‘Ma e Yo Miyiego’
“Iseumo wechegi ne jorieko gi joma osomo, kendo iseelogi ne nyithindo matindo.”—LUKA 10:21.
1. Ang’o momiyo Yesu nobedo ‘mamor gi mor mogundho’? (Ne picha manie chak sulani.)
PARIE kaka Yesu Kristo ne nyalo bedo ni chalo ka “ne omor gi mor mogundho” kokalo “kuom roho maler.” Samoro nyalo bedo ni wengene ne rieny gi mor kobuonjo. Ang’o ma ne more kamano? Noyudo oseoro jopuonjrene 70 odhi oland wach maber mar Pinyruodh Nyasaye. Nodwaro ng’eyo ahinya kaka ne gitimo migawono. Ne nitie wasigu mathoth ma chalo kaka jondiko mosomo ahinya kod Jo-Farisai ma ne ok dwar mondo wach maber olandre. Ne giyondho ji one Yesu mana kaka fundi bao kendo gine jopuonjrene mana ka “ji ajia ma ok osomo.” (Tich 4:13; Mari. 6:3) Kata kamano, jopuonjrene noduogo ka mor sidang’. Kata obedo ni ne giromo gi akwede moriwo nyaka moa kuom jochiende, mano ok nomonogi lendo! Ang’o ma nokelonegi mor mogundho kamano kendo ma nomiyo gibedo gi chir?—Som Luka 10:1, 17-21.
2. (a) Jopuonjre Yesu ne chalo nyithindo e yo mane? (b) Ang’o ma nokonyo jolup Kristo ong’e tiend adiera madongo mag Jehova?
2 Ne ane gima Yesu nonyiso Jehova: “Apaki e nyim ji duto Wuora, Ruodh polo gi piny, nimar iseumo wechegi ne jorieko gi joma osomo, kendo iseelogi ne nyithindo matindo. Ee, A Wuora, nimar mano e yo miyiego.” (Math. 11:25, 26) Yesu ne ok wach ni jopuonjrene ne pod gin mana nyithindo matindo. Kar mano, nong’eyo ni ne gichalo gi nyithindo kopimgi gi joma nosomo ahinya e kindego kendo ma ne kawore ni riek. E wi mano, Yesu nopuonjo jolupne mondo obed kaka nyithindo, tiende ni joma obolore kendo ma inyalo puonj. (Math. 18:1-4) Bedo joma obolore nokonyogi nade? Jehova nokonyogi gi rohone maler mondo ging’e tiend adiera mage madongo, to joma ne kawore ni riek kendo ma nochayo jopuonjrego, sunga kaachiel gi Satan noumo wang’gi.
3. Wabiro wuoyo e wi ang’o e sulani?
3 Kare e momiyo Yesu ne mor sidang’! Nomor kamano nikech noneno kaka Jehova elo adiera matut ne ji duto mobolore, ma ok odewo ni gisomo kata ok gisomo. Noyil ni Wuon mare ne oyie gi yor puonjo ma kamano. Be Jehova oselokore? To ere kaka onyiso ni pod oyie gi yor puonjo ma chalo kama? Sama wanono dwoko mag penjogo, wabiro bedo mamor mana kaka Yesu ne mor.
LANDO ADIERA MATUT NE JI DUTO
4. Ohinga mar Jarito mondik e yo mayot osekonyo jomoko nade?
4 Higni matin mosekalo, riwruok mar oganda Jehova osebedo ka jiwo wach puonjo ji weche Nyasaye e yo mayot kendo ma winjore maler. Ne ane ranyisi moko adek. Mokwongo, nitie gocho mar Ohinga mar Jarito mondik e yo mayot winjo.a Gasedno osebedo kaka mich ne jogo ma nyocha yudo ka teknegi somo gocho ma pile mar Ohinga mar Jarito. Wiye udi osefwenyo ni sani nyithindgi keto pachgi ahinya sama ji puonjore gasedno, nikech mano e yo maduong’ ma wayudogo chiemb chuny. Ji mathoth osendiko weche mabeyo ka gidwokogo erokamano. Nyaminwa moro nondiko ni chon ok nochiwga paro sama itimo Puonjruok mar Ohinga mar Jarito. Nowacho niya: “Naling’ga aling’a sama ji chiwo dwoko.” Sani to ok en kamano! Bang’ tiyo gi gaset mondik e yo mayotno kuom kinde, nondiko kama: “Sani ajachiwo paro moloyo dichiel, kendo luoro ma ne an-go nolal nono! Adwoko erokamano ne Jehova kendo ne un bende.”
5. Gik mabeyo ma yudore e Muma manyien mar New World Translation of the Holy Scriptures gin mage?
5 Mar ariyo en gocho manyien mar New World Translation of the Holy Scriptures, ma nogol e dho Kisungu e romo ma notim Oktoba 5, 2013.b Ndiko mang’eny e Mumano sani tiyo gi weche manok, to tiendgi pok olokore kendo giwinjore maler. Kuom ranyisi, chon bug Ayub 10:1 ne nigi weche 27 to sani gin 19; Ngeche 8:6 ne nigi weche 20 to sani gin 13. Ndiko ariyogo winjore maler e Muma manyienno. Owadwa moro ma en Jakristo mowal mosebedo ka tiyo ne Jehova kuom higni pieche nowacho kama: “Ka nasomo bug Ayub e gocho manyienno, ne chalna ka gima eka ahango winjo tiende!” Ji mang’eny bende osewacho weche ma chalo kamano.
6. Inyalo wacho ang’o e yo ma osemed lernwago Mathayo 24:45-47?
6 Mar adek, non ane kaka osemed lernwa tiend adiera moko. Kuom ranyisi, ka nomed lernwa tiend “jatich mogen kendo mariek,” e Ohinga mar Jarito ma Julai 15, 2013, ne wabedo mamor. (Math. 24:45-47) Nolernwa ni jatich mogenno en Bura Matayo, to ‘joot’ gin jogo duto ma ipidho gi chiemb chuny, bed ni gin Jokristo mowal kata gin “rombe mamoko.” (Joh. 10:16) Donge ng’eyo adierago morowa ndi kendo wadwaro puonjogi joma pod nyien? Jehova osenyiso nade e yore mamoko ni oyie mondo opuonj joge e yo mayot, kendo ma winjore maler?
YO MAYOT KENDO MA WINJORE MALER MAR NONO SIGENDNI MAG MUMA
7, 8. Gin ranyisi mage mag gik miwuoye e Muma ma nochung’ ne gik ma ne dhi timore kinde mabiro?
7 Ka isebedo kitiyo ne Jehova kuom higni mathoth, nyalo bedo ni isefwenyo ni yo ma bugewa lerogo weche moko manie Muma lokore mos mos. E yo mane? Chon, bugewa ne thoro wacho ni sigendni me Muma ochung’ ne gik moko madongo ma ne dhi timore kinde mabiro. Sigendni mag Muma kinde duto ne ineno kaka tipo kata ranyisi kendo ne ikawo ni gin weche mokor ma ne dhi chopo bang’e. Be nitie wach moro amora e Muma ma nyiso ni inyalo ler wechego kamano? Ee, nitie. Kuom ranyisi, Yesu nowuoyo e wi ‘ranyisi mar Jona janabi.’ (Som Mathayo 12:39, 40.) Yesu nolero ni kinde ma Jona nokawo ei rech ma ne dhi chalo kaka bur moyikee ka dine Jehova ok orite, nochung’ ne kinde ma en owuon nodhi tieko e bur.
8 Nitiere weche moko e Muma ma nochung’ ne gik ma ne dhi timore kinde mabiro. Jaote Paulo nowuoyo e wi moko kuomgi. Kuom ranyisi, winjruok ma ne nitie e kind Ibrahim gi Hagar, kod Ibrahim gi Sara, nochung’ ne winjruok ma ne nie kind Jehova gi oganda Jo-Israel machon kod bad riwruok mar Nyasaye manie polo. (Gal. 4:22-26) Kamano bende, tabernakel kod hekalu, Odiechieng Pwodho Ji, jadolo maduong’, kod gik mamoko ma ne ni e Chike Musa ne gin “tipo mar gik mabeyo ma biro.” (Hib. 9:23-25; 10:1) Nono weche manie Mumago kod gik ma gichung’ne, en gima jiwo yiewa ahinya. Kata kamano, be koro onego wakaw ni ng’ato ang’ata, kata gimoro amora miwuoyoe e Muma ochung’ ne ng’at machielo kata gima ne dhi timore kinde mabiro?
9. Chon ne ilero nade sigand Naboth?
9 E kinde mokalo, bugewa ne jalero ni sigand ng’ato ka ng’ato kata gimoro ma notimore nochung’ ne ng’ato kata gimoro machielo. Kuom ranyisi, Jezebel ma ne en chi ruoth nochano mondo oneg Naboth eka mondo Ahab chwore okaw puoth Naboth mar mzabibu. (1 Ruo. 21:1-16) E higa mar 1932, noler ni siganani nochung’ ne wach moro mokor. Ne oleronwa ni Ahab kod Jezebel nochung’ ne Satan kod riwruok mare, to Naboth nochung’ ne Yesu; kae to tho mar Naboth ne nyiso kaka ne idhi neg Yesu. Kata kamano higni moko bang’e e buk moro miluongo ni “Let Your Name Be Sanctified” ma ne ogo e higa mar 1961, nolero ni Naboth nochung’ ne Jokristo mowal, to Jezebel nochung’ ne Jokristo ma miriambo. Kuom mano, sand ma Jezebel nosandogo Naboth ne nyiso kaka ne idhi sand Jokristo mowal e kinde mag giko. Kuom higni mang’eny, jo Nyasaye ne neno ni yo ma ne ilerogo sigendni mag Muma ne jiwo yiegi ahinya. Kare ang’o momiyo tinde walero sigendnigo e yo mopogore?
10. (a) Tiyo gi rieko osekonyo nade jatich mogen e lero sigendni manie Muma? (b) Sani bugewa temo timo ang’o ahinya?
10 Kuom higni mang’eny Jehova osebedo ka konyo “jatich mogen kendo mariek” mondo omed bedo mariek moloyo. Riekono osemiyo omedo bedo motang’ kodok korka wacho ni sigana moro manie Muma en wach mokor mochung’ ne gimoro maduong’ ma ne dhi timore kinde mabiro, mak mana kapo ni nitie Ndiko moro ma siro wachno. E wi mano, osefwenyore ni thoth weche ma ne ilero e yo ma kamano ne tamo ji mathoth winjo tiendgi. Weche matindo tindo manie puonjgo, ni ang’o mochung’ ne ang’o kata ni ng’ano mochung’ ne ng’ano to nikech ang’o, nyalo bedo matek winjo tiende, paro, kendo tiyo gi puonj ma yudore e siganano. To maduong’ie moloyo, en ni puonj madongo monego wayud e sigendnigo nyalo bedo matek fwenyo kata nyalo lal mana nikech nono gik matindo tindo ma siganano ochung’ne. Omiyo, bugewa sani lero mana puonj e yo mayot e wi yie, nano, chiwruok ne Nyasaye, kod kido moko madongo ma wanyalo puonjore e sigendni manie Muma.c
Ranyisi mar Naboth puonjowa wach moro maduong’ (Ne paragraf mar 11)
11. (a) Sani ileronwa tiend sigand Naboth nade, to ang’o momiyo ranyisine nyalo konyo Jokristo duto? (b) Ang’o momiyo bugewa ma tinde ok thor wacho ni ng’ato kata gimoro miwuoyoe e Muma ochung’ ne gimachielo? (Ne “Penjo Moa Kuom Josombwa” e gasedni.)
11 To kare sani wanyalo lero nade tiend sigand Naboth? Sani ilere e yo mayot. Ne otho nikech nomakore gi Nyasaye to ok ni nochung’ ne Yesu kata Jokristo mowal. Nomakore gi Chike Jehova kata obedo ni joloch nosande. (Kwan 36:7; 1 Ruo. 21:3) Ranyisi mar Naboth puonjowa ni ng’ato ang’ata kuomwa nyalo romo gi sand nikech luwo chike Nyasaye. (Som 2 Timotheo 3:12.) Jokristo duto nyalo winjo tiend puonjno, nyalo pare, kendo nyalo tiyo kode e jiwo yie margi.
12. (a) En paro mane ma ok onego wabedgo kuom sigendni ma nondiki e Muma? (b) Ang’o momiyo wanyalo lero e yo maber weche matut mag Nyasaye? (Ne weche moler piny.)
12 Be mano koro nyiso ni sigendni mag Muma chiwonwa mana puonj kende, kendo ni ok ginyal chung’ ne wach machielo? Ooyo. Ndalowagi bugewa thoro jiwo ahinya kaka wach moro paronwa machielo, kata gileronwa wach machielo, kata kaka otudore gi wach moro. Ok githor jiwo ni sigendni manie Muma ochung’ ne mana gima okor ma ne dhi timore bang’e. Kuom ranyisi, wanyalo wacho kare ni bedo ni Naboth nosandi ma otho nikech nomakore gi Nyasaye, paronwa kaka Kristo gi jolupne mowal omakore gi Nyasaye. E wi mano, wachno bende paronwa kaka “rombe mamoko” bende omakore gi Nyasaye. Wanyalo neno maler kaka Jehova puonjowa e yo mayot kendo ma winjore maler.d
NGECHE MA YESU NOTIYOGO ILERO E YO MAYOT
13. Gin ranyisi mage ma nyiso ni ngeche Yesu sani ilero e yo mayot kendo ma winjore maler?
13 Yesu Kristo e Japuonj maduong’ie moloyo mosegadak e pinyni. Achiel kuom yore ma nohero tiyogo ahinya kopuonjo ne en tiyo gi ngeche. (Math. 13:34) Ngeche miyo waparo matut kae to bang’e wechego donjo e chunywa. Kaka higni medo kalo, be bugewa osebedo ka lero e yo mayot kendo ma winjore maler ngeche ma Yesu notiyogo? En kamano! Donge ne wamor ahinya kane olernwa e yo mayot ngeche ma nogoyo e wi thowi, koth karadali gi gogo e Ohinga mar Jarito ma Julai 1, 2008? Sani wang’eyo maler ni ngechegi wuoyo e wi Pinyruodh Nyasaye mosekonyo ji mang’eny obed jolup Kristo ka giwuok e mudho mar piny marachni.
14. (a) Chon ne walero nade ngero mar Ja-Samaria? (b) Sani wawinjo tiend ngerono nade?
14 To nade weche mamoko matut ma yudore e sigendni kata ngeche ma Yesu nogoyo? Moko kuomgi nochung’ ne gik mamoko, to moko notudore gi weche mokor, ka moko ne jiwo puonj ne Jokristo. To kare wanyalo ng’eyo nade gima ngero kata sigana moro wuoyoe? Kaka higni medo kalo, dwoko mar penjono osebedo ka medo fwenyore maler mos mos. Kuom ranyisi, ne ane kaka ne walero ngero ma Yesu nogoyo e wi Ja-Samaria. (Luka 10:30-37) E higa mar 1924, The Watch Tower nowacho ni Ja-Samaria nochung’ ne Yesu, to ndara ma ne ridore ka wuok Jerusalem ka dhi Jeriko, nochung’ ne ngima dhano ma ne medo kethore chakre ging’any e puoth Eden; to jokuoge ma ne nie ndarano nochung’ ne jolok ohala madongo ma igi lach; to jadolo gi Ja-Lawi nochung’ ne Jokristo mag miriambo. E kindegi, itiyo gi ngero achielno e bugewa kiparo ne Jokristo duto ni ok onego gibuon ng’ato ang’ata ma dwaro kony to moloyo joma onego okony ong’e Jehova. Donge en gima morowa neno kaka Jehova medo keto puonj mage owinjre e yo maler?
15. Wabiro nono ang’o e sula ma luwo?
15 E sula ma luwo mae, wabiro nono ngero machielo ma Yesu nogoyo mar nyiri apar ma silili. (Math. 25:1-13) Yesu ne dwaro mondo jolupne modak e ndalo giko owinj tiend ngerono nade? Be ng’ato ang’ata kod gimoro amora ma yudore e ngerono ochung’ ne gima ne dhi timore e kinde mabiro? Koso Yesu ne dwaro mana ni wayud puonj moko ma ne dhi tayowa e ndalo mag gikogi? We wane ane.
a Ohinga mar Jarito mondik gi weche mayot winjo, nokwong olos e dho Kisungu e dwe mar Julai 2011. Chakre kindeno, osebedo koyudore e dhok mamoko manok.
b Itimo chenro mondo Mumano oyudre e dhok mamoko.
c Kuom ranyisi, buk miluongo ni Luw Yie Margi wuoyo matut e wi ngima jotich Nyasaye 14 ma yudore e Muma. Weche manie bugno nyiso puonj mwanyalo tiyogo to ok weche ma sigendnigo nyalo bedo ni ochung’ne.
d En adier ni Wach Nyasaye oting’o weche ma nyalo nenore ni “winjo tiendgi tek,” moriwo weche moko ma Paulo nondiko. Kata kamano, jondik Muma duto ne otelnegi gi roho maler. Rohono e ma pod konyo Jokristo madier mondo owinj e yo maler adiera mag wach Nyasaye moriwo “nyaka gik matut mag Nyasaye.”—2 Pet. 3:16, 17; 1 Kor. 2:10.