Pinyruodh Nyasaye En Ang’o?

DWOKO MA MUMA CHIWO

“Nyasaye manie polo nochung pinyruoth ma ok noketh ngang’.”​—Daniel 2:44, Loko mar Piny Manyien.

“Osemiwa wuoyi; loch nobed e lwete.”​—Isaya 9:6.

KAKA WACHNO NYALO KONYI

• Wachno konyi ng’eyo sirkal makare ma nyalo kelo ber ne in iwuon.​—Isaya 48:17, 18.

• Okonyi ng’eyo ni e piny manyien mabiro, ibiro dak maonge tuoche kendo ka in gi mor kod kue mogundho.​—Fweny 21:3, 4.

BE WANYALO BEDO GADIER GI GIK MA MUMA PUONJO?

Ee, nikech weche kaka ma luwogi:

• Yesu nonyiso gik ma Pinyruodh Nyasaye biro timo. Yesu nopuonjo jolupne ni gilem mondo Pinyruodh Nyasaye obi kendo dwarone otimre e piny. (Mathayo 6:9, 10) Yesu notimo gik ma nyiso kaka ibiro dwok lamono.

  Kinde ma Yesu ne ni e piny ka, nopidho joma ne nigi kech, nochango jotuo, kendo nochiero jomotho. (Mathayo 15:29-38; Johana 11:38-44) Kaka ng’ama ne dhi bedo Jaloch mar Pinyruodh Nyasaye, Yesu nonyiso maler gima Pinyruodhno ne dhi timo ne joma nie bwoye.​—Fweny 11:15.

• Gik ma timore e piny sani nyiso maler ni Pinyruodh Nyasaye chiegni chopo. Yesu nokoro ni kodong’ ndalo matin to Pinyruodh Nyasaye kelo kuwe e piny, pinywani ne dhi pong’ gi lwenje, kech, kod yiengni mag piny.​—Mathayo 24:3, 7.

  Mago e gik ma waneno ka timore e kindewagi. Omiyo, wanyalo bedo gadier chuth ni machiegnini, Pinyruodh Nyasaye biro tieko chandruoge ma kamago duto.