Keto Geno Kuom Nyasaye

JI GANA gi gana ni e wuoth maborno mar wuok Babulon nyaka Jerusalem. To ka gichopo Jerusalem, giyudo ka dalano okethore ahinya. Onge ng’at ma odak e iye. Jo-Israel nyaka chak gero gik moko duto kendo.

Achiel kuom gik ma gikwongo gero, en kendo mar misango. Mani e kama ginyalo timoe misengini mag le, kata golo chiwo ni Jehova. Bang’ dweche matin, Jo-Israel chako gero hekalu. Kata kamano, wasigu modak e pinje machiegni ok dwar ni Jo-Israel oger hekalu. Kuom mano, gitemo bwogogi mondo giwe. Gikone, wasigu-gi miyo ruoth manyien mar Persia loso chik ma chungo tij gedono.

Higini kalo. Koro higini 17 osekalo nyaka ne Jo-Israel duogi koa Babulon. Jehova oro jonabi mage, Haggai kod Zekaria mondo onyis ji ochak gedo kendo. Ji keto geno kuom Nyasaye, kendo giwinjo jonabigo. Gichako gedo kendo, kata obedo ni nitie chik moro mawacho ni ok onego gitim kamano.

Kuom mano, jatij pinyruodh Persia ma nyinge Tattanai biro, kendo openjo Jo-Israel kama giyude chik mar gero hekalu. Jo-Israel nyise ni kane gin Babulon, Ruoth Kuros ne owachonegi ni: ‘Koro dhiuru Jerusalem mondo uger hekalu mar Jehova Nyasachu.’

Tattanai oro barua Babulon mondo openj ka Kuros makoro ne osetho, nowacho kamano. Bang’ ndalo matin, barua biro mowuok kuom ruodh Persia makoro ni e telo. Baruano wacho ni, Kuros ne owacho kamano adier. Kuom mano, ruoth ndiko kama: ‘Weuru mondo Jo-Israel oger hekalu mar Nyasachgi. Kendo achikou ni mondo ukonygi.’ Bang’ higini ang’wen kama, gero hekalu rumo, kendo Jo-Israel mor ahinya.

Higini moko mang’eny kalo. Chiegni higini 48 osekalo nyaka ne tiek gero hekalu. Joma odak Jerusalem odhier, kendo dalano kaachiel gi hekalu mar Nyasaye ok nen maber. Chien e Babulon, Ezra ma Ja-Israel nwang’o ni dwarore mondo hekalu mar Nyasaye otiek maber. Be ing’eyo gima otimo?

Ezra dhi to neno Artashashta ruodh Persia, kendo ruoth maberni miyo Ezra mich mang’eny mondo odog godo Jerusalem. Ezra kwayo Jo-Israel man Babulon mondo okonye ting’o gigo nyaka Jerusalem. Ji madirom 6,000 wacho ni gibiro dhi. Gin kod fedha, dhahabu koda gik moko mang’eny ma nengo-gi tek monego gidhi godo.

Ezra chunye chandore nikech nitie jo maricho e yo ma gidhi luwo. Jogi nyalo mayogi fedha gi dhahabu ma kendo neg-gi. Kuom mano, Ezra choko ji kanyakla, mana kaka inyalo neno e pichano. Bang’e, gikwayo Jehova mondo oritgi e wuodhgi mabor mar dok Jerusalem.

Jehova ritogi. Kendo bang’ wuotho kuom dweche ang’wen, gichopo maber Jerusalem. Donge mani nyiso ni Jehova nyalo rito jogo ma keto geno margi kuome mondo okonygi?