Weche Mitiekogo

NYALO bedo ni isetimo nonro mong’ith kendo isechano wechego malong’o. Nyalo bedo ni iseiko kata weche michakogo mamiyo ji siso. Kata kamano, pod nitie gimoro achiel madwarore—weche mitiekogo machopo gima dwarore. Kik ikaw mano ka gima tin. Gima iwacho achien ema ji paro aming’a. Kitieko e yo mayom yom, kata gima ne iwacho motelo nyalo chweyo maok okonyo.

Non ane weche maluwogi: Kane Joshua chiegni tho, nogolo ne jodongo mag oganda Israel twak makende. Bang’ kwano gik ma Jehova nosebedo ka timo ne Jo-Israel chakre ndalo mag Ibrahim, be Joshua nonwoyo anwoya wechego e yo machuok? Ooyo. Kar mano, gi chunye duto nojiwo ji niya: “Koro mondo uluor Jehova, kutiyone gi chuny kendo gadiera.” Som iwuon weche ma Joshua notiekogo kaluwore gi bug Joshua 24:14, 15.

Twak moro ma bende ber ahinya en mayudore e bug Tich Joote 2:14-36, ma jaote Petro nogolo ne oganda ma ne ni Jerusalem chieng’ Nyasi mar Pentekost 33 E.N. Mokwongo, noleronegi ni gie sano ne gineno kaka weche janabi Joel ne chopo kuom wach olo roho mar Nyasaye. Bang’e nonyiso kaka mago notudore gi weche ma ne okor kuom Mesia e bug Zaburi ni ne idhi chier Yesu Kristo kendo ni ne idhi ting’e malo obed e lwet Nyasaye korachwich. Kae to e weche ma ne otiekogo, Petro nonyiso maler wach ma ng’ato ka ng’ato kuom jowinjone nyaka ne chomrego. Nowacho niya: “Omiyo, dhood Israel mangima mondo ong’e chuth ni, Nyasaye oseketo Yesuni, ma nuguro, obed Ruoth kendo Kristo.” Jogo nopenjo niya: “Owetewa, watim ang’o?” Petro nodwoko niya: “Lokuru chunyu, kendo obatisu uduto e nying Yesu Kristo.” (Tich 2:37, 38) E odiechiengno, ji 3,000 kuom joma ne winje, ne wachno omulo chunygi ma girwako adiera e wi Yesu Kristo.

Weche Monego Oket e Paro. Weche mitiekogo onego otudre achiel kachiel gi wach maduong’ miwuoyoe e twagi. Onego giwinjre malong’o gi puonj madongo misewuoyoe. Kata obedo ni inyalo dwaro nwoyo weche moko sie mag wach maduong’ miwuoyoe, timo mano en hero mari.

Pile, gimidwaro chopo sama iwuoyo en jiwo jomoko mondo okaw okang’ kuom gima iwachonegi. Achiel kuom gima weche mitiekogo onego ochop en nyiso ji gima onego gitim. Sama ne iyiero wach maduong’ miwuoyoe koda puonj madongo, be ne inono adimba gimomiyo wechego gin madwarore ne jowinjo koda gima idwaro chopo sama iwuoyo kuom wechego? Ka en kamano, ing’eyo gima idwaro ni gitim. Koro dwarore ni iler gima okang’no en koda kaka ginyalo chopogo.

E wi nyiso jowinjo gima owinjore gitim, weche mitiekogo onego omi gidwar kawo okang’. Onego onyis gimomiyo onego gikaw okang’no kendo kanyalore, ber mayudore nikech timo kamano. Ka opar kendo oket sentens mogik e yo maber, onyalo miyo twak mangima owuog gi teko.

Bed king’eyo ni ichomo giko twak. Gimiwacho onego onyis mano. Kaka idhi mos kata piyo bende onego onyis ni twak ochomo gikone. Kik iwuo aruya nyaka giko kae to itieko twak apoya. To komachielo, kik iwe teko mar dwondi ema odog piny. Onego ibed gi dwol moromo to ok mokalo tong’. Sentens mitiekogo onego onyis ni koro twak rumo. Kaka iwachogi onego onyis kinda kendo ni in gadier. Sama iikori ne golo twak, kik iwe maok itiegori kaka ibiro wacho weche mitiekogo.

Weche mitiekogo onego obed mang’eny maromo nade? Ok en mana gima sa ema chiko. Weche mitiekogo ok onego oyware. Gima nyalo nyiso ni oromo en teko ma odhi bedogo kuom jowinjo. Weche mitiekogo ma gin mayot, ma achiel kachiel, kendo majiwo ji ema ber. Tieko e yo mabor matin kitiyo gi ranyisi, bende nyalo bedo maber ka ochan weche adimba. Pim ane weche machuok mitiekogo buk mangima mar Eklesiastes kuom somo Eklesiastes 12:13, 14, gi weche mitiekogo Twak mar Got mayudore e bug Mathayo 7:24-27, ma en twak ma wechene nok moloyo bug Eklesiastes.

E Tij Lendo. Tij lendo e kama ibiro yudo ni iko weche mitiekogo, dwaroree moloyo. Ka iikori maber kendo idewo ji gadier, inyalo konyo ahinya. Puonj mosechiw e ite motelo nyalo konyo kata ka en mbaka e kindi gi wuon ot.

Mbaka nyalo bedo machuok ahinya. Nyalo bedo ni ng’atno odich. Limbeno nyalo kawo mana dakika achiel kende. Kapo ni owinjore, inyalo wacho gima chalo kama: “Aneno ni idich. Kata kamano, daher jiwi gi paro moro achiel. Muma nyisowa ni Jachwechwa dwaro timo gimoro majaber miwuoro—loso pinyni obed kama ji nyalo dakie gi mor nyaka chieng’. Wanyalo dak e Paradisono, en mana ni nyaka wapuonjre gima Nyasaye dwaro.” Kata inyalo mana nyise ni ibiro lime kinde machielo.

Kapo ni wuon ot ong’ado mbaka apoya—kata onyiso achaye—pod nitie gimoro maber mwanyalo chopo. Ket e paro puonj mayudore e Mathayo 10:12, 13 koda Jo Rumi 12:17, 18. Yo mang’won midwokego nyalo loko pache kuom kaka oneno Joneno mag Jehova. Mano dibed gima ber ahinya michopo.

To komachielo, nyalo bedo ni ne usewuoyo maber gi wuon ot. Donge ber ka inwoyo puonj maduong’ ma idwaro ni opar? Ketie gima biro jiwe kawo okang’ kuom wachno.

Kapo ni ineno ni unyalo medo wuoyo kode kinde machielo, miye siso mar geno limbeno. Penj penjo—onyalo bedo penjo migolo e bug Kutoa Sababu kwa Kutumia Maandiko kata buk moro mogo mar timo puonjruok mar Muma. Ket pachi kuom gimidwaro chopo ma en gima Yesu nowacho kendo mondik e bug Mathayo 28:19, 20.

Be dibed ni itieko puonjruok Muma gi ng’ato? Nwoyo wach maduong’ miwuoyoe biro konyo japuonjre paro gima usepuonjoru. Tiyo gi penjo mag nwoyo biro konyo japuonjre paro puonj madongo, ahinya to ka ok ikalo kuomgi ahucha. Penjo kuom kaka gima upuonjoru nyalo konyo japuonjre kata kaka onyalo tiyo gi wechego e konyo jomoko nyalo miyo opar kaka onyalo tiyo kod puonjgo.—Nge. 4:7.

Ng’e niya—weche mitiekogo chiko kaka twagi mangima biro konyo.