Paulo gi Timotheo

Timotheo ne en rawera e kanyakla mar Lustra. Wuon-gi ne Ja-Grik, to Yunike min-gi ne en nya Jo-Yahudi. Da mare ne nyinge Lois. Yunike gi Lois nochako puonjo Timotheo weche Jehova ka Timotheo pod ne tin ahinya.

Ka ne Paulo odhi Lustra e wuodhe mar ariyo mar lendo, ne ofwenyo ni Timotheo ne ohero owete ahinya, kendo ne ochiwore konyogi. Paulo ne ogwelo Timotheo mondo odhi kode e wuodhene. Kaka Paulo ne medo tiyo gi Timotheo, e kaka Timotheo ne medo bedo molony e lando wach maber kod puonjo.

Roho maler ne tayo Paulo gi Timotheo kamoro amora ma ne gidhiye. Chieng’ moro gotieno, Paulo ne oneno ng’at moro e fweny ka nyise mondo odhi okonygi Makedonia. Kuom mano, Paulo, Timotheo, Sila, gi Luka ne odhi Makedonia, kendo ne gilendo kuno ma gichako kanyakla mang’eny.

E taon mar Thesalonika ma ne ni Makedonia, chwo kod mon mang’eny ne obedo Jokristo. Kata kamano, Jo-Yahudi moko ne neno ne Paulo kod jowetene nyiego. Jo-Yahudigo ne ochoko ji mondo okel koko, mi gimako owetego kendo ywayogi nyaka ir jotend taondno ka gikok niya: ‘Jogi gin jowasik loch Rumi!’ Nikech Paulo gi Timotheo ne neno ni ne inyalo hinygi kata neggi, ne gia kanyo mapiyo mi gidhi Beria.

Jo-Beria ne nigi siso mar puonjore wach maber, kendo Jo-Grik gi Jo-Yahudi ma ne ni kuno ne oketo yie kuom Yesu. Kata kamano, Jo-Yahudi moko ne oa Thesalonika, kendo ne gikelo koko kuno. To mano ne omiyo Paulo owuok odhi Athens. Timotheo gi Sila to ne odong’ Beria mondo gimed jiwo owete. Bang’ kinde, Paulo nooro Timotheo mondo odog Thesalonika ojiw owete ma ne nyagore gi sand kuno. Kae to, Paulo ne ooro Timotheo mondo olim kanyakla mamoko mang’eny kojiwogi.

Paulo nonyiso Timotheo kama: ‘Ng’ato ang’ata ma dwaro tiyo ne Jehova ibiro sandi.’ Ne osand Timotheo, kendo ne otueye e jela nikech yie mare. To mano ne ok onyoso chunye nikech nong’eyo ni sand ne miye thuolo mar nyiso okang’ ma ne omakorego gi Jehova.

Paulo nondiko ne Jo-Filipi kama: ‘Ero aoro Timotheo iru. Obiro puonjou kaka onego uwuoth e adiera, kendo obiro tiegou e tij lendo.’ Paulo ne ong’eyo ni Timotheo ne en ng’ama inyalo gen. Paulo gi Timotheo ne otiyo kanyachiel kuom higni mang’eny, kendo ne gin osiepe ahinya.