Chiwo Weche Masiro Chuth

SAMA iwacho gimoro, jowinjo nigi ratiro chuth mondo gipenj niya: “Ang’o momiyo wachno en adier? Ang’o manyiso ni gima jagol-twak wacho en gima ji onego oyiego?” Kaka japuonj, in gi ting’ mar dwoko penjo kaka mago, kata mar konyo jowinjo oyud dwoko mag penjogo. Ka wachno dwarore ahinya e siro weche mipuonjo, ne ni weche misirogo wachno miyo jowinjo bedo gadier chuth. Mano biro miyo wecheni oywa ji.

Jaote Paulo ne puonjo e yo maywayo ji. Kotiyo gi weche masiro maber, kochano weche owinjre malong’o, kendo ka osayo ji gi kinda, ne otemo loko pach joma ne owuoyogo. Noketonwa ranyisi maber ahinya. (Tich 18:4; 19:8) En adier ni nitie jomoko mapuonjo e yo ma ywayo ji mondo giwuondgi. (Math. 27:20; Tich 14:19; Kol. 2:4) Ginyalo chako gi puonj maok adier, ginyalo siro gik ma giwacho gi weche monon nyakonchiel, ginyalo tiyo gi weche mawiye wiye, ginyalo weyo oko weche maok riw pachgi lwedo, kata ginyalo chwako ji gi weche kar konyogi nono kor wach. Onego watang’ kik wati gi yore ma kamago duto.

Mosir Chuth gi Wach Nyasaye. Weche mwapuonjo ok onego obed magwa wawegi ngang’. Watemo konyo jomoko ong’e weche ma wasepuonjore ei Muma. Kuom wachni, jatichno mogen kendo mariek osekonyowa ahinya gi buge. Bugego jiwowa nono Ndiko adimba. Kae to wabende watero jomoko e Muma ka wan gi gombo e chunywa mar konyogi ng’eyo gima Muma wacho, to ok ni wadwaro nyisogi ni wan kare. Wayie gi gima Yesu nowacho ne Wuon mare e lamo niya: “Wachni en adiera.” (Joh. 17:17) Onge ng’at minyalo gen wachne moloyo Jehova Nyasaye, Jachwech mar polo gi piny. Omiyo tiyo gi Wach Nyasaye kaka mise, ema siro chuth weche mwapuonjo.

Seche moko inyalo wuoyo gi joma ok ong’eyo Muma ahinya, kata joma ok oyie ni Muma en Wach Nyasaye. Onego iti gi rieko mondo ing’e seche minyalo rwako ndiko mag Muma e mbaka koda kaka inyalo timo kamano. Kata kamano, onego item mapiyo kaka nyalore tero pachgi e Muma ma en e buk minyalo gen moloyo.

Be onego ing’ad ni wacho mana weche sie mag ndiko moro motudore gi gima iwacho oromo siro chuth gima iwacho? Ok en kamano kinde duto. Nyalo dwarore ni iter pach ji e weche molworo ndikono mondo inyisgi ni adier ndikono siro gima iwacho. Kapo ni itemo tiyo gi ndiko moro e chiwo puonj moro to weche molwore ok wuo kuom puonjno achiel kachiel, biro dwarore ni imany weche mamoko minyalo sirego. Nyalo dwarore ni iti gi ndiko mamoko motudore gi wachno mondo omi ikony jowinjoni neno ni gik miwachogo otenore chuth kuom Ndiko.

Tang’ ahinya kik ijimb gima ndiko wacho. Some adimba. Nyalo bedo ni ndikono mulo gima iwuoyoe. Kata kamano, mondo puonj michiwo obed ma ywayo ji, jowinjo nyaka ne ei ndikono gima siro puonjno.

Mosir gi Weche Man Oko mar Muma. Seche moko tiyo gi weche mogol kuonde minyalo gen oko mar Muma e siro wach nyalo konyo ji ng’eyo ni puonj manie Ndiko ni kare.

Kuom ranyisi, inyalo wuoyo kuom gik mochwe mineno kaka gik manyiso adier ni Jachwech nitie. Inyalo wuoyo kuom chike matayo chwech kaka chik matayo teko mamiyo gik moko lwar piny, mondo inyisgo ni nitie Jachiw-Chik. Weche miwacho biro winjre malong’o ka giluwore gi gima owach e Wach Nyasaye. (Ayub 38:31-33; Zab. 19:1; 104:24; Rumi 1:20) Siro weche kamano konyo nikech mano miyo nenore maler ni gik ma Muma wacho luwore gi gik ma ji bende ong’eyo.

Be dibed ni kony midwaro chiwo en ni ng’ato ong’e ni Muma en Wach Nyasaye adier? Inyalo tiyo gi weche sie ma josomo osewacho ka ginyiso ni Muma en Wach Nyasaye, kata kamano, be wechegigo nyiso ni Muma en Wach Nyasaye? Weche ma kamago nyalo mana konyo joma oyie gi josomogo. Be inyalo tiyo gi sayans e nyiso ni Muma en adier? Ka paro mag josayans ma gin dhano morem ema iketo kaka gimaduong’ misirogo puonj, ibiro chalo ng’ama gedo e kwoyo. Mopogore gi mano, ka ichako gi Wach Nyasaye kae to eka itiyo gi gik ma josayans osefwenyo manyiso ni Muma wacho weche madier, puonjni biro bedo gi mise motegno.

Kuom wach moro amora mitemo nyiso kore, chiw weche moromo masire. Chal mar jowinjo ema biro chiko kar romb weche madwarore e siro puonj. Kuom ranyisi, kapo ni iwuoyo e wi ndalo mag giko milero e 2 Timotheo 3:1-5, inyalo nyiso jowinjo wach moro mong’ere moselandi manyiso ni ji “ok ohero owetegi.” Ranyisi achielno nyalo romo e siro adiera ni wadak e ndalo mag giko.

Nyiso chalruok mantie e kind gik moko ariyo konyo kinde mang’eny. Kata kamano, mano kende ok oromo; nyiso chalruok mantiereno tiyo maber mana ka owinjore gi gima Muma wacho. Kata kamano, nyiso chalruok nyalo konyo ng’ato neno gimomiyo puonj michiwo ni kare. Kuom ranyisi, inyalo ler ni Pinyruodh Nyasaye en sirkal kuom nyiso chalruok manie kind sirkal gi pinyruoth. Inyalo wacho ni mana kaka sirkande mag dhano, Pinyruodh Nyasaye bende nigi joloch, joma ilocho e wigi, chike, chenro mag ng’ado bura, koda chenro mar puonjo ji.

Kinde mang’eny, gik mosene nyalo konyo e nyiso ni tiyo gi puonj mag Muma en rieko. Bende inyalo tiyo gi gik miseneno e ngimani iwuon e siro weche miwacho. Kuom ranyisi, sama inyiso ng’ato ber mar somo kendo puonjruok Muma, inyalo lerone kaka timo kamano osekonyi e ngimani iwuon. Mondo ojiw owetene, jaote Petro nowuoyo kuom gima en owuon noneno e kinde ma kit Yesu ne olokore. (2 Pet. 1:16-18) Paulo bende nowuoyo e wi weche ma en owuon nokaloe. (2 Kor. 1:8-10; 12:7-9) Kata kamano, mondo kik ji omiyi duong’ maok owinjore, ok onego iti ahinya gi weche miseneno iwuon e ngimani.

Nikech ji opogore e parogi koda kaka ne gipon, weche mitiyogo e siro puonj nyalo tiyo maber kuom ng’at moro to ok kuom ng’at machielo. Kuom mano, par matut kuom paro ma jowinjoni nyalo bedo ni nigo, kapok ing’ado ni gin weche mage mibiro tiyogo e siro puonjni koda kaka ibiro tiyo kodgi. Ngeche 16:23 wacho kama: “Chuny ng’at mariek miyo dhoge nyiso rieko, kendo miyo oywayo ji gi dhoge.”—New World Translation.