Chakruok mar Chandruok

ADAM gi Hawa ne yudo chandruok mang’eny kane gin oko mar puoth Eden. Ne nyaka giti matek eka giyud chiemo. Kar mondo yien manyago olembe ema mondo otwi, ne olworgi mana gi yiend kuthe mopogore opogore. Mani e gima ne otimore nikech Adam gi Hawa ne ok owinjo wach Nyasaye, kendo ne giketho osiep ma ne ni e kindgi gi Nyasaye.

Gima rach maloyo mano en ni, Adam gi Hawa ne koro nyalo tho. Par bende niya, Nyasaye ne osiemogi ni ne gibiro tho ka gichamo olemb yath moro. Kuom adier, ne gichako tho mana e odiechieng’ ma ne gichame olemono. Ne gifuwo ahinya nikech ok ne giwinjo chik Nyasaye!

Nyithind Adam gi Hawa duto ne onyuol bang’ kane Nyasaye oseriembo jonyuolgi e puodho mar Eden. Mani nyiso ni nyithindgi bende nyaka ne bed moti ma kendo githo.

Ne bed ni Adam gi Hawa orito chik Jehova, ne ginyalo bedo gi ngima mamor koda nyithindgi bende. Giduto ne ginyalo dak gimor e piny kae nyaka chieng’. Bedo moti, tuoche, koda tho, dine ok oyudo dhano.

Nyasaye dwaro ni mondo ji odag gimor nyaka chieng’, kendo osingo ni chieng’ moro mano biro timore. Ok ni piny kende ema biro bedo kama ber, to ji duto bende biro bedo gi ngima maonge tuoche. Kendo ji duto e piny biro bedo osiepe e kindgi giwegi kata kod Nyasaye.

Kata kamano, Hawa ne ok en osiep Nyasaye kendo. Omiyo kane onyuolo nyithinde, ne nitie pek moro. Ne owinjo rem seche mag nyuol. Ketho chik Jehova ne okelone kuyo gi lit, donge mani en adier koso?

Adam gi Hawa ne onyuolo yawuowi koda nyiri mang’eny. Kane onyuol wuowi makayo, ne gichake nying ni Kain. Wuowi mar ariyo ne giluongo ni Habil. Ang’o ma ne otimorenegi? Be ing’eyo?