Dwol Moromo

KAPO ni jagol-twak ok wuo gi dwol moromo, nong’no nyalo chako kawo jowinjo. Ka jalendo wuoyo gi dwol mapiny ahinya sama olendo, mano nyalo miyo pach wuon ot otangni. To e chokruoge mag kanyakla, ka jowinjo ok chiw paro gi dwol moromo, jomoko ok bi yudo jip madwarore ni giyud. (Hib. 10:24, 25) To bende, kapo ni jagol-twak ting’o dwonde sama ok owinjore, mano nyalo chando jowinjo—kata nyalo wang’o igi.—Nge. 27:14.

Ng’e Chal mar Jowinjo Magi. Jowinjoni gin ng’a? en ng’ato achiel? gin grup mar joot? gin grup matin mochokore e romo mar dhi lendo? en kanyakla mangima? koso chokruok maduong’ mar distrikt? En adier ni dwol moromo e chal moro nyalo bedo ni ok owinjore e chal machielo.

Jotich Nyasaye osewuoyo e nyim jowinjo mang’eny kinde mogwaro. E ndalo Suleman, kane iwalo hekalu mane ni Jerusalem, ne onge gige kowo dwol. Omiyo Suleman nochung’ e ndiri moting’ore malo ma ogwedho ji kotiyo “gi dwol maduong’.” (1 Ruo. 8:55; 2 Weche 6:13) Higini miche bang’e, kane oseol roho maler chieng’ Pentekost 33 E.N., oganda maduong’—ma noriwo joma ne rwako Wach, koda joma ne jaro—nolworo Jokristo matin ma noyudo ni Jerusalem. Kotiyo gi rieko madier, Petro ‘nochung’ moting’o dwonde.’ (Tich 2:14) Mano kaka ne en neno motim motegno!

Inyalo ng’eyo nade ka dwol mitiyogo oromo chal mantie? Gimaber moloyo manyalo konyi ng’eyo mano, en ng’iyo kaka jowinjo timo. Kapo ni ineno ni moko kuomgi chandore ka gitemo winjo gima iwacho, onego item ting’o dwondi.

Bed ni iwuoyo gi ng’ato achiel kata gi ji buora, ber ng’eyo chal margi. Kapo ni nitie ng’at ma ite nok, nyalo dwarore ni iting’ dwondi malo. Kata kamano, goyo koko nikech idwaro ni joma oti ma itgi nok owinji, ok bi miyo gimor kodi. Kendo inyalo kaw ni mano en achaye. E kit oganda moko, ikawo ni wuoyo gi dwol mamalo ahinya nyiso ni ng’ato iye owang’ kata ni ool gi jowinjo.

Ng’e Koko Manyalo Bedo e Alwora. Sama ilendo, onge kiawa ni chal miromogo konyi ng’eyo dwol moromo monego iwuogo gi ji. Gik manyalo kelo koko gin, mtokni makadho, nyithindo matugo, guogi magweyo, thum kata televison ma dwondgi ni malo. Bende kuonde ma udi ni machiegni, wuoyo gi dwol mamalo ahinya nyalo kuodo wi wuon ot nikech jomamoko winjo.

Owete magolo twege e kanyakla kata e chokruoge distrikt bende nyaka nyagre gi chal mopogore opogore. Wuoyo gi jowinjo mantie oko opogore gi golo twak ne jowinjo manie ot moger e yo mamiyo dwol winjore maler. E piny Latin Amerka, jomisonari ariyo nonywako mondo gigol twak mar ji duto e laru mar dala jal moro, to ne nitie nyasi moro ma ji ne goyoe koko machiegni gi kanyo, kendo gweno moro bende ne siko kakok machiegni gi kanyo!

Sama twak dhi nyime, gimoro nyalo timore madwaro ni ng’ato oling’ matin nyaka koko odog chien, to ka ok kamano, omed ting’o dwonde. Kuom ranyisi, kapo ni tat od chokruok en mabati, to koth mang’eny ochako chwe, winjo gima jagol-twak wacho nyalo bedo matek ahinya ne jowinjo. Nyathi maywak kata chochni moro mabedoe nikech joma olewo bende nyalo chendo. Ng’e kaka inyalo timo mondo chochni mabedoe kik mon jowinjo magi yudo ber chuth kuom gik miwacho.

Gige kowo dwol nyalo konyo kapo ni giyudore, to, mano ok onyiso ni jagol-twak ok onego oting’ dwonde ka chal moro dwaro ni otim kamano. Kuonde moko ma stima jalal, chuno jogol-twak mondo odhi nyime wuoyo ka ok oti gi maikrofon.

Ng’e Wach Miwuoyo Kuome. Chal mar wach miwuoyo kuome biro chiko dwol moromo madwarore ni itigo. Ka gima iwuoyoe onego owach motegno, kik iwache mayom yom. Kuom ranyisi, sama isomo kum manie Muma, dwondi onego obed motegno mohewo sama isomo puonj kuom kaka onego onyis hera. Lok dwondi kaluwore gi gima iwacho, to tang’ kik ilok dwondi e yo mamiyo ji keto pachgi ahinya e yo miwuoyogo.

Ng’e Gimidwaro Chopo. Kidwaro jiwo chuny jowinjo magi mondo gitim gimoro gi kinda, nyalo dwarore ni iti gi dwol mojing’. Kapo ni idwaro ni gilok paro ma gin-go, kik iti gi dwol mamalo manyalo miyo chunygi ojog kodi. Kapo ni itemo hoyo chuny ng’ato, ber tiyo gi dwol mayom.

Ting’o Dwol Kaka Owinjore. Sama itemo luongo ng’at modich, kinde mang’eny ting’o dwol ema konyo. Jonyuol ong’eyo mano, omiyo sama giluongo nyithindgi matugo, giting’o dwondgi. Ting’o dwol nyalo dwarore sama jakom kwayo kanyakla kata joma nie chokruok maduong’ oikre ne program. Sama jolendo nie tij lendo, ginyalo ting’o dwondgi ka gimoso joma gidhi lendonegi kapod gin mabor.

Kata ka isemako pach ng’ato, pod dwarore ni idhi nyime tiyo gi dwol mawinjore moromo. Wuoyo gi dwol mapiny ahinya nyalo miyo jowinjo opar ni ng’ato ok oikore maber kata ni ok en gadier gi gima owacho.

Ting’o dwol kinyiso ji kaka onego gitim, nyalo miyo gikaw okang’. (Tich 14:9, 10) Kamano bende, kwero gimoro gi dwol mamalo nyalo geng’o masira. E dala mar Filipi, jarit od tuech ne chiegni dere nikech noparo ni jomotue oseringo. ‘Paulo nokok gi dwol maduong’ niya: “Kik itimri marach; wantie waduto!”’ Mano noreso ng’atno kik odere. Kae to Paulo gi Sila nolendone kaachiel gi joode, ma giduto ne girwako adiera.—Tich 16:27-33.

Ng’eyo Wuoyo gi Dwol Moromo. Kuom jomoko, dwarore ni gitim kinda ahinya mondo ging’e wuoyo gi dwol moromo. Ng’ato nyalo wuoyo gi dwol matin nikech dwonde yomyom. Kata kamano, kuom timo kinda, onyalo timo dongruok kata obedo ni en gi dwol matin. Non kaka igamo muya, kendo kaka ichung’ koda kaka ibet. Puonjri bet tir kata chung’ tir. Chor kori nyime kae to igam muya matut. Tem ahinya mondo ipong’ piny oboyeni gi muya. Muyani ema kochik maber, konyi chiko dwol miwuoyogo.

Jomoko to nyawo margi en wuoyo matek ahinya. Nyalo bedo ni ne giyudo timni nikech ne gitiyo kama koko ng’enyie. To komachielo, nyalo bedo ni gia kama ji duto wuoyo matek kendo laro mbaka en tim mapile. Omiyo, gineno ni mondo owinjgi e mbaka, nyaka giwuo matek moloyo jomoko. Kaka gimedo tiyo gi puonj mayudore e Muma madwaro ni gibed “gi miwafu, ng’wono, paro mamuol, muolo, kod horuok,” gibiro timo lokruok e dwol ma gitiyogo sama gigoyo mbaka.—Kol. 3:12.

Timo ikruok maber, bedo gi lony momedore nikech lendo pile, kendo kwayo Jehova e lamo, biro konyi wuoyo gi dwol moromo. Bed ni iwuoyo gi ji ka in e ndiri kata gi ng’ato achiel e tij lendo, tem keto chunyi duto kuom kaka jomoko nyalo yudo kony kuom gima iwacho.—Nge. 18:21.