Gimomiyo ne Oriembgi e Puoth Eden

KORO ne gima timore sani. Iriembo Adam gi Hawa mondo gi a e puodho majaber mar Eden. Bende ing’eyo gimomiyo?

En nikech ne gitimo gima rach ahinya. Omiyo Jehova koro miyogi kum. Bende ing’eyo gima Adam kod Hawa ne otimo?

Ne gitimo gima Nyasaye ne okwerogi ni kik gitim. Nyasaye ne owachonigi ni ginyalo chamo olemo manie puodho. Kata kamano, ne nitie yath achiel ma Nyasaye ne okwerogi ni kik gicham olembe, chieng’ ma gichamo to gibiro tho. Nyasaye ne okawo yadhno kaka mare. To wang’eyo ni en gima rach kawo gir ng’at machielo, koso? Kare, ang’o ma ne otimore?

Odiechieng’ moro achiel ka Hawa ne ni kende e puodho mar Eden, thuol ne owuoyo kode. Par ane mano! Ne onyiso Hawa ni mondo ocham olemo mar yath ma Nyasaye ne okwerogi. Jehova kane ochweyo thuonde, ne ok ochweyogi gi nyalo mar wuoyo. Omiyo, mano nyiso ni ng’at machielo ema ne miyo thuol wuoyo. Mano ne en ng’a?

Ne ok en Adam. Omiyo nyaka bedi ni ne en achiel kuom joma Jehova ne ochweyo chon kapok ochweyo piny. Jogi gin malaike, to ok wanyal nenogi. Malaika achielni ne osebedo gi sunga ahinya. Ne ochako paro ni onego obed gi telo kaka Nyasaye. Kendo ne odwaro mondo ji owinje kar mondo giwinj Jehova. En e malaika ma ne omiyo thuol owuoyo.

Malaikani ne owuondo Hawa. Kane onyise ni obiro chalo gi Nyasaye ka ochamo olemo, Hawa ne oyie kode. Kuom mano, ne ochamo kendo Adam bende ne otimo kamano. Adam gi Hawa ne ok orito chik Nyasaye, kendo mano ema omiyo ne oriembgi e puodho majaber mar Eden.

Kata kamano, ndalo biro ma Nyasaye nolok pinywani obed kama ber mana kaka puodho mar Eden. Bang’e, wabiro puonjore kaka in bende inyalo konyo time obedi kamano. Sani to we wane ane ni ang’o ma ne otimore ni Adam gi Hawa.