Har–magedon Ang’o Ma Ji Wacho Kuome?

“Kendo chunygo nochoko ruodhigo e ka miluongo gi dho Hibrania ni Har–Magedon.”​​—⁠FWENY 16:16.

ANG’O mabiro e pachi sama iwinjo kiwacho ni “Har–Magedon”? Nyalo bedo ni gima biro e pachi en masira maduong’. Kata obedo ni wachno yudore mana kamoro achiel e Muma, jofwamb weche koda gi jotend din tiyo kode ding’eny.

Be paro monya e wi Har–Magedon luwore gi gima Muma puonjo e wi wachno? Dwarore ni wang’e dwoko mar penjoni. Nikech ang’o? Ng’eyo adiera e wi Har–Magedon nyalo tiekoni luoro manono, nyalo miyo ibed gi paro mowinjore kuom kinde mabiro, kendo nyalo mulo kaka ineno Nyasaye.

Par ane penjo adek maluwogi kendo non pogruok ma nitie e kind paro monya e wi Har–Magedon koda gima Muma puonjo kuom adier.

1. BE HAR–MAGEDON EN MASIRA MA DHANO EMA KELO?

Jofwamb weche koda jotim nonro hinyo tiyo gi wach mar “Har–Magedon” e lero masiche ma dhano ema okelo. Kuom ranyisi, Lweny Mokwongo gi mar Ariyo mar Piny oseluong ni Har–Magedon. Bang’ lwenjego, dhano noluor ni Amerka gi Soviet Union ne dhi kedo e kindgi ka gitiyo gi bom mar atom. Jofwamb weche ne oluongo kedo ma kamano ni “Har–Magedon mar nyuklia.” Gie kindegi, jotim nonro ma neno ni ichido alwora ahinya, chiwo siem ni wabiro bedo gi “Har–Magedon mokel gi lokruok e kit yamo.”

Tiend gima giwacho en ma: Dhano nigi nyalo chuth mar chiko gik mabiro timore ne piny koda ne ngima duto manie iye. Ka sirkande ok okawo okenge madwarore, piny biro kethore chuth.

Gima Muma puonjo: Nyasaye ok bi weyo dhano mondo oketh piny chuth. Muma nyisowa ni Jehovaa ne ok ochweyo piny mondo obed ‘nono.’ Kar mano, nolose “mondo ji odagie.” (Isaiah 45:18) Kar weyo dhano mondo oketh piny chuth, Nyasaye biro ‘ketho joma ketho piny.’​—⁠Fweny 11:18.

2. BE HAR–MAGEDON EN MASIRA MASIEKO KENDE?

Jofwamb weche kinde moko tiyo gi wach mar “Har–Magedon” e luongo masiche madongo masieko kendgi. Kuom ranyisi, e higa mar 2010, ripot moro nowuoyo e wi “‘Har–Magedon’ e piny Haiti.” Ripodno ne lero chandruoge, kethruok, koda tho ma ne okel gi yiengni piny maduong’ ma ne omuocho pinyno. Jofwamb weche koda jolos sinema tiyo gi wach mar Har–Magedon ka giwuoyo, ok mana kuom gik mosetimore kende, to bende gik ma giluor ni biro timore. Kuom ranyisi, gisetiyo gi wach mar “Har–Magedon” e lero tuomruok moro ma jomoko paro ni nyalo bedoe e kind piny mwadakieni gi piny machielo.

Tiend gima giwacho en ma: Har–Magedon en gima sieko kende ma nego ji maok oyiero, kata mana joma onge ketho. Onge gima inyalo timo mondo iresri.

Gima Muma puonjo: Har–Magedon ok neg ji maok oyiero. Kar mano, chieng’ Har–Magedon, mana joma richo kende ema ibiro tiek chuth. Muma singo ni machiegni “ng’a marach obiro onge. Ee, iniket chunyi kuom paro kar bet mare, kendo obiro onge.”​​—⁠Zaburi 37:10.

3. BE NYASAYE BIRO KETHO PINY CHUTH E LWENY MAR HAR–MAGEDON?

Ji mang’eny ma jo din paro ni nitie kedo mogik e kind ber gi rach mabiro tieko pinywani. Nonro ma ne otim gi Princeton Survey Research Associates e piny Amerka noyudo ni pasent 40 mag jomadongo neno ni piny biro rumo e “lweny mar Har–Magedon.”

Tiend gima giwacho en ma: Ne ok ochwe dhano mondo odag e piny nyaka chieng’, kendo ne ok ochwe piny mondo osiki nyaka chieng’. Kane Nyasaye ochweyo dhano, ne odwaro ni githo giduto e kinde moro moketi.

Gima Muma puonjo: Muma nyiso maler ni Nyasaye “noloso mise mag piny, mondo kik oyiengini nyaka chieng’.” (Zaburi 104:5) To kuom joma biro dak e piny, Muma wacho niya: “Jo matir ginicham piny, mi ginidagie nyaka chieng’.”​​—⁠Zaburi 37:29.

Nenore maler ni Muma kwedo paro mang’eny monya e wi Har–Magedon. Ka en kamano, kare adiera en mane?

[Weche moler piny]