Ohinga mag Jeriko

ANG’O mamiyo ohinga mag Jeriko podho? Chalo ka gima mbom maduong’ ogoyogi. Kata kamano, e ndalogo ne gionge gi mbom; ne gionge kata gi bunde. En hono machielo mar Jehova kendo! We wapuonjre kaka gino ne otimore.

Winj gima Jehova nyiso Joshua: ‘Inilwor dalano gi jogi mag lweny. Lwore dichiel odiechieng’ kodiechieng’, kuom ndalo auchiel. Uting’ sandug singruok seche ma utimo mano. Jodolo abiriyo nyaka wuoth e nyim sandug singruok kendo ka gigoyo tungegi.

‘To chieng’ mar abiriyo, nyaka ilwor dalano nyadibiriyo. Kendo igo tung’ dichiel matek, to ji duto ogo koko gi dwol maduong’. Kendo ohinga nopodhi piny!’

Joshua kaachiel gi ji duto timo gima Jehova wacho. E seche ma gilworo, ji duto oling’ thi. Onge ng’ama wacho kata wach achiel. Koko ma inyalo winj, en mana mar tunge kod tiendegi ma nyono piny ka giwuotho. Nyaka bedni luoro ne omako josik Nyasaye modak Jeriko. Be inyalo neno tol makwar moliero e dirisano? Mano diris ng’a? Ee, Rahab otimo gima ne owachne ni mondo otim gi joma ne oor nono piny. Joodgi duto ni e ode ka girito kode.

Gikone, chieng’ mar abiriyo bang’ lworo dalano nyadibiriyo, igoyo tunge, jolweny goyo koko matek, kendo ohingago podho. Kendo Joshua wacho: ‘Neguru ji duto manie dalano kendo uwang’ dalano. Uwang’ gik moko duto. Ures mana fedha, dhahabu, mula to gi nyinyo, kendo uchiwgi e kar keno mar hemb Jehova.’

Joshua nyiso joote ariyoka ni: ‘Dhiuru e od Rahab, kendo ugole oko en gi joode duto.’ Ireso Rahab gi joode mana kaka jonon piny ariyoka ne osingorene.