Adam gi Hawa Notamore Winjo Nyasaye

Chieng’ moro ka ne Hawa ni kar kende, thuol moro nowuoyo kode. Thuondno nopenje kama: ‘Wachore ni Nyasaye otamou chamo olemb yiende duto kae, be mano en adier?’ Hawa nodwoke niya: ‘Ok en kamano, wanyalo chamo olemb yiende duto, to nitie mana yien achiel kende ma ok onego wacham olembe, nono to wabiro tho.’ Thuondno nodwoke niya: ‘Ok ubi tho. Ka uchamo olemb yienno, ubiro chalo gi Nyasaye.’ Be thuondno nowacho adier? Ooyo. To parie ni Hawa to noyie gi wachno! Kaka Hawa ne medo ng’iyo olemono, e kaka gombo mar chame ne medore. Gikone, nochamo olemono, kae to nomiyo Adam be. Adam nong’eyo maber ni ne gidhi tho ka gitimo gima Nyasaye nokwerogi. To pod nochamo achama olemono.

Chieng’no godhiambo, Jehova nowuoyo kodgi. Ne openjogi gimomiyo ne ok giwinjo chik ma nomiyogi. Hawa ne owacho ni thuol e ma ne owuonde, to Adam nowacho ni Hawa e ma nomiyo ochamo olemono. Nikech ne ok giwinjo chik, Jehova nogologi e puodho mar Eden. Jehova noketo malaike kod ligangla ma wirore kendo ma liel ka mach e rangach mar puodhono mondo kik gidog e puodhono.

Jehova ne owacho ni ng’at ma ne owuondo Hawa be ne nyaka yud kum. Nitie ng’at ma notiyo gi thuondno e wuoyo gi Hawa. Jehova ne ok ochueyo thuol mondo owuo kaka dhano. Malaika moro marach e ma nomiyo thuondno onenore ka gima ne owuoyo. Ne otimo mano mondo owuond Hawa. Malaikano iluongo ni Satan Jachien. E kinde mabiro, Jehova biro tieke mondo kik owuond ji kendo.