Jehova nyisowa herane mogundho kokalo kuom riwruokne kaachiel gi owete gi nyimine. (Zab. 144:2) Wasepuonjore gik mang’eny nikech ne wachiwore tiyo ne Jehova kuom thuolowa duto, kendo mano osekonyowa bedo gi kido mabeyo.

Agoyo erokamano ahinya ne jonyuolna, jaoda Debbie, kod owete gi nyimine mang’eny moseketonwa ranyisi maber. Kaka wamedo sudo nyime, wang’ado e chunywa ni wabiro dhi nyime rwako puonj ma Japuonjwa Maduong’ miyowa.