Puonj e Yo Mayot

Gima Yesu Notimo

VIDIO: Yesu Lero Kaka Nyasaye Dewowa

1. Ne VIDIO, kata isom Mathayo 6:25-27. Bang’ mano, non penjo ma luwogi:

1. Ere kaka Yesu nolero kaka Jehova dewowa?

2. Kata obedo ni Yesu nong’eyo weche mang’eny e wi winy, en wach mane mayot winjo ma nowuoye? Ang’o momiyo yo ma ne otiyogono ne ber?

Ang’o ma Wapuonjore Kuom Yesu?

2. Ka wapuonjo e yo mayot, ji biro paro gik ma wapuonjogi kendo puonjgo biro mulo chunygi.

Luw Ranyisi mar Yesu

3. Kik iwuo mang’eny. Kar wacho weche duto ming’eyo e wi wach moro, wuo mana e wi weche ma yudore e sula ma upuonjoru. Bang’ penjo penjo, hori kirito mondo japuonjreni omiyi dwoko. Ka po ni ok ong’eyo dwoko mar penjono, kata owacho wach moro ma ok winjre gi puonj mag Muma, ti gi penjo mamoko mondo ikonye winjo puonjno e yo maler. Ka japuonjreni osewinjo puonjno e yo maler, suduru nyime.

4. Kony japuonjreni mondo one tudruok mantie e kind puonj manyien ma udwaro nono kod gik ma osepuonjore. Kuom ranyisi, ka pok uchako puonjoru sula ma wuoyo e wi chier, inyalo kawo thuolo matin mondo unon weche ma ne upuonjoru e wi chal mar jomotho.

5. Bed motang’ sama itiyo gi ranyisi. Ka pok itiyo gi ranyisi moro, penjri kama:

1. ‘Be ranyisini yot?’

2. ‘Be japuonjrena biro winjo tiende e yo mayot?’

3. ‘Be ranyisini biro konyo japuonjrena mondo opar puonj maduong’ kar paro mana ranyisi ma atiyogo?’