Wach Maduong’ Ma Gaset Wuoyoe
Be Satan Nitie Adier?
Kido moro mopa manie piny Spain, e taon mar Madrid, manyiso Satan kaka malaika marach kendo mosepodho
“Ne adongo e piny El Salvador. Ka ne atimo gima rach, minwa ne janyisa ni, ‘Jachien biro chami!’ Kae to ne adwoke ni, ‘We obi abiya!’ An ayie kuom Nyasaye, to ok Satan.”—ROGELIO.
Be iyie gi weche mag Rogelio? Kuom weche ma luwogi, mane ma iyiego ni en adier?
Satan onge; en mana ranyisi mar richo.
Satan nitie, to ok odich gi ngima dhano.
Satan en chuech mar roho ma nigi teko kendo ochiko dhano e okang’ maduong’ ahinya.
Nitie joma riwo lwedo moro ka moro kuom parogo, samoro ji mang’eny ahinya. Kata kamano, be ochuno ni nyaka wang’e ni paro mane ma en adier? Kuom adier, ka Satan onge, to kare mano nyiso ni osewuond joma neno ni entie. To ka Satan nitie to ok odich gi ngima dhano, mano nyiso ni ji mang’eny otang’ kendo oluor kayiem nono. Kata kamano, ka Satan en jamiriambo ma wuondo ji, kara orach moloyo kaka ji mang’eny paroga.
We wanon ane kaka Wach Nyasaye dwoko penjo ma luwogi: Satan en ng’a, be en ranyisi mar richo koso chuech mar roho? To ka en chuech mar roho, be onyalo hinyi? To ka onyalo hinyi, inyalo yudo konyruok kanye?