Wuoyo e Yo Mapile

WUOYO e yo mapile miyo jowinjo obed gadier kuom gima iwacho. Be inyalo geno weche mag ng’at mawuoyo kopandoni kite? Mano tek. Kuom mano, kar loko wuoyoni, wuo kaka ijawuoyo pile.

Kik ikaw ni wuoyo e yo mapile en wuoyo awuoya ma ng’ato ok odewo. Ketho grama, luongo weche e yo marach, koda mwonyo wach ok owinjore. Weche mochuogi ma ji ok ong’eyo tiendgi bende ok onego otigo. Kinde duto wadwaro nyiso luor mowinjore e wechewa koda e yo mwawuoyogo. Ng’at mawuoyo e yo mapile kamano ok ket pache ahinya kuom kaka wechene ochanore kata kaka onyalo moro ji.

E Tij Lendo. Sama ichomo ot moro, kata ka idhi romo gi ng’at midwaro lendone, be ibedo gi kibaji? Kata obedo ni thothwa bedo maluor, jomoko to luorogi ok dog chien mapiyo. Luoro nyalo miyo dwond ng’ato odire kata otetni, kata kibaji nyalo miyo lwedo kata wi ng’ato ochapni.

Nitie gik mogwaro manyalo miyo jalendo obed gi chandruok machalo kama. Nyalo bedo ni oparore ni ji biro nene nade kata ka twak mare biro wuok maber. Paro weche ma kamago ok rach, kata kamano, gima nyalo chendo en keto paro kuomgi ahinya. Ka luoro jamaki sama idwaro dhi lendo, ang’o manyalo konyi? Gima nyalo konyi en ikruok adimba kendo kwayo Jehova e lamo gi chunyi duto. (Tich 4:29) Par ng’wono maduong’ ma Jehova osenyiso kogwelo ji obi oyud ngima mosiko maonge tuoche e Paradis. Par chal mar jogo mitemo konyo koda kaka dwarore ni giwinj wach maber.

Ng’e bende ni ji nigi ratiro mar yiero, omiyo ginyalo yie kata tamore winjo wach milando. Ne en kamano bende kinde ma ne Yesu tiyo tij lendo e Israel machon. Migawo mari en mana lendo. (Math. 24:14) Kata kapo ni ji ok yie mondo iwuo kodgi, neni kanyo chiwo neno. Mano nyiso ni isechopo gima dwarore nikech iweyo Jehova otiyo kodi e chopo dwache. E kindego miyudo thuolo mar wuoyo, ang’o mabiro tayo yo miwuoyogo? Ka ipuonjori keto pachi kuom konyo jowinjo, wuoyoni biro bedo mamit winjo kendo mapile.

Sama ilendo, ka itimo gik moko kendo iwuoyo e yo mapile, mano biro keto jowinjo thuolo. Mano bende nyalo miyo gimed rwako gik midwaro puonjogi mowuok e Ndiko. Kar wuoyo kodgi ka ng’ama golonegi twak, wuo ka ng’ama goyo mbaka. Kawgi kaka osiepeni. Nyis ni idewogi kendo rwak paro ma gichiwo. En adier ni ka dhok miwacho kata kit oganda moro dwaro ni oluw chike moko mag nyiso luor sama ng’ato wuoyo gi joma okiya, ber kiluwo chikego. Kata kamano, kinde duto bed ng’at manyiso mor e wang’e.

Sama In e Ndiri. Sama iwuoyo gi grup, wuoyo e yo mapile ka ng’at magoyo mbaka ber moloyo. En adier ni sama iwuoyo gi jowinjo mang’eny, dwarore ni iting’ dwondi. Ka itemo mako weche twak duto e wiyi kata ka indiko wechego duto piny, nyalo bedo ni iketo pachi e yo mokalo tong’ kuom chano wecheni adimba. Chano weche e yo maber en gima dwarore, kata kamano, ka iketo pachi ahinya e timo mano, twagi bedo morungore kendo motwo. Ok ibi wuoyo e yo mapile. Onego iik motelo puonj mibiro chiwo, kata kamano, ket pachi moloyo kuom puonjgo to ok kuom weche mibiro lerogigo.

En kamano bende sama ipenji penjo e chokruog-kanyakla. Ikri maber, to kik isom kata mako dwoko duto e wiyi. Wuo kiloko dwol e yo mapile mondo paro michiwo owuog kendgi e yo maber.

Kata obedo ni ber tiyo gi lony mag wuoyo, tiyo kodgi e yo mojimbore nyalo miyo jowinjo one ni ok iwuo e yo mapile. Kuom ranyisi, onego iwuo e yo mamiyo wecheni winjre maler kendo iluong weche kare, to kik itim mano e okang’ mamiyo wuoyoni bedo motwo kata mar wuondruok. Kitiyo e yo maber gi ranyisi mag del majiwo kata malero weche, twagi bedo gi ilo, to ranyisi mag del mochun kata mag nyisruok biro golo pach jowinjo kuom gima iwacho. Ti gi dwol moromo, to tem kik igo koko. Seche moko ber chwako i twak, to kik ikal tong’. Loko dwol, wuoyo gi ilo, kata nyiso kaka iwinjo e chunyi, ok onego otim e yo mamiyo jowinjo obed mogut kata oket pachgi ahinya kuomi.

Nitie jomoko ma wechegi wuok mochanore kata e sa maok gigol twak. Jomoko to ok tim kamano. Gima duong’ en wuoyo e yo maber pile pile kendo timo gik moko e yo manyiso luor mowinjore gi Jakristo. Kae to ka in e ndiri, ibiro wuoyo kendo timo gik moko e yo maber mapile.

Sama Isomo e Nyim Ji. Somo e nyim ji ka ng’ama wuoyo e yo mapile dwaro kinda. Mondo itim kamano, non puonj madongo mayudore kama isomono kendo ng’e kaka igero puonjgo. Makgi maler e pachi; nikech ka ok kamano to ibiro somo asoma weche maok ing’eyo tiendgi. Non kaka iluongo weche mikiya. Tiegri somo gi dwol mondo ing’e kaka onego ilok dwondi kendo ing’e weche monego isom kanyachiel mondo eka ichiw paro e yo maler. Tim kamano nyadinwoya nyaka chop kama somo mari lolore. Tim kinda ing’e maber weche misomo mondo sama isomo gi dwol, sombi owinjre ka mbaka ma iye ochiek. Mano e wuoyo e yo mapile.

En adier ni ng’eny gik mwasomo gin mawuok e bugewa malero Muma. Mopogore gi migepe mag somo e Skul mar Tij Nyasaye, wasomo Ndiko e tij lendo koda seche ma wagolo twege e ndiri. Imiyo owete migepe mag somo e Puonjruok mar Ohinga mar Jarito koda e Puonjruok Muma e Kanyakla. Owete moko molony yudo migepe mag somo twege misomo achiel kachiel e chokruoge mag distrikt. Bed ni isomo Muma kata buge mamoko, som kuonde manyiso weche ma jomoko nowacho e yo mamiyo wechego wuok kaka nowachgi. Kapo ni gin weche mag joma opogore opogore, tem loko dwondi mondo obed machal gi mar moro ka moro kuomgi. Tang’: Kik ikal tong’ sama isomo, kata kamano som wechego gi jing’o kendo e yo mapile.

Somo e yo mapile en somo ka gima igoyo mbaka. Ok owinjre ka gima ochun, to onyiso adiera ma in-go kuom gima isomo.