Jehova Ooro Jeremia Mondo Oland Wachne

Jehova noyiero Jeremia mondo obed janabi e Juda. Nomiye migawo mar lando wach Nyasaye kendo siemo ji mondo giwe timbe maricho. Jeremia nowacho kama: ‘Yawa Jehova, pod atin. Ok ang’eyo wuoyo gi ji.’ To Jehova nonyise niya: ‘Kik iluor. Abiro miyi weche mibiro wacho. Abiro konyi.’

Jehova nonyiso Jeremia mondo ochok jodong oganda, kae to oto agulu e nyimgi konyisogi kama: ‘Mae e kaka ibiro tiek Jerusalem.’ Ka ne Jeremia otimo kamano, jodongogo igi ne owang’. Jadolo moro ma nyinge Pashur nogoyo Jeremia, mi otueyo tiendene kod lwetene e kind bepe madongo. Samoro kata wiye bende notueyo e kind bepego. Jeremia ne ok nyal sudo kata matin, otieno mangima. Kinyne gokinyi, Pashur ne ogonye. Jeremia nowacho kama: ‘Aol. Ok adhi lando wach Nyasaye kendo.’ Be ne oweyo migape? Ooyo. Bang’e ne oparo matut, mi owacho kama: ‘Wach ma Jehova oorago chalo mana gi mach ma liel e iya. Ok anyal ling’.’ Jeremia ne odhi nyime miyo ji siem.

Bang’ higni moko, ne oket ruoth manyien e piny Juda. Jodolo gi jonabi mag miriambo ne ok dwar winjo weche ma Jeremia ne lando. Ne ginyiso jodongo niya: ‘Ng’atni owinjore otho.’ To Jeremia nowacho kama: ‘Kunega, to ng’euru ni unego ng’at ma onge ketho. Weche ma alando ok gin meka, to gin mag Jehova.’ Ka jodongo nowinjo mano, ne giwacho kama: ‘Ng’atni ok owinjore otho.’

Jeremia ne omedo lando wach Nyasaye, kendo jodong oganda ne ok mor kode kata matin. Ne gikwayo ruoth mondo oneg Jeremia. Ruoth ne onyisogi niya: ‘Unyalo timo kode gimoro amora ma udwaro.’ Jodongogo ne okawo Jeremia mi gibole e bur matut mopong’ gi chuodho ka giparo ni Jeremia ne dhi tho. Jeremia ne ochako nyumore e i chuodhono.

Kae to Ebed-melek ma ne tiyo e od ruoth nonyiso ruoth kama: ‘Jodongo obolo Jeremia e bugo! Ka ok wagole kanyo mapiyo, to odhi tho.’ Ruoth ne ochiko Ebed-melek mondo okaw chwo moko 30 mondo giywa Jeremia owuog e bugono. Donge onego wabed kaka Jeremia ma ne ok oyie mondo gimoro amora omone lando ote ma Jehova nomiye?