SOMO MAR 3
Rahab Noyie Kuom Jehova
Wakaw ane ni wan e dala mar Jeriko. Dala mar Jeriko nie piny Kanaan kama ji ok oyie kuom Jehova. Dhako moro miluongo ni Rahab odak e dalano.
Kane Rahab pod tin, ne owinjo sigendni e wi kaka Musa ne opogo Nam Makwar kendo kaka ne ogolo Jo-Israel wuok Misri. Nowinjo bende kaka Jehova ne okonyo Jo-Israel loyo jowasikgi e lweny. Koro to owinjo ni Jo-Israel ogoyo kambi machiegni gi dala mar Jeriko!
Rahab nopando joote mag Jo-Israel nikech ne oyie kuom Jehova
Chieng’ moro godhiambo, Jo-Israel moko ariyo donjo e dala mar Jeriko mondo ginon kaka ginyalo monjo dalano. Gidonjo e od Rahab. Kendo Rahab rwakogi. Kochopo gotieno, ruodh Jeriko fwenyo ni nitie joote ariyo mag Jo-Israel manie dalano kendo ni gin e od Rahab. Omiyo, ruodhno oro jotichne mondo odhi omak Jo-Israelgo. Rahab pando Jo-Israelgo e wi tat ode kae to onyiso joma ne ruoth oorogo niya: ‘Jo-Israelgo ne ni ka, kata kamano, gisedhi. To ka ulawogi sani, unyalo jukogi!’ Be ing’eyo gimomiyo Rahab ne opando Jo-Israelgo?— Notimo kamano nikech ne oyie kuom Jehova kendo ne ong’eyo ni Jehova ne dhi miyo Jo-Israel piny Kanaan.
Ka pok Jo-Israelgo owuok e od Rahab, gisingone ni en kaachiel gi joodgi ne gidhi kwo sama iketho dala mar Jeriko. Be ing’eyo gima ginyise mondo otim?— Ginyise niya: ‘Kaw tol ma kwarni kendo iliere oko mar dirisha mar odi. Kitimo kamano, ji duto manie odi biro tony.’ Rahab timo mana kaka onyise. Be ing’eyo gima ne otimore bang’ mano?—
Jehova noreso Rahab gi joodgi
Ndalo matin bang’e, Jo-Israel wuotho ka lworo dala mar Jeriko ka giling’ thi. Gilworo dalano kamano dichiel odiechieng’ kodiechieng’ kuom ndalo auchiel. To e odiechieng’ mar abiriyo, gilworo dalano nyadibiriyo. Bang’ lworo dalano dibiriyo, gigoyo koko matek kanyachiel. Jehova miyo ohinga molworo dalano gore piny. Kata kamano, ot ma tol makwar olieroe dong’ kochung’ kare! Be inyalo neno odno e pichani?— Ores Rahab kaachiel gi joodgi!
Ang’o minyalo puonjori kuom Rahab— Rahab noyie kuom Jehova nikech gik mabeyo duto ma ne opuonjore e wi Jehova. In be ipuonjori gik mang’eny mabeyo e wi Jehova. Be iyie kuom Jehova kaka Rahab noyie kuome?— Wang’eyo ni in be iyie kuom Jehova!