Rahab Pando Joma ne Oor Nono Piny

JOMA inenogi ni e chandruok. Nyaka giring gia ka, nono to ibiro neggi. Gin jonon wach moa Israel, to dhako ma konyogino en Rahab. Rahab odak kae, e ot ma omakore gi ohinga dala mar Jeriko. We mondo wane gimomiyo jogi odonjo e chandruok.

Jo-Israel oikore mar ng’ado Aora Jordan mondo gidonj e piny Kanaan. To ka pok gitimo mano, Joshua ooro ji ariyo mondo odhi onon ane pinyno. Onyisogi ni: ‘Dhiuru, unon ane pinyno kod dala mar Jeriko.’

Ji ariyogo kane odonjo Jeriko, ne gidhi e od Rahab. Kata kamano, ng’ato nyiso ruodh Jeriko ni: ‘Jo-Israel moko ariyo ne odonjo ei dala ka gotienoni mondo ginon piny.’ Ka ruoth oyudo wachno, ooro ji ir Rahab, kendo gichike ni: ‘Gol oko joma ne obiro e odi kanyo!’ Kata kamano, Rahab opandogi e wi tat ode. Kuom mano, koro owacho ni: ‘Jomoko ne obiro e oda kae, to ok ang’eyo kama giaye. Ne gidhi mana ka piny dwaro yuso, ka pok olor dhorangach mar dala. Ka ulawogi matek, to unujukgi!’ Kuom mano, jogo koro lawogi.

Ka joma ne omonjego osea, Rahab idho wi tado mapiyo piyo. Onyiso Jo-Israel-go ni: ‘Ang’eyo ni Jehova biro miyou pinyni. Wasewinjo kaka ne omiyo pi Nam Makwar oduono kane ua Misri, kendo kaka ne unego ruodhi mag Sihon gi Og. Asenyisou ng’wono, omiyo asayou ni mondo usingruna ni ubiro nyisa ng’wono. Resuru wuora gi minwa, kod owetena gi nyiminena.’

Jootego singorene ni ginitim kamano, to mak mana ni, Rahab nyaka tim gimoro. Ginyise ni: ‘Kaw tol makwarni, kendo itweye e dirisa mar odi, ma ichok wedeni duto mondo gibed kodi e odi kae. Kendo chieng’ ma waduogo monjo Jeriko, wabiro neno tolni e dirisa mar odi, kendo ok wabi nego ng’ato ang’ata e odi kae.’ Jootego kane odok ir Joshua, ne ginyise gik moko duto ma ne otimore.