Jehova Nomiyo Samson Obedo Ratego

Jo-Israel mang’eny nodok e lamo nyiseche manono. Nikech mano, Jehova ne ojwang’ogi e lwet Jo-Filistia. Kata kamano, ne nitie Jo-Israel moko ma pod nohero Jehova. Achiel kuomgi ne en Manoa. Manoa gi chiege ne onge nyithindo. Chieng’ moro, Jehova ne ooro malaikane ir chi Manoa. Malaikano ne onyise niya: ‘Ibiro nyuolo wuoyi. Wuoyino biro reso Jo-Israel e lwet Jo-Filistia. Obiro bedo Ja-Nazir.’ Be ing’eyo ni Jo-Nazir ne gin jomage? Ne gin joma Jehova noyiero ne tich makende. Ne ok oyienegi lielo wigi kata matin.

Bang’ kinde, chi Manoa ne onyuolo nyathi ma wuoyi, mi gichake ni Samson. Ka ne Samson obedo ng’at maduong’, Jehova ne omiyo obedo ratego ahinya. Nitie kinde ma ne onegoe sibuor gi lwete nono. Chieng’ moro bende, ne onego Jo-Filistia 30 ka en kende owuon. Jo-Filistia ne ok dware, kendo ne gimanyo yore mag nege. Otieno moro ka Samson ne nindo Gaza, Jo-Filistia ne odhi e dho rangach mar Gaza ka gigeno ni ne gidhi nege sama owuok. Kata kamano, ka nochopo chuny otieno, Samson nowuok kochomo rangach, mi opudho rangajno. Noting’e e goke nyaka e wi got moro ma ne ni but Hebron!

Bang’ kinde moko, Jo-Filistia ne odhi ir Delila ma ne en osiep Samson, mi ginyise niya: ‘Ka inyisowa gimomiyo Samson en ratego kamano, to wabiro chuli pesa mang’eny. Dwaher make mondo watueye e jela.’ Nikech Delila ne dwaro pesano, ne oyie gi kwayogino. Samson ne ok oyie nyiso Delila gimomiyo ne en ratego. To Delila nosiko ka saye koywagore. Gikone, Samson nonyise kama tekone ne aye. Nonyiso Delila kama: ‘Pok ne oliel yie wiya nyaka nene, nikech an Ja-Nazir. Ka oliel wiya, to tekona dhi rumo.’ Samson ne otimo marach ahinya wacho ne Delila wechego, donge?

Ka ne Delila owinjo wachno, ne onyiso Jo-Filistia niya: ‘Asefwenyo kama teko Samson aye!’ Delila ne ohoyo Samson ma nindo otere, kae to noluongo ng’ato molielo yie wi Samson. Bang’ mano, Delila nokok gi dwol maduong’ niya: ‘Samson, Jo-Filistia obiro!’ Samson ne ochiewo, to noyudo ka tekone orumo. Jo-Filistia nomake, ne gigolo wengene, mi gitere e jela.

Chieng’ moro, Jo-Filistia modhuro ne ochokore e hekalu mar nyasachgi ma niluongo ni Dagon. Ne gikok niya: ‘Nyasachwa osechiwo Samson e lwetwa! Keleuru kae mondo omorwae matin.’ Ne gikete mochung’ e kind sirni ariyo madongo momako ot, kae to ne gichako bayone wach. Samson nokwayo Jehova kama: ‘Jehova, asayi ni kiyie, to imiya teko mana dichiel kende.’ Gie kindeno, yie wiye ne osedongo kendo. Nomako sirnigo gi lwetene, modhirogi gi tekone duto. Odno duto nolwar mi onego ji duto ma ne ni e hekalu, moriwo nyaka Samson.