Wuoyo e Yor Goyo Mbaka

JI JOBEDO thuolo sama gigoyo mbaka gi osiepe. Wechegi biro abira e yo mayot. Jomoko wuoyo gi ilo; jomoko to ok wuo mang’eny. Kit wuoyo ariyogi bedo mamit nikech ng’ato wuoyo e yo mapile.

Kata kamano, sama iwuoyo gi ng’at mikiya ok ber wuoyo ka gima ing’iyo kode ahinya. Kuom adier, e oganda moko, nitie yo moketi sie ma ng’ato onego owuogo gi ng’at mokiya. Bang’ nyiso luor madwarore, nyalo bedo maber kitiyo gi rieko e wuoyo gi ng’at mikiyano e yor mbaka.

Sama iwuoyo e ndiri bende nyaka itang’. Wuoyo maok ibidho wecheni kata matin ok nyis luor ne chokruoge mag kanyakla kendo mono ji kawo weche miwacho gi pek. E dhok moko, nitie weche sie mitiyogo sama ng’ato wuoyo gi ng’ama duong’ne, japuonj, jatich sirkal, kata janyuol. (Ne ane weche ma otigo e Tich Joote 7:2 koda 13:16.) Itiyo gi weche mopogore ka ng’ato wuoyo gi jaode kata gi osiepne. Kata obedo ni weche mwatiyogo e ndiri ok onego ochan mokalo tong’, pod dwarore ni gibed weche manyiso luor.

Kata kamano nitie gik manyalo miyo wuoyo mar ng’ato obed morungore kata mochan ahinya. Achiel kuom gigo en kaka ochan sentens kata kaka ochan weche manie sentens. Chandruok bedoe sama jagol-twak temo nwoyo weche mana kaka ondikgi. Ng’enyne kaka ichano weche sama indikogi opogore ahinya gi kaka ng’ato chanogi sama owuoyo. En adier ni sama ng’ato timo nonro ne twak, otiyo gi weche mawuok e buge mogo. Weche machuok matayi mondik e kalatas nyalo bedo mise mar weche monego itigo e twak. Kata kamano, kapo ni iwuoyo kiluwo paro mochiw mana kaka oketgi, kata isomogi achiel kachiel sama igolo twak, twagino ok bi bedo kaka mbaka. Mondo twagi obed e yor goyo mbaka, ler paro kitiyo gi wecheni iwuon kendo kik iti gi sentens ma korgi tek.

Gimachielo mamiyo wuoyo mar ng’ato obed morungore en kaka otimo lokruok e dhi piyo kata dhi mos sama owuoyo. Wuoyo mar ng’ato bedo motuwo ka ok olok yo mowuoyogo mondo seche moko odhi piyo kata mos. E mbaka mapile, ng’ato loko wuoyone odhi piyo kata odhi mos, kendo oling’ matin kinde ka kinde.

En adier ni sama iwuoyo gi ji mang’eny, kata kiwuoyo e yor mbaka, onego iti gi dwol mamalo, motegno, kendo moil mondo imak pachgi.

Mondo iwuo e yor mbaka mowinjore gi tij lendo, ber ng’iyo wuoyo e yo maber pile pile. Mano ok onyiso ni nyaka ibed ng’ama osomo ahinya. Kata kamano, ber nyago kit wuoyo mamiyo jomoko omi gima iwachonegi luor. Ka in gi wechego e paro, tem ane neno kabe dwarore ni itim kaka owach piny kae e mbakani mapile.

1. Kik iti gi weche maok owinjore gi grama kata mamiyo ji riwi kanyachiel gi joma timbegi richo. Kaluwore gi puonj manie Jo Kolosai 3:8, kik iti gi weche maok nyis luor kata mogak. To komachielo, ok rach tiyo gi weche ma ji tiyogo pile. Weche ma ji tiyogo pile ka giwuoyo ok gin mobidh ahinya, kata kamano, ji ok kawgi marach.

2. Kik inwo tiyo gi weche moko sie seche duto milero paro moro. Puonjri tiyo gi weche maketo maler tiend paro michiwo.

3. Kik ing’i gi ng’ado sentens e kore mondo ichake gie tiende kendo, omiyo ng’e maler gima idwaro wacho kapok ichako wuoyo.

4. Kik ium paro mabeyo midwaro chiwo kuom tiyo gi weche mang’eny ahinya. Ng’i tiyo gi sentens machuok kendo mayot sama iwacho puonj midwaro ni ji omaki.

5. Wuo e yo manyiso ni imiyo ji luor.