Be Chandruok Chieng’ Norum?

DWOKO MA MUMA CHIWO

“Nyasaye noywe pi wang’ duto e wengegi; tho ok nobedie kendo, kata ywak, kata nduru, kata rem ok nobedie.”​—Fweny 21:4, The Bible in Luo, 1968.

KAKA WACHNO NYALO KONYI

Wachno nyiso ni Nyasaye ok e ma kelnwa chandruok mwayudo.​—Jakobo 1:13.

Wachno hoyowa ni Nyasaye ong’eyo kaka wawinjo sama wachandore.​—Zekaria 2:8.

Wachno miyowa geno ni chandruok duto biro rumo.​—Zaburi 37:9-11.

BE WANYALO BEDO GADIER GI GIK MA MUMA PUONJO?

Ee, nikech weche kaka ma luwogi:

• Nyasaye osin gi chandruok kod timbe ma ok kare. Ne ane kaka Jehova Nyasaye nowinjo ka ne itimo ne joge marach kinde machon. Muma wacho ni ne chunye lit “nikech jo ma ne sandogi kendo timonegi gik maricho.”​—Jong’ad Bura 2:18.

  Nyasaye osin gi joma hinyo jowetegi. Kuom ranyisi, Muma wacho ni Nyasaye osin gi “lwedo machuero remb jo ma onge ketho.”​—Ngeche 6:16, 17.

• Nyasaye dewo ng’ato ka ng’ato kuomwa. Kata obedo ni “ng’ato ka ng’ato ong’eyo chandruokne kod lit ma en-go owuon,” Jehova be ong’eyo chandruogego.​—2 Weche mag Ndalo 6:29, 30.

  Kokalo kuom Pinyruodhe, Jehova chiegni tieko ne ji duto chandruok. (Mathayo 6:9, 10) To ka pod warito kindego, wahoyo ji duto ma dwaro ng’eyo Nyasaye.​—Tich Joote 17:27; 2 Jo-Korintho 1:3, 4.