Jeremia ne Ok Oweyo Wuoyo e Wi Jehova

Kinde moko ji jarowa kata igi wang’ kodwa sama wawuoyo kodgi e wi Jehova. Mano nyalo miyo wagomb weyo wuoyo e wi Nyasaye. Be nitie kinde ma isegawinjoe kamano?— Muma wuoyo e wi rawera moro ma ne chiegni weyo wuoyo e wi Jehova kata obedo ni ne ohero Jehova ahinya. Rawerano niluongo ni Jeremia. We wapuonjre weche momedore e wiye.

Kane Jeremia pod tin, Jehova ne onyise ni osiem ji owe timo gik maricho. Mano ne en gima tek ne Jeremia, kendo ne oluor ahinya. Ne onyiso Jehova niya: ‘Akiya gima adhi wacho. Pod an mana wuowi matin.’ Kata kamano, Jehova ne onyise niya: ‘Kik iluor. Abiro konyi.’

Omiyo, Jeremia nochako wuoyo gi jogo konyisogi ni ne idhi kumgi ka ok giloko yoregi. Be iparo ni ne giwinjo Jeremia?— Ooyo. Jomoko ne ojare to moko ne igi owang’ ahinya kode. Moko kuomgi ne dwaro kata mana nege! Iparo ni Jeremia ne owinjo nade?— Ne oluor ahinya kendo ne owacho niya: ‘Ok adhi wuoyo e wi Jehova kendo!’ Kata kamano, be ne oweyo wuoyo e wi Jehova adier?— Ooyo, ne ok oweyo. Ne ohero Jehova ahinya ma ne ok onyal weyo wuoyo e wiye. To nikech Jeremia nodhi nyime wuoyo e wi Jehova, Jehova ne orite.

Kuom ranyisi, kinde moro joma richo moko ne owito Jeremia e bur moro matut ma ne opong’ gi chuodho. Ne oonge chiemo kendo ne oonge pi. Jogo ne dwaro weyo Jeremia e burno mondo otho e iye kanyo. Kata kamano, Jehova nokonye mogole e i burno!

Ang’o ma ranyisi mar Jeremia nyalo puonji?— Kata obedo ni kinde moko ne oluor, ne ok oweyo wuoyo e wi Jehova. Sama iwuoyo e wi Jehova, jomoko nyalo jari to moko igi nyalo wang’ kodi. Wiyi nyalo kuot kata luoro nyalo maki. Kata kamano, kik iwe wuoyo e wi Jehova. Kinde duto obiro konyi mana kaka ne okonyo Jeremia.