Timotheo Bedo Jakony Paulo

RAWERA mineno gi jaote Paulo kae, en Timotheo. Timotheo odak Lustra kod joodgi. Nying min mare en Yunike, to dan mare en Lois.

Mani en limbe mar adek ma Paulo osetimo Lustra. Kuom kinde madirom higa achiel mosekalo, Paulo gi Baraba ne okwongo biro kae e tij lendo. Kendo koro Paulo oduogo ka en kod osiepne ma Sila.

Be ing’eyo gima Paulo wacho ni Timotheo ka? Paulo penje ni: ‘Be diher dhi koda kaachiel gi Sila? Inyalo konyowa e lando wach ne jogo modak kuonde maboyo.’

Timotheo dwoko ni: ‘Ee, daher dhi.’ Mapiyo bang’ mano, Timotheo weyo joodgi, kendo odhi kod Paulo kaachiel gi Sila. Kata kamano, ka podi ok wawuoyo e wi wuodhgi, we mondo wanon ane gima osebedo ka timore ni Paulo. Higini madirom 17 koro osekalo nyaka ne Yesu fwenyorene e yo ma dhi Damaski.

Par bende ni, Paulo ne obiro Damaski mondo ohiny jopuonjre Yesu, kata kamano en owuon koro en japuonjre Yesu! Bang’e, wasigu moko chano nego Paulo nikech ok gihero puonjne e wi Yesu. Kata kamano, jopuonjre konyo Paulo e pondo. Gikete e adita, kendo gilore piny oko mar ohinga mar Damaski.

Bang’ mano, Paulo dhi Antiokia mondo oland wach. Kae ema ikwongo luongoe jopuonjre Yesu ni Jokristo. Paulo gi Barnaba bang’e ioro wuok Antiokia nyaka e pinje man mabor mondo gidhi gilendi. Achiel kuom kuonde ma gilimo en Lustra, dalagi Timotheo.

Koro, bang’ kinde madirom higa achiel, Paulo duogo Lustra e wuodhe mar ariyo. Seche ma Timotheo gi Paulo kod Sila chako wuodhgi, be ing’eyo ni gidhi kanye? Ng’i ane map man kanyo, mondo wapuonjre moko kuom kuonde ma ne gidhiye.

Mokwongo, gidhi kama chiegni miluongo ni Ikonio, bang’e gidhi e dala mar ariyo miluongo ni Antiokia. Bang’ mano, giwuotho nyaka Troa, bang’e gidhi Filipi, Thessalonika kod Beria. Be inyalo neno Athene e map kanyo? Paulo lendo kanyo. Bang’ mano, gilendo Korintho kuom higa achiel gi nus. Gikone, girawo Efeso kuom kinde matin. Bang’e, giidho yie ka giduogo Kaisaria, kendo giwuotho nyaka Antiokia, kama Paulo dakie.

Kuom mano, Timotheo wuotho mail mang’eny ahinya kokonyo Paulo e lando “wach maberni” kendo e chako kanyakla mang’eny mag Jokristo. Ka ibedo ng’a maduong’, be ibiro bedo jatich Nyasaye mochung’ motegno kaka Timotheo?