Loko Dwol

JIWO tiend weche kare konyo jowinjo ng’eyo tiend gima iwacho. Kata kamano, kiloko dwondi kaka dwarore e yore mopogore opogore, kaka ting’o kata dwoko dwondi piny, wuoyo mos kata piyo, kendo loko bith mar dwondi, twagi biro bedo mamit winjo. To moloyo, timo kamano nyalo nyiso jowinjo kaka ineno wach miwuoyoeno. Chuny ma in-go kuom gima iwacho nyalo miyo gin bende girwak kata kik girwak wechego. Mani en adier bed ni iwuoyo e ndiri, kata iwuoyo gi ng’ato e tij lendo.

Dwond dhano en gima jaber miwuoro manyalo lokore e yore mopogore opogore sama ng’ato wuoyo. Ka oti kode maber, onyalo miyo twak kik obed motwo, to omul chuny ji, kendo omi ji okaw okang’. Kata kamano, ok inyal chopo mago mana kuom kiewo kuonde mibiro ting’oe kata dwokoe dwondi piny, wuoyoe mos kata piyo, kata lokoe bith mar dwondi. Loko dwol kuonde mikiewogo biro nenore mana ka lokruoge miriyo gi thuon. Kar miyo twagi okakni gi ilo madwarore, inyalo miyo jowinjo obed mogut ka giwinji. Loko dwol kaka dwarore en gima wuok e chuny ng’ato.

Loko dwol e yo maber, miyo ji oket pachgi ahinya kuom gimiwacho to ok kuomi. Mano biro miyo weche miwacho odonj ne jowinjo kaka dwarore.

Ti gi Dwol Moromo. Yo achiel minyalo lokogo dwondi, en kuom ting’e malo kata dwoke piny. To ok en mana ting’o kata dwoko dwondi piny kinde ka kinde maonge gimomiyo. Timo kamano nyalo ketho tiend gima iwacho. Kapo ni iting’o dwondi nyading’eny, mano nyalo sino jowinjo.

Ting’ kata dwok dwondi piny kaluwore gi weche miwuoyoe. Ber ting’o dwondi sama isomo chik madwaro ni okawne okang’ mapiyo, kaka mayudore e Fweny 14:6, 7 kata e Fweny 18:4, kata sama isomo weche manyiso ni ng’ato ni gadier motegno kaka mayudore e Wuok 14:13, 14. Kamano bende, kapo ni isomo kum motegno mayudore e Muma kaka manie Yeremia 25:27-38, ting’o kata dwoko dwondi piny sama isomo weche moko sie biro konyi jiwogi e yo motegno.

Ng’e bende gimidwaro chopo. Be en jiwo jowinjo okaw okang’? Be en miyo puonj madongo onere ayanga? Medo dwol e yo mariek, biro konyi chopo wechego. Kata kamano, ting’o mana dwondi malo ok bi konyi chopo gimidwaro. Nikech ang’o? Gima nyalo dwarore en nyiso chuny madwarore to ok ting’o dwondi malo. Wabiro puonjore wachni e Lony mar 11.

Dwoko dwol piny gi rieko nyalo miyo ji obed gi siso mar winjo gima idwa wachi. To mano jadwaro ni ng’ato oti gi dwol motegno mapiyo bang’ wuoyo gi dwol mapiny. Dwoko dwol piny kaachiel gi jiwo dwol, nyalo konyo e nyiso luoro kata kibaji. Dwol mapiny bende nyalo nyiso ni gima iwachono ok en gima duong’ kaka weche molwore. Kapo ni dwondi ni piny kinde duto, mano nyalo nyiso ni ok in gadier kata ni ok iketo chunyi kuom weche miwacho. Onge kiawa ni dwol mapiny ahinya onego otigo e yo mariek.

Dhi Mos Kata Dhi Piyo. E mbaka mapile, sama wanyiso gima nie pachwa, weche biro abira kendgi. Sama wan gi ilo, wajowuoyo aruya. Sama wadwaro ni jomoko opar maler gik ma wawacho, wajodhi mos.

Kata kamano, ng’eny joma nyien e golo twak ok lok dwondgi odhi mos kata piyo sama gigolo twak e ndiri. Nikech ang’o? Giketo pachgi ahinya kuom kaka weche biro wuok. Samoro gindiko wechego duto piny. Kata kapo ni twak ok en misomo achiel kachiel, ginyalo mako weche duto mag twagno e wigi. Nikech mano, loko dwondgi gidhi piyo kata mos, tamogi. Ng’eyo tiyo gi weche machuok matayogi nyalo konyogi loyo nyawono.

Kik iting’ dwondi apoya kaka mbura dum apoya gi ng’wech koneno guok. Kendo kik iwuo aruya ahinya mamiyo wecheni ok wuog maler.

Mondo ilok dwondi odhi piyo kata mos kaka dwarore, kik ibwogri idhi piyo kata mos maonge gimomiyo. Kar bero gimiwacho, wuoyo ma kamano biro golo pach ji kuom weche miwacho. Wuoyo piyo kata mos onego oluwre gi gima iwacho, chuny madwarore ne wechego, koda gima idwaro chopo. Gol twak mari maok idhi mos ahinya to bende ok irikni. Mondo inyis ilo, wuo piyo piyo mana kaka itimo e mbaka mapile. Timo kamano owinjore bende sama iwacho weche maok pek ahinya kata ilero weche matindo tindo maok ochuno. Mano biro medo twagi ndhadhu kendo miyo kik obed motwo. To komachielo, weche mapek, puonj madongo, koda weche ma gin mise twak, dwaro ni ng’ato oler kodhi mos.

Lok Bith mar Dwondi. Kaw ane ni ng’ato goyo gir thum kuom sa achiel. Kindeno duto ogoyo mana kit dwol achiel—ochako malo kae to piny, odhi aruya kae to odhi mos. Kata obedo ni oketo lokruokgo, ‘thumno’ ok bed mamit ahinya nikech ok olok bith mar kit dwol mogoyo. Kamano bende, ka ok walok bith mar dwol mwatiyogo, dwondwa ok bi moro jowinjo.

Ber ng’eyo ni lokruok mitimo e bith mar dwol ok chop weche machal e dhok duto. E dhok ma tiend wach lokore kaluwore gi dwol moluonggo wach kaka Dholuo, loko bith mar dwol nyalo loko tiend wach. Kata mana e dhok ma kamago, nitie gik ma ng’ato nyalo timo mondo omed ndhadhu e kit dwonde. Onyalo medo ndhadhu e kit dwonde to pod oket dwonde olokre e okenge madwarore. Omiyo, onyalo luongo weche moko gi dwol mamalo kata gi dwol mapiny kapo ni owinjore.

Kata e dhok ma tiend wach ok lokre kaluwore gi dwol moluonggo wach, loko bith mar dwol nyalo chiwo paro mopogore. Kuom ranyisi, inyalo jiw tiend wach kuom medo bith mar dwol kaachiel gi ting’o dwol malo. Loko bith mar dwol nyalo nyiso kaka kamoro ni mabor kata kaka gimoro duong’. Tieko sentens gi dwol mabith nyalo nyiso ni ipenjo penjo. Dhok moko to dwaro ni ng’ato odwok dwonde piny e giko sentens.

Ilo gi mor inyalo nyis kuom tiyo gi dwol mabith. (E dhok ma tiend wach lokore kaluwore gi dwol miluongogo wach, nyalo dwarore ni olok dwol e yore mang’eny.) Nyiso kuyo koda kibaji nyalo dwaro ni ng’ato oduok bith mar dwonde piny. (To e dhok ma tiend wach ok lokre kaluwore gi kaka iluongo wach, ok onego olok dwol ahinya.) Weche moler kae manyiso kaka ng’ato winjo e chunye, ema konyo jagol-twak omul chuny ji. Sama idwaro wachogi, kik iwach awacha wechego. Ti gi dwondi e yo manyiso ni wechego odonjoni.

Keto Mise. To kare loko dwol chakore gi kanye? Ochakore sama iyiero weche mibiro tiyogo e golo twagi. Ka twagi oting’o mana weche masiro wach moro, kata kapo ni oting’o mana jip kende, ok ibi bedo gi thuolo mar loko dwondi sama igolo twak. Omiyo, non weche twagi kendo ne ni in gi weche madwarore mondo igol twak man gi ndhadhu kendo mapuonjo.

Wakaw ni in e chuny golo twak, to ineno ni twagi otwo kendo dwarore ni imedne ndhadhu. Onego itim ang’o? Lok kaka igole. Nade? Yo achiel en elo Muma, gwelo jowinjo mondo otim kamano, kendo isom ndiko kar mana wuoyo. Kata lok wach moro obed penjo kendo iling’ matin mondo ijiw wachno. Med ranyisi moro mayot e twak. Magi gin riekni ma jogol-twak mong’ith jotiyogo. Kata obedo ni in gi lony maromo nade, inyalo tiyo gi parogi sama iiko weche mag twak.

Inyalo wach ni loko dwol e gima miyo twak bedo gi ndhadhu. Kolok dwol e yo madwarore kendo e okang’ mowinjore, mano biro miyo twagi owuog mamit chuth kendo obed mamoro jowinjo.